Read Gangte LUKE 9 Bible Online

LUKE 9 - Gangte bible

LUKE 9

¹Chun, Isu’n sinsak sawm le nih te chuh a sam khawm a, thitha chengcheng chunga thilhih-theihna leh thuneihna leh, natnate hihdam theihna a pie a.

²Tichun, Pathien gam thu gen ding leh damlote hihdam dingin a sawl dawk ta a.

³Tichun, a kawm u ah, “Zinna a dingin tiengkhut ahim, sakhau ahim, chângthâk ahim, dangka ahim, puonâk thuoh ahim le keng kiu in.

⁴Khawiale, na lutna tâk u achun tung den unla, chun, zie mun apan mah chun kipandawk un.

⁵khawiale, mi’n a hun na lawp loh u chun, zie khawpi chuh taihsan unla, amau haw hetsakna dingin na keng u a leivui chuh tatthau in,” a ti a.

⁶Tichun, sinsakte chuh a chieh tau a, khuo tin ah a zin viel u a, Chanchin Pha a gen zel u a, muntin ah mite a hihdam zel tau a.

⁷Chun, leng Herod in zie thil haw cheng chuh a na het phetin, a lungzîng mah mah ta a, a ziek chuh, mi khenkhat in, Baptist Johan kha a hung hingkit ahi tai, a tiu a,

⁸abang in, Elija a hung kilak ahi ta hi, a tiu a, abang in, Malaia thiemgau kuo ahim tho kit ahi, a tiu a.

⁹Herod chun la, “Johan chuh a lu ka tan kha hi ta a, himahleh, hitibang lâwm lâwma a chanchin ka zak hi kuo a hi?” a ti a. Khutichun, amah chuh muh a guo ta a.

¹⁰Chun, sawlchakte chuh a hungkit u a, a thilhih cheng teu chuh Isu a hilh tau a. Amah chun amau haw chuh a pui a, Bethsaida khuo a tih uh a chun a chieh chuom tau a.

¹¹Himahlele, mipite chun zie chuh a het phet un, amah a zui tau a, Amah chun amau haw chuh a na lawp a, Pathien gam thu a kawm u ah a gen a; hihdam ngai taphawtte chuh a hihdam ta a.

¹²Chun, nisa a tum ding kuon in, sinsak sawm le nih te chuh a hung u a, a kawmah, “Mipite hi I kiengvêl u a khuo haw leh lo haw akhun nek ding leh giehna ding a muh theihna dingun sawl ta, zie tak hi gamthip ahi ngâl a,” a tiu a.

¹³Himahleh Isu’n a kawm u ah, “Nangmau in nek ding pieu in,” a ti a. Chun, amau chun a kawmah, “Zie mipi chengcheng nek ding hi I va châwk loh u chun, chângthâk pêk nga leh nga nih mai ngâllo chuh bangmah I nei puoh ngâl u a” a tiu a.

¹⁴Pating chiet le sangnga vel ahi ngâl u a. Isu’n a sinsakte kawmah, “Mipite chuh a lawi lawi in, sawmnga vel ahim chietin chut sak un,” a ti a.

¹⁵Khutibang chun a hih u a, a chut sak zawh phet un,

¹⁶Isu’n chângthâk pêk nga leh, nga nih chuh a la a, van lam en in, vang a pie a; a hekphel a, tichun, mipite kawma hawp dingin sinsakte kawm achun a pie a.

¹⁷Tichun, a bawn un a neu a, a vah chiet tau a, a nekval hawu chuh pâlbâwm sawmlenih a luok dim u a.

¹⁸Chun, tihi ahi a, Isu amah chauh a a paucham lai in, sinsakte chuh a kawmah a hung u a, amah chun a kawm u ah “Mipite’n kuo ahi ei tiu hi?” ti’n amau haw chuh a dawng a.

¹⁹Amau chun a kawmah, “Baptist Johan ahi a hun tiu a, khenkhat in, Elija ahi a hun tiu a; khenkhat in, malaia thiemgau kuo ahim thokit ahi a hun tiu hi,” a tiu a.

