Read Gangte LUKE 22 Bible Online

LUKE 22 - Gangte bible

LUKE 22

¹Chun, chângthâk chawl sawhloh Kut, Chiehkân Kut a tih u chuh a nai ta a.

²Tichun, Thiempuliente leh Danthuzikte chun mipite a lauh ziekun, Isu chuh a gûka thah theihna ding lampi a hawl tau a.

³Tichun, sawm le nih te laka tel Juda, Iskariot a tihpau sung achun Setan a lut a.

⁴Khutichun, Juda chuh a va pawt dawka, thiempu liente leh, Ho-In veng lawiupate kawma chun Isu a matsak theih ding dân chuh a va gen ta a.

⁵Chun, amau chuh a kipâk mah mah u a, a kawmah dangka piek a tiem tau a.

⁶Khutichun, Juda chun lem a sa a, tichun, mipite het loh a, Isu a matsak theihna ding hun lemchâng a hawl ta a.

⁷Chun, chângthâk chawl sawhloh Kut, Chiehkân Kut belamno thahna ding ni chuh a hungtung ta a.

⁸Tichun, Isu’n Peter leh Johan chuh, “Chiehkân Kut an I nek dingun va guonggalh un,” ti’n a sawl a.

⁹Chun, amau chun a kawmah, “Khawitak ah va guonggalh leng un na nuom hi?” a tiu a.

¹⁰Amah chun a kawm u ah, “Ngaitiem u, khawpi na lut lut u leh, mi khat bela tui pu’n hun kituohpih intin; a lutna ina chun zui lut un,

¹¹tichun, a In neipa kawma chun, ‘Sinsakpa’n, ka sinsakte tawh Chiehkân kut an ka nekna dinguh, malzin indan chuh khawitaka? a hun tii,’ va tiu.

¹²Tichun, amah chun, indan chungnung lientak, matchâk umsa, hun na etsak ina, taka chun guonggalh un,” a ti a.

¹³Khutichun, a chieh tau a, a kawm u a a gen guol tak chun a va mu tau a; zie chun Chiehkân kut an chuh a guonggalh tau a.

¹⁴Chun, a nek a hung phat phetin, Isu chuh a sinsakte tawh dawhkan a chun, an ne ding chun a chu ta a.

¹⁵A kawm u ah, “Ka thil thuok masang in, zie Chiehkân kut ankuong hi hun nekpih ka nuom mah mah hi!

¹⁶Ka hilh na hiu hi, Pathien gama a tak a hih masang sieh, ziehi ne kit ta puo’ng ka,” a ti a.

¹⁷Tichun, Isu’n khawn chuh a la a kipahthu a gen a, “Ziehi lau inla, kihawm un.

¹⁸Ka hilh na hiu hi, tu a kipat Pathien gam a hungtun masang sieh, grep gah tui hi dâwn kit talo ding ka hi,” a ti a.

¹⁹Chun, chângthâk a la a, kipah thu a gen zawhin a phelsuoh a, a kawm u ah a pie a, “Ziehi ka sapum, na sik u a piek ding chuh ahi, nei hetzingnau in zie hi hih sek un,” a ti a.

²⁰Chun, khutibang mah in, nitâk an nek zawhin khawn chuh a la a, “Ziehi ka thisana thugawlh thak, na sik u a pawt ding melchikna chuh ahi.

²¹Himahlele, entiem u! ei matsak ding pa chuh dawhkan a ei ûmpih pa ngêi hi ahi.

²²Mihiem Chapa hi, a a guot guol ngei un chieh ding ahi: himahlele, a matsak ding pa chung chuh a gik hi!” a ti a.

²³Tichun, amau haw chuh, “I laku hin zie tawbang thilhih ding chuh, a kuo pên hi I hi ta ding u?” ti’n a kidawngtuoh tau a.

²⁴Chun, alak u ah kuo a lopipen die tih thu ah, kinielna a hung pawt ta a.

²⁵Isu’n a kawm u ah, “Jentel lengte chun a mipiteu chungah thu a nei ten sek ui; tichun, a chung u a lalte chuh ‘Mipite guolpa’ a ti sek ui.

