Read Gangte LUKE 3 Bible Online

LUKE 3 - Gangte bible

LUKE 3

¹Chun, leng Tiberius lal a kipat, kum sawm leh kum nga kum in; Pontia Pilate chuh Judia gam vaipuo ahi a, Herod chuh Galili gam vaipuo ahi a, a suohpihpa Philip chuh Iturea leh Trakonitia gambung khena vaipuo a hi a, Lusania chuh Abilene gam vaipuo ahi a,

²Anna leh Kaiapha chuh Thiempu lienpen ahiu hi. Zielai chun, thalek gama Zakaria chapa Johan kawm achun Pathien thu a hungtung a.

³Johan chuh Jordan lui pang vel gam tin achun a chieh viel a, thu a gen a: “Na gitlohnau apat in lunghei unla, baptistma chang un; khutichun, Pathien in na gitlohna teu hun ngaidam ding ahi,” ti’n.

⁴Thiemgau Isai lehkhabu a kizik guolin: “Gamthip a mi kiko khat chun, LALPA lamlien lai unla, A lampi hei zang un.

⁵Guom tin sun dim hi vek intin; Tang tin muol tin le hihniem hi’n tin; Lam kawi le hung zang intin; Lam kiguollo le hung kiguol intin;

⁶Tichun, mi chengcheng in Pathien hukdamna chuh mu’nau,” a tii tih zik guol khan.

⁷Chun, Johan kawm achun mipi tamtak, baptistma chang dingin a hung khawm u a. Ama’n a kawm u ah, “Gûl suonte haw, lungnat hungtung ding hi taihsan dingin kuon a hung hilh a?

⁸Khutichun, lunghei melpu kham in gah un. Abraham ei suonpa ahii ti’n, na lungthim un ngaihtuoh mai kiu in; Pathien in zie suonghaw hi Abraham suon in a suoh sak thei hi tih ka hun hilh na hiu hi.

⁹Tu apat in heicha thing bul tin ah ah a kawih tau hi, khutichun, thing tin, gah pha suoh lo ta cheng chuh a phuk u a, mei ah paih lut sek ui,” a ti a.

¹⁰Ziephet chun, mipite chun a kawmah, “Bang ka hih ding u leh?” ti’n a dawng u a.

¹¹Amah chun a kawm u ah, “Kuole, puonâk nih nei ta chun a nei lote kawmah pie hen la, kuole, nek ding nei chun, khutibang mah chun hih hen,” ti’n a dâwng a.

¹²Chun, siehdawlte le baptistma chang dingin a hung u a, a kawmah, “Sinsakpa, kei un bang ka hih ding u leh?” a tiu a.

¹³Amah chun a kawm u ah, “Dan in a hun phalsak khel chuh bangmah la kiu in,” a ti a.

¹⁴Chun, sepaih ten le a kawmah, “Kei un le bang ka hih ding u leh?” a hung tiu a. Ama’n a kawm u ah, “Pawngbawl leh, diklo takin mi dangka la kiu inla, na lawh kham kham u a chun lung-awi un,” a ti a.

¹⁵Khutichun, mipite chuh kinem takin a um a, mi cheng cheng in Johan chuh Krista houh ahi die aw ti a a ngaihtuoh lai un.

¹⁶Johan in a kawm u ah, “Ken chuh tui in ka hun baptist na hiu a, himahlele, kei sanga lopi zaw hung ding ahi. A kengtawbek khau phel hâwi le ka hi puoi. Amah chun Thagau Thiengtho leh meia hun baptist ding ahi.

¹⁷A phuol zap thien na dingin, a khut in leipuk a chawi a, tichun, buh pang achun a buh khum intin, a si vang chuh mei mit ngeilo achun hâltum ina,” a ti a.

¹⁸Tichun, thugen dân chuom chuom in, Johan chun mipite kawmah Chanchin Pha chuh a sinsak sek a.

¹⁹Himahlele, leng Herod chuh, a suohpihpa zi Herodias ziek leh, a thil gilo hih cheng Johan in a hilhgaih ziekin,

²⁰a thilhih gitloh chengcheng behlap in Johan chuh suongkul ah a khum ta a.