²⁰Chun, amah chun a kawm u ah, “Nangun kuo ahi nei tiu hi leh?” a ti a. Peter in a dâwng a, “Pathien Krista chuh na hi,” a ti a.

²¹Chun, Isu’n zie thu chuh kuomah kawma gen loh ding a ti chak kêi a.

²²Chun, a kawm u achun, “Mihiem Chapa hin nasatak in thuok intin, upate, thiempu liente leh dân sinsakte deih loh in um intin, thah a um ding ahi a, ni thum ni leh kaihthawh a um ding ahi,” ti’n a gen a.

²³Chun, amah mah in a bawnu a kawmah, “Kuo’n le ei zuih a nawp chun, amah gimtheih khawksa lo in, ni chengin a kross pu’n ei zui heh.

²⁴Kuole, a hinna humbit nuom ta’n chân intin, kuole kei zieka a hinna cha’n ta chun, zie mawng chun humbit ina.

²⁵Mi’n vannuoi pumpi hi nei hen la, himahleh, amah leh amah kisumang in ahim, kisusie henla hileh, amah dingin banga phachuom ding?

²⁶Kuole, keimah leh ka thu zahpih ta chuh, Mihiem Chapa hin a lopina tawh, a Pa lopina tawh; a vânsâwlchâk thiengthote lopina tawh a hung tieng chuleh, zie pa chuh hun zahpih ina.

²⁷Diktaka ka hun hilh na hiu hi, taka ding haw abang hi, Pathien gam a muh masangsieh u chuh thihna tep lo ding a um ui,” a ti a.

²⁸Chun, tihi ahi a, zie thu haw a gen nung ni giet hal vel chun, Isu’n, Peter te, Johan te, Jakob te chuh a pui a, paucham dingin tâng achun a chieh to u a.

²⁹Chun, a paucham lai in, a mel put zie chuh a hung danglam ta a, a silhlechen haw chuh hung vam in, a te sulsul zieng ta a.

³⁰Chun, ngaitie, mi nih amah tawh a kiho u a, zie te chuh Mosi leh Elija ahiu a,

³¹a van lopinau tawh kithuom a, Jerusalem a a thihna suguitung pai ding ahih dante a genkhawm u a.

³²Himahleh, Peter leh a guolte chuh a ihmut uh a suok mah mah a; chun, a hung halhdawk phet u chun, Isu lopina leh a kienga mi nih dingte chuh a muu a.

³³Chun, ziete chun Isu a taihsan ding kuon u chun, Peter in Isu kawmah, “Sinsakpa, kei u dingin taka I um u hi a phai; bâwkcha thum khawh ka tingun, nanga dingin khat, Mosi dingin khat, Elija dingin khat.” a ti a. A thugen chuh bang a hih le a he taktak puoi.

³⁴Chun, zie thu haw chuh a gen lai takin mei a hung zinga, amau chuh a hun lieh ta a; mei a a lut lai u chun sinsakte chuh a lau tau a.

³⁵Chun, mei lak apat chun aw a hung pawt a, “Ziehi ka Chapa, ka tel pa chuh ahi, amah thu ngaiun!” a hun ti a.

³⁶Chun, aw gi chuh a thip phetin, Isu chauh chuh a mu tau a. Tichun, a thip kêi u a, a thil muh u chuh kuomah a hilh puou ui.

³⁷Chun, a zing kit chun, Isu leh sinsak thum te chuh tâng apat a hung suk phet un, mipi nasatak in a na muok u a.

³⁸Chun, ngaitie, mipi lak apat chun mi khat a kiko a, “Sinsakpa, ka chapa en dingin ka hun ngên hi, ka chapa neihsun a hi ngâl a.

³⁹Ngaitie, thitha’n a man sek a, thakhat khatin a kiko dawk seka, chilphuon kai hielin a sawisa sek a, nasa taka suthidup in a taihsan sek hi.

⁴⁰Chun, na sinsakte kawma ei nawhdawk sak dinga ka nget le la, a nawhdawk thei ngâl puou a.” a ti a.