²⁶Himahlele, nang haw vang chuh khutibang chuh hi ding nei puou ui; na lak u a lopipen chuh a naupangpen guolin um hen la, a lalpen chuh a tawiviel pên in um hen.

²⁷An kuong a chu pa leh, an nek ding siem vielpa chuh kuo a lopi zaw? An ne dinga chu pa chu hilo ahim? Himahlele, kei vang, na laku ah tawiviel pên pa bangin ka um zawi.

²⁸Thepa ka um sung cheng, nang haw hi ei umpihte na hiu a;

²⁹tichun, ka gama ka dawhkan a an na nek u a, na dawn theihna dingun, ka pa’n gam ei guotsak guolin, gam ka hun guotsak na hiu hi.

³⁰Chuleh, Israel nam sawm leh nam nih te vaihawm sak in lalchutphah ah hung chu’n lau.

³¹“Simon, Simon! ngaitie, nang haw chengcheng hi Setan in buh ngelh guola a hun ngelh theihna dingin, nanguh lawi hi ahun ngên a puo.

³²Himahleh Simon, na taksanna a beih lohna dingin ka hun paucham sak zing hi. Khutichun, kei lama na hung kihei kit phat leh, na suohpihte suhat in,” a ti a.

³³Peter chun a dâwng a, “LALPA, na kawma chun, suongkul leh thihna ale chieh dingin kiguo zosa ka hi a puo!” a ti a.

³⁴Chun, amah chun, “Peter, ka hun hilh na hi, na hetsasa a thumvei nei kizuksan masang sieh tuzan in âk khuong puo’n a” a ti a.

³⁵Chun, Isu’n a sinsakte kawm achun, “Dangkadipte, sakhaute leh kengtawbek keng lo a ka hun sawl dawk lai khan, thil himhim na tasam ngei um?” ti’n a dawng a. Amau chun, “Tasam lo,” a tiu a.

³⁶Isu’n a kawm u ah, “Tu’n chuh, kuole, dangkadip ahim, sakhau ahim nei chun keng hen la; kuole, chemzâm neilo chun, a puonâk zuok hen la, chaw hen.

³⁷Ka hilh na hiu hi, Amah chuh mi gilote lak ah a simtel tau hi ti a, Pathien lehkha thu a ka chungchâng thu zik kha ka chunga hungtung ding ahi; ka chungchâng thu kizikte kha hungtung kim ding a hi tai,” a ti a.

³⁸Chun, sinsakte chun a kawmah, “LALPA, entie taka hin chemzâm nih a um hi,” a tiu a. Amah chun, “Zie chuh a hun set hi,” a ti a.

³⁹Chun, a pawtdawk a, a hih ngeina guolin. olive tâng achun a chieh a; sinsakte’n le a zui u a.

⁴⁰Chun, a mun chuh a va tun phetin, a kawm u ah, “Thepna a na lut lohna dingun paucham un,” a ti a.

⁴¹Tichun, suong a seh phakna ding vela hin a va chieh chuom a, zie chun, khupdin in a paucham a,

⁴²“Hepa, lem na sak leh zie khawn hi ka kawm apat la chawn ah; himahlele, kei thu hilo in, nangmah thu thu hi zaw hen,” a ti a.

⁴³Chun, vânsâwlchâk khat, van apat in a hung kilak a, amah a hung suhalh a.

⁴⁴Chun, lungthim gim taluo chun, phachuomngai zaw diek in a paucham a; a khawsa-ul chuh thisan tang lientak guolin tuola chun a va tha a.

⁴⁵Tichun, a pauchamna apat chun a tho dawk a, a sinsakte kawm lama chun a chieh kit a, a lungkham ziek u a ipmu chuh a va mu ta a.

⁴⁶Tichun, a kawm u ah, “Bangati a ipmu na hiu hi? Tho unla, thepna a na lut lohna dingun paucham un,” a ti a.

⁴⁷Chun, zie thu a gen lai tak chun, mipi a hung u a, sinsak sawm le nih te laka tel Juda a tih u chuh a hung makai a. Isu chuh châwp guo’n a va zuon a.

⁴⁸Ziephet chun, Isu’n a kawmah, “Juda, Mihiem Chapa hi, chawpa matsak ding na him?” a ti a.

