Read Gangte LUKE 23 Bible Online

LUKE 23 - Gangte bible

LUKE 23

¹Khutichun mipi haw cheng chuh a kipan u a, Isu chuh Pilate kawmah a pui tau a.

²“Zie pa hin I miteu a sukhuolo a, Kaisar kawma sieh a chawih dinguh a khap a, Krista ka hi, leng ka hi, a kitih ka heu ui,” ti’n a hêk pan tau a.

³Chun, Pilate in a kawmah, “Judate leng na him?” ti’n a dâwng a. Amah chun a dâwng a, “Hi e,” ti’n a dâwng a.

⁴Ziephet chun, Pilate in thiempu liente leh mipite kawm achun, “Zie pa chunga hin bangmah a gitlohna ka mu puoi,” a ti a.

⁵Himahleh, amau haw chun, “Galili gam ah a pan a, zie mun tieng hin, Judia gam khuo tin ah a sinsakna hin mi a subuoi zo vek hi,” ti’n a hah nawh zaw deuh u a.

⁶Chun, Pilate in zie chuh a zak phetin, Galili gam mi a hih leh hih loh a dawng a.

⁷Khutichun, Herod biel mi ahii tih a het phetin, Herod kawmah a sawl ta a, zielai chun amah chule Jerusalem ah a um a.

⁸Chun, Herod in Isu a muh phet chun, a chanchin a na zak sek ziek leh, hun sawttak apat a muh a nawp him a hih ziekin, a kipâk mah mah ta a. Isu’n thilmak, bang ahim khat a hih le a kinem a.

⁹Tichun, thu tamtak a dawng a, himahleh, Isu’n a hawimah chuh a dâwng diek puoi.

¹⁰Khutichun, thiempu liente leh dân sinsakte chun, a va naih u a, nasatak in a hêk u a.

¹¹Herod leh a sepaihte chun Isu chuh a engho u a, musit takin a bawl u a; puon lopitak silh sak in, Pilate kawmah a sawl kit tau a.

¹²Chun, zie ni mah chun, Herod leh Pilate chuh a kituok ten u a; zie macheng chuh a na kimelma zing ahiu hi.

¹³Tichun, Pilate in, thiempu liente leh, lawiupate leh, mi chengcheng a sam khawm a.

¹⁴a kawm u ah, “Zie pa hin, mi chengcheng a sukhuolo hi ti’n, ka kawmah na hun pui u a. Nangmau haw umlai ngêi in, amah hi ka phawchien a, himahleh, na hun hêkna thuu a khan, zie pa chunga hin bangmah a thiemmawhna ka mu puoi.

¹⁵Herod inle a mu diek puoi, ziezieka chuh I kawm u a a hun sawl kit ahi. Chun, ngaitiem u, thihna khawp ding bangmah gitlohna a nei puoi.

¹⁶Zieziekchun, zêp ing ka ting, thahdawk mai ding ka hi,” a ti a.

¹⁷(Chiehkân Kut cheng leh Pilate in suongkultâng a thahdawk sek ding ahih ziekin)

¹⁸Himahlele, mipi cheng cheng chuh a kiko u a. “Amah hi that inla, Barabbas kha ei thahdawk sak zaw’n,” a tiu a.

¹⁹(Barabbas chuh khawpi sunga kiphinna, bang ahim ziek leh, tuol thah zieka suongkul lut ahi.)

²⁰Pilate chun la, Isu thahdawk a nuom a, mipite kawm achun thu a gen kit a.

²¹Himahlele a kiko khum kit u a, “Kross ah khên den ah, kross ah khên den ah!” a tiu a.

²²Chun a thum veina ah, a kawm u ah, “Bang ziekin em? Zie pa hin banga a hih khelh? Thihna kham hiel a chungah bangmah ka mu puoi; zêp ing ka ting, thahdawk mai ding ka hi,” a ti a.

²³Himahleh, amau haw chuh aw ngeih tak in a kiko u a, kross a khetdên dingin a ngên hâm hâm u a, a tawp in, a awu chun a vau thip tau hi.

²⁴Khutichun, Pilate in, a nget bang u a hih dingin thu a tan ta a.

²⁵Kiphinna ziek leh, tuolthahna zieka suongkul a lut pa chuh a thahdawk a; Isu chula a nawp nawp u a a bawl dingun a pie dawk ta a.

²⁶Khutichun, sepaihte’n Isu chuh a puimang tau a, a chieh lai u chun mi khat, Kurini khuo a um, a min Simon kiti, thingtâng apat a khawpi a hung chuh a kituok pih u a. Tichun, a man u a, a chungah kross a ngau a, Isu nunglam a chun a put sak tau a.

²⁷Chun, mipi nasatak in a nung ah a zui u a, a lak uh achun, numei khenkhat, kap kawm leh, amah zieka âwm kichup kawmin a zui u a.

