Read Gangte DAN NIHNA 1 Bible Online

DAN NIHNA 1 - Gangte bible

DAN NIHNA 1

¹Ziehaw hi Jordan suohlam a gamthipa a um lai u a, Paran leh Tophel leh Laban leh Hazeroth leh Dizahab, kikala um, Suph tawh kigalchan, Arabah a a um lai u a Mosi’n Israel mite chengcheng kawma a thugen chuh ahi.

²Horeb tâng apat in Kadesh-barnea chuh, Seir tâng lama lampi chuh hawh in, ni sawm leh ni khat lam ