Read Gangte LUKE 7 Bible Online

LUKE 7 - Gangte bible

LUKE 7

¹Chun, mipite kawma zie thil haw cheng chuh a gen zawh phetin, Kapernaum khuo ah a chieh ta a.

²Chun, sepaih zalawiupa khat hi a suok deihtak a dam puoh a, a thi vang vang a.

³Tichun, Isu chanchin a het phetin, a suok hihdam dinga ngên dingin Juda upahaw a sawl a.

⁴Amau haw chuh Isu kawmah a va chieh u a, phachuomngai takin a ngên u a, “Amah hi na panpih kilawm tak ahi,

⁵ka mipiteu a hehpih a; ka kikhawpna In u le ei sak sak ahi,” a tiu a.

⁶Khutichun, Isu chuh a kawm u ah a chieh ta a. Chun, In a tun ding kuon cha chun, sepaih zalawiupa chun a kawmah mi a sawl a, “Hepu, hung kisubuoi dah mai in, ka In sung na lutna hâwi a hi puoh a,

⁷na kawma hung hâwi inle ka kihe puoi. Thu mai gen inla hi leh chin le, ka suok chuh dam zieng ina.

⁸Keile ka chunga miliente nuoia um ka hi a, ka nuoi ah sepaihte ka nei a. Khat kawma chuh, ‘Chieh in,’ ka tih leh a chieh sek a, a dang kawmah, ‘Hung in,’ ka tih leh a hung sek hi, ka suok kawma le, ‘Zie hih in,’ ka tih leh a hih sek hi,” a ti a.

⁹Chun, Isu’n zie thu a zak phet chun mak a sa mah mah a, a kihei a, mipi amah zuite kawm achun, “Ka hilh na hiu hi, zie bang lâwm lâwma taksanna nasa hi Israel te lak ah ka mu kha puoi,” a ti a.

¹⁰Tichun. a misawlte chuh In ah a vaikit u a, a suok chuh dam in a mu tau hi.

¹¹Chun, zie nung chawmkhat zawh chun, Isu chuh khawpi khat Nain kiti achun a chieh a, a sinsakte leh mipi nasatak inle a a kitawnpih u a.

¹²Khawpi kulh kawtkhak a tuntun chun, mithi zawn a hung kizawt dawk u a. Amah chuh a nu chapa neihsun ahi a, zie nu chuh meithai a hi a, khawpi apat mipi tamtak le a kawmah a um u a.

¹³Chun, LALPA chun meithai chuh a muh phetin, a lunggil chun a lainat mah mah ta a, tichun, a kawmah, “Kap ki’n,” a ti a.

¹⁴Tichun, a va naih a, lang chuh a khawih a, a zawnte chuh a ding tau a. Ziephet chun, Isu’n, “Tangval, tho ah, ka hun tii!” a ti a.

¹⁵Khutichun, mithi chuh a hung tho dawk a, a hung pau ta a, tichun, Isu’n a nu kawm achun a pie kit ta a.

¹⁶A bawn u chun lauhna a dim in, Pathien a pakcha tau a, “I lak u ah thiemgau lopitak hung um ahi ta hi,” a tiu a. “Pathien in a mite a hun tawh ahi ta hi!” a tiu a.

¹⁷Chun, Isu chanchin chuh gamsung chengcheng leh a kiengvêl gamtin ah a kithang suok ta a.

¹⁸Chun, sinsakte chun zie thu haw chengcheng chuh Johan a hilh u a. Tichun, Johan in a sinsakte nih a sama,

¹⁹LALPA kawm achun a sawl a, “A hung ding kiti chuh na him, awleh mi dang ka na ngâk nalai ding um?” ti’n.

²⁰Ziete haw chuh Isu kawm a tun phet un, a kawmah, “Baptist Johan in, ‘A hung ding kiti chuh na him, awleh, mi dang ka na ngâk nalai ding um?’ ti a dawng dinga na kawma ei sawl ka hiu,” a tiu a.

²¹Zie lai tak chun Isu’n mipi tamtak natnate chuh a hihdam a, natnate leh, thitha matte leh, mitdûk tamtak le a mit uh a hihvak sak a.

²²Chun, Johan mi sawlte chuh a dâwng a, a kawm u ah, “Chieh kit tau inla, na thil muh teu leh zakteu cheng hi Johan va hilh un: mitdûkte chun khuo a mu thei tau a, kêngbâite le a chieh thei tau a; phâkte le sukthientho in a um tau a, bengngawngte’n le khuo a za thei tau a, mithite le kaihthawh in a um tau a, mi chagahte kawma le Chanchin Pha chuh gen ahi tai.

²³Chun, kuole ka chanchin ginlahna neilote chuh mi hampha ahiu hi!” ti’n a gen a.

²⁴Chun, Johan sinsakte chuh a chieh nung u chun, Isu’n mipite kawm achun Johan chanchin a gen a: “Bang en dinga gamthip a chiehdawk na hiu hi? Luong huih mût lîng maw?

²⁵Ahihloh leh, bang en ding pên a chiehdawk na hiu hi? Mi kicheina puon silh mawh? Ngaiun, zie tawbang puon lopi silh leh, nuomsate chuh leng In ah a puo a um sek uh.