²⁸Chun, Isu’n amau haw lam chuh a nga a, a kawm u ah, “Jerusalem Chanute! ei kah kiu in, nangmau haw leh na chateu dingin kap zawu in.

²⁹Ngaitiem u! a ni hungtung ding ahi, zie ni haw achun, ‘Numei ching, leh nauvawp khak lohna gilpi leh nau chep khâkloh nawihaw chuh a hamphau hi,’ hun ti’n au.

³⁰Zie tieng chu leh mi’n tâng kawmah, ‘Ei delh khum ah!’ tiu intin, muol kawma le, ‘Ei selin!’ hun ti’n au.

³¹Thing hing a bawn zie tawbang phet hi a hih chun, thing gaw achun bang a hung ti taphet dem maw?” a ti a.

³²Chun, a kawm u ah mi dang nih, migilo gel, suklup dingin a pui u a.

³³Tichun, “Kalvari,” a tih uh chuh a tun phet un, tak achun, kross ah a khêndên u a, mi gilote tawh, a changlam ah, khat a veilam ah khat a kilhden u a.

³⁴Chun, Isu’n, “Hepa, amau hi ngaidam in, a thilhih u hi a he puou hi,” a ti a. Chun, a silhlechen chuh phunsân in a kihawm u a.

³⁵Chuleh, Juda lawiupate chun, “Mi dang bawn hihdam seka, Pathien tel Krista a hih chun, amah kihihdam heh!” ti a a ho siet lai u chun, mipite chun din sa’n a gâl et u a.

³⁶Chun, Sepaihte chun engho kawmin, a kawmah a hung u a, zu thuk a pieu a.

³⁷“Judate leng na hih chun nangmah kihukdam ah,” a tiu a.

³⁸Chun, a chunglama chun Grik pau, Latin pau leh Hebrai pau in, “ZIE PA HI JUDATE LENG AHI” tih a kizik a tâk u a.

³⁹Chun, migilo a khetdên teu laka khat chun Isu a gai a, “Krista na hih leh nangmah kihukdam inla, kei u le ei hukdam ta’n la!” a ti a.

⁴⁰Himahlele, khatzaw pa chun dâwn kawmin a hilh gaih a, a kawmah, “Pathien nasan le lau lo maw? Kibang taka ei gawt u hi!

⁴¹Eite nih vang gawt ding him I hi, I thilhih man mu I hi; himahleh, zie pa hin vang bangmah a hihkhiel puoi,” a ti a.

⁴²Chun, Isu kawmah, “Isu, na gam na tun tieng leh, ei hezing in,” a ti a.

⁴³Isu’n a kawmah, “Tihtakzet a ka hun hilh na hi, tuni hin, ka kawmah, paradis ah um inla,” a ti a.

⁴⁴Chun, sun an nek phat vel a hung hi a, zie a pan chun vaimim huon phat gei in nisa chuh a hung thim ta a, gam chengcheng chungah thim a hung zing ta a:

⁴⁵Chun, Pathien Ho-In puonzak chuh akimtak ah a hung kithek ta a.

⁴⁶Tichun, Isu chuh ngeih tak in a kiko a, “Hepa! na khut ah ka thagau ka hun vawp sak hi,” a ti a. Zie chuh a gen zawhin, a thagau a thah ta a.

⁴⁷Chun, Sepaih lawiupa chun thil umzie chuh a mu a, tichun, Pathien a pakcha a, “Zie pa hi matheilo in, mi diktat ahi hi,” a ti a.

⁴⁸Chun. zie etnawp chuh en dinga mipi hung kikhawm cheng chengte chun thil umzie haw chuh a muh phet un, lungkham a a âwm kichup kawmin In lam ah a kilehkit tau a.

⁴⁹Chun, mahni mimal ngeia Isu a na hete leh, numei, Galili gam apat a hun zuite chun, zie thil haw chuh thîl in gamla tak ah a ding u a.

⁵⁰Chun, ngaitie, mi khat amin Joseph kiti vaihawm diktat leh mipha tak a um a, a vaihawm u leh thilhih uh khale ana ki-awilo him ahi.

⁵¹Amah chuh Judate khuo Arimathai a um ahi a, Pathien gam kineppih sek ahi.

⁵²Amah chuh Pilate kawmah a va chieh a, Isu luong chuh a va ngên a.

⁵³Tichun, luong chuh a latha a, patngatpuon in a tuom a, thân suong geikuok, kuomah kisiel khâk nai loh na achun a siel ta a.

⁵⁴Zie ni chuh kiginni ahi a, chawlhni kipan ding ahi ta a,

⁵⁵Chun, numei, Galili gam apat a Isu hun zuite chun a zui zel u a, thân leh a luong kisiel dân chuh a muu a.

⁵⁶Tichun, a kilehkit u a, thil gimlim leh thau gimlim chuh luong nuh ding chun a guonggalh tau a. Chawlhni chun, Dan Thupiek bangin a châwl tau hi.