²¹Chun, tihi ahi a, mi cheng cheng in baptistma a chan zawh phet uh chun, Isu’n le baptistma a chang ta a, a paucham lai in van a hung kihawng a,

²²tichun, Thagau Thiengtho chuh taksa pu’n, vakhu guolin a chungah a hung kum suk ta a. Tichun, van apat in aw a hung pawt a: “Nang ka Chapa deih tak na hi, na chungah ka kipâk mah mah hi,” a hun ti a.

²³Chun, Isu’n na a sep pat tûng lai khan, kum sawmthum vela upa ahi a. Amah chuh mite gel dân chun, Joseph chapa ahi a, zie pa chuh Heli cha ahi,

²⁴Zie pa chuh Matthai cha ahi a, zie pa chuh Levi cha a hi a; zie pa chuh Melki cha ahi a, zie pa chuh Jannai cha ahi a; zie pa chuh, Joseph cha ahi a.

²⁵Zie pa chuh Mattathia cha ahi a, zie pa chuh, Amos cha ahi a, zie pa chuh Nahum cha ahi a, zie pa chuh Esli cha ahi a; zie pa chuh Naggai cha ahi,

²⁶Zie pa chuh Maath chapa ahi a, zie pa chuh Semein cha ahi a, zie pa chuh Josak cha ahi a; zie pa chuh Joda cha ahi a;

²⁷Zie pa chuh Joanan cha ahi a, zie pa chuh Rhesa cha ahi a, zie pa chuh Zerubabel cha ahi a; zie pa Shealtiel cha ahi a, zie pa chuh Neri cha ahi.

²⁸Zie pa chuh Melki cha ahi a, zie pa chuh Addi cha ahi a, zie pa chuh Kosam cha ahi a, zie pa chuh Elmadam cha ahi a, zie pa chuh Er cha ahi.

²⁹Zie a chuh Joshua cha ahi a, zie pa chuh Eliezer cha ahi a, zie pa chuh Jorim cha ahi a, zie pa chuh Matthat cha ahi a, zie pa chuh Levi cha a hi a,

³⁰Zie pa chuh Simeon cha ahi a zie pa chuh Juda cha ahi a; zie pa chuh Joseph cha ahi a, zie pa chuh Jonam cha ahi a, zie pa chuh Eliakim cha a hi.

³¹Zie pa chuh Melea cha ahi a, zie pa chuh Menna cha ahi a, zie pa chuh Mattatha cha ahi a; zie pa chuh Nathan cha ahi a, zie pa chuh David cha ahi a,

³²Zie pa chuh Jessai cha ahi a, zie pa chuh Obed cha ahi a; zie pa chuh Boaz cha ahi a, zie pa chuh Salmon cha ahi a, zie pa chuh Nahson cha ahi a,

³³Zie pa chuh Amminadab cha ahi a, zie pa chuh Admin cha a hi a, zie pa chuh Ami cha ahi a, zie pa chuh Hezron cha ahi a, zie pa chuh Perez cha ahi a, zie pa chuh Juda cha ahi a,

³⁴Zie pa chuh Jakob cha ahi a, zie pa chuh Isak cha ahi a; zie pa chuh Abraham cha ahi a, zie pa chuh Nahor chapa Tera cha ahi.

³⁵Zie pa chuh Serug cha ahi a, zie pa chuh Reu cha ahi a, zie pa chuh Peleg cha ahi a; zie pa chuh Eber cha ahi a, zie pa chuh Shelah cha ahi a,

³⁶Zie pa chuh Kainan cha ahi a, zie pa chuh Arphaksad cha ahi a, zie pa chuh Shem cha ahi a, zie pa chuh Noah cha ahi a, zie pa chuh Lamek cha ahi a,

³⁷Zie pa chuh Mathusel cha ahi a, zie pa chuh Enok cha ahi a, zie pa chuh Jared cha ahi a, zie pa chuh Mahalalel cha ahi a, zie pa chuh Kainan cha a hi a,

³⁸Zie pa chuh Enos cha ahi a, zie pa chuh Seth cha ahi a, zie pa chuh Adam cha ahi a, zie pa chuh Pathien cha ahi.