²⁶Bang en ding pên a chiehdawk na hiu hi, ei hilh un? Thiemgau mawh? Ahi a dik hi, thiemgau sanga lopi zaw ahi.

²⁷Ngaitie, ka sawlchak na masangah sawl ing ka ting; Amah chun na ma ah na lampi siem ina,” ti a a chanchin a gen kha amah hi ahi.

²⁸Chun, Isu mah in, “Ka hilh na hiu hi, numei hinthak laka chun Johan sanga lopi zaw a um puou hi. Himahlele, Pathien gama mi neu pên le, amah sang chun a lopi zawu hi,” a ti kit a.

²⁹Chun, a thugen zate cheng leh siehdawlte chuh Johan baptistma a na changsa ahiu a; Pathien thiem a chan ui.

³⁰Himahlele, Pharisaite leh Danthuzikte chuh baptistma a chang nuom puou a, Pathien in amau dinga a lemguot sak chuh a niel tau hi.

³¹Khutichun, Isu mah in, “Tulai khangthakte hi bang tawh ka tehkal ta die leh? Bang tawbang hile ahiu em?

³²Chapang, dawl muna chu a, ‘Châmngai ka hun mût sak u a, na lam ngâl puou a, hah kah in ka kap u a, na kap ngâl puou a,’ ti a ki-uou tuohte guol hi ahiu hi.

³³Baptist Johan chuh a hung a, chângthâk a ne puoh a, uain le a dâwn diek puoh a, himahlele, nanghaw’n ‘Thitha zawl nei ahi hi,’ na tiu a.

³⁴Mihiem Chapa a hung a, a ne’n a dâwn a, nanghaw’n, ‘Entiem u, an heh pa, uain heh pa, siehdawlte leh migilote guolpa khuh!’ na ti zel u a.

³⁵Abang hitalele, chitna chuh a chate cheng chengin thiem a chan ui,” a ti a.

³⁶Chun, Pharisaite laka mi khatin a In a an ne dingin a chiel a. Tichun, a lut a, an ne dingin a chu ta a.

³⁷Chun, ngaitie, zie khawpi achun, numei gilo tak khat a um a. Isu chuh Pharisai pa ina chun an ne dingin a chûi tih a het phetin, alabasta bawm in thau gimlim a hun chawi a,

³⁸A sika a kêngpêk bul achun kap kawmin a ding a, a kêngpêk chuh a mitthi tui in a hih chek a. Tichun, a kengpekte chuh a sam in a thiekhul sak a, a châwp a, thau gimlim chuh a sunkhum ta a.

³⁹Chun, a chiel pa Pharisai chun zie chuh a muh phetin a lungthim in, “Zie pa hi thiemgau a hih chun, a khawih nu hi kuo ahi a, bang tawbang mi ahih a het kilawm ahi a, migilo ahi ngâla” a ti a.

⁴⁰Isu’n a kawmah, “Simon, na kawmah thu kamkhat gen ding ka nei hi,” a ti a, chun amah chun, “Gen ta leh, Sinsakpa,” a ti a.

⁴¹Ziephet chun, Isu’n, “Dangka palâk sakpa kuo ahim in leiba nih a nei a, khatin makhai zanga a ba a, khatin sawmnga.

⁴²himahleh, khatzawksang chun le a din kit thei ta puou a, a nih u chun a ngaidam gel ta a. A kuo zaw chun amah chun a lungsiet zaw ta ding u leh?” a ti a.

⁴³Simon chun a dâwng a, “A ngaihdam tam zawk pa chuh hi dingin ka gingchâi,” a ti a. Isu’n a dâwng a, “Simon, na gen dik hi,” a ti a.

⁴⁴Tichun, numei lam chuh a nga a, Simon kawm achun, “Zie numei hi na mu? Na In ah ka hunga, nangin ka keng silna ding tui nei pie puoh a; himahleh, amahnu hin a mitthi-tui in ka kêngpêk a hih chek a, a sam in a thiekhul kit hi.

⁴⁵Nangin châwp le nei châwp puoh a, amahnu hin vang ka hung apat tu tieng hin ka kêngpêk châwp a hai nai puoi.

⁴⁶Nangin ka luchang nuh ding thau nei pie puoh a, amahnu hin chuh ka kêngpêk thau gimlim a nuh hi.

⁴⁷Zieziekchun, lungsietna nasatak a suklat hin, a gitlohna tamtak chuh ngaihdam ahi tai tih a sulang hi, tih ka hun hilh na hi, Kuole, tawmcha ngaihdama um ta chun, lungsietna tawmcha a sulang sek hi,” a ti a.

⁴⁸Chun, Isu’n numei kawma chun, “Na gitlohna chengcheng ngaihdam ahi tai,” a ti a.

⁴⁹Tichun, a ankuong ûmpihte chun, “Gitloh nasan ngaidam hi kuo ahi die” a kitiu a.

⁵⁰Himahlele, Isu’n numei kawm achun, “Na taksanna hin a hun hukdam ahi, lungmuong takin chieh ta’n.” a ti. a.