⁴⁹Chun, a kienga umte chun, thil hung um ding chuh a muh phet un, “LALPA chemzâm in ka do ding um?” a tiu a.

⁵⁰Tichun, a lak u a khat chun, thiempu lienpen suok chuh a sat a, a bil changlam a satthâk sak ta a.

⁵¹Isu’n a kawmah, “Zie bêk hi ei vak hih sak tiem u,” a ti a. Tichun, a bil chuh a tham a, a hihdam ta a.

⁵²Chun, Isu’n amah man dinga hung, thiempu liente leh, Pathien Ho-In veng lawiupate leh, upahaw kawma chun, “Chemzâm haw, khetbuk haw chawi in, gucha suommang man ding guola hung na hiu maw?

⁵³Pathien Ho-In ah, ni chengin na kawm u ah ka um a, nei mat guo ngâl puou a, Himahleh, tuhi na tawih phat uh ahi, thim thilhih theihna’n vai a hawm ahi,” a ti a.

⁵⁴Tichun, Isu chuh a man u a, thiempu lienpen In lam achun a puimang tau a; Peter in gamla taka kihal in a zui a.

⁵⁵In umna huong sunga chun mei a tik u a, tichun, mei panga chu haw lak achun Peter le a va chu a.

⁵⁶Chun, mei panga a chut lai chuh, suok nungak khatin a mu a, changtak in a en a, “Zie pa hile Isu kawmah a um khai,” a ti a.

⁵⁷Himahleh, Peter chun a niel a, “Numei, amah chuh het le ka he kha puoi,” a ti a.

⁵⁸Chun, chawmkhat hal in mi dangin a hung mu kit a, “Nang hile a laku a tel na hi hi,” a ti a. Himahleh, Peter chun, “Mihiem, ka tel puoi,” ti’n a dâwng a.

⁵⁹Chun, dâkkâl khat vel hal in, mi dang khatin a hung mu kit a, “Zie pa hile a kawm u a um kha a hi mah mah hi, Galili gama um khah ahi,” a hung ti a.

⁶⁰Himahleh, Peter in a dâwng a, “Mihiem, kuo chanchin gen na hih ka he puoi!” a ti a. Tichun, zie chuh a gen lai takin, thakhat in âk a hung khuong ta a.

⁶¹LALPA chuh a kihei a, Peter chuh changtak in a en a, ziephet chun, Peter chun, “LALPA’n tu zan hin, âk khuon ma’n nangin thum vei, ei kizuksan inla,” ti a a kawma a gen chuh a hun hedawk kit ta a.

⁶²Chun, a pawtdawk a, hah kah in a kap ta a.

⁶³Chun, Isu venga pang te chun tawtbawlna’n a mang u a, a zêp u a.

⁶⁴Tichun, a mit a tuom sak u a, a mai a beng u a, “Gen lawk tie le! kuo a hun beng?” ti’n a dawng zel u a.

⁶⁵Chun, thu dang tamtak in le amah a sawisau a, a gai u a.

⁶⁶Chun, khuo a vak phetin upahaw, Thiempulien haw leh Danthuzikte chuh a kikhawm u a, Isu chuh vaihawmna masanga chun a pui tau a.

⁶⁷“Krista chuh na him? Kei uh nei hilh ah,” a tiu a. Amah chun a kawm u ah, “Hun hilh leng le gingcha puo’n lau,

⁶⁸Chun, ken thu hun dawng lengle, ei dâwng thei diek puo’n na tin uh, ei chiehdawk sak diek puo’n lau.

⁶⁹Himahlele, tu a kipat hin chuh, Mihiem Chapa hi, Pathien Bangakai hihtheipa changlam ah chu ta’n a,” a ti a.

⁷⁰Ziephet chun, a bawnu chun, “Nang hi Pathien Chapa chuh na hi a ahim?” a tiu a. Amah chun a kawm u ah, “Na hi nei tih bang tak u chun ka hi,” a ti a.

⁷¹Chun, amau chun, “Hetpihtu dang banga I ngaih beh naklai dinguh? Eimau haw ngêi in, amah kamsuok I za tau hi la,” a kitiu a.