⁴¹Chun, Isu’n a dâwng a, “Nang haw, khangthak taksanna neilo leh lochalte haw, bang chana na kawm u a ka um a, ka hun hungaih theih ding?” Chun, mipa kawma chun, “Na chapa chuh zie hin hun pui ah,” a ti a.

⁴²Zie naupangpa chuh a hung lai in, thitha chun tuol sehna’n a nei a, a sawisa diek a. Himahlele, Isu’n thitha buok chuh a gai a, chapang chuh a hihdam a, a pa kawm achun a sawl kit ta a.

⁴³Khutichun, mi cheng chengin Isu thilhihte mak sa taka a um zing lai u chun, a sinsakte kawmah,

⁴⁴“Tu a ka thu hun hilh ding hi hengilh hiel kiu in! Mihiem Chapa hi mihiemte khuta matsak a um ding ahi,” a ti a.

⁴⁵Himahlele, a sinsakte chun a thugen chuh bang a genna ahih a he puou hi. A het theih loh ding u a kisel hih ziekin, zie thu chuh amah la a dawng ngam ngâl puou a.

⁴⁶Chun, “I laku ah kuo a lopipen die?” ti’n ana kiniel u a.

⁴⁷Himahleh, Isu’n a ngaihtuoh hawu chuh a he a, chapang khat a kai a, a sik ah a din sak a,

⁴⁸a kawm u ah, “Kuole, ka min zieka zie chapang cha hi lawp ta chuh kei ei lawp ahi; kuole, kei ei lawp ta chuh ei sawlpa lawp hi’nau. Na bawn u a laka a neupen chuh a lopipen ahi,” a ti a.

⁴⁹Chun, Johan chun, “Sinsakpa, kuo ahim khat na min a thitha nawhdawk ka muu a, himahlele, keihaw laka tel a hih loh ziekin ka khap tau a puo,” a ti a.

⁵⁰Isu chun a kawmah, “Khap kiu in, kuole, nang haw hun dodil lo taphawt chuh nang haw lama pang ahi,” a ti a.

⁵¹Chun, tihi ahi a, Isu chuh van a laktoha a um ding phat a hung naih phetin, a lungthima kiguo’n, Jerusalem a chieh dingin a kipan dawk ta a.

⁵²Khutichun, a masanga mi a sawl masa a, amah dinga thil bangakai a na guonggalh tup masa dingin, Samari khuo achun a chieh sak a.

⁵³Himahleh, amah chuh, Jerusalem a chieh ding guola a kilat ziekin a na lawp puou a.

⁵⁴Zie chuh sinsak Jakob leh Johan chun a het phet un, “LALPA, ziehaw sukmangthaina ding hin, van apat in mei sam tha leng na nuom em?” a tiu a.

⁵⁵Ziephet chun, Isu chuh a kihei a, amau chuh a gai a. Bang tawbang lungthim nei na hih uh kihe lo na hiu hi.

⁵⁶Mihiem Chapa hi mihingte hinna sumangthai dinga hung ahi puoh a, amau haw hukdam dinga hung ahi zawi, a ti a. Tichun, khuo dangah a chieh tau hi.

⁵⁷Chun, tihi a hung hi a, lampi a a chieh lai un mi khatin Isu kawmah, “Na chiehna taphawt ah hun zui ing ka,” a ti a.

⁵⁸Isu’n a kawmah, “Si-âlte’n kuo a nei u a, chung leng vachate’n le bu a nei ui, himahlele, Mihiem Chapa hin vang lungakna a nei puoi,” a ti a.

⁵⁹Midang khat kawmah, “Ei zui ah,” a ti a. Himahleh, amah chun, “LALPA, ka pa va vui tadih ing ka,” a ti a.

⁶⁰Isu’n a dâwng a, “Mithi chun amau mithi a na kivuih u he’n, nang chieh inla, Pathien Gam thu va gen zak ah,” a ti a.

⁶¹Chun, mi dang khat inle, “LALPA, hun zui ing ka, amahvang chuh, ka inkawte kampha’n nei thak sak tadih ah” a ti a.

⁶²Chun, Isu’n a kawmah, “Kuole, lo kaihna a khut chawla, nung lam en kit chuh, Pathien gam mi hi hâwi ahi puoi,” a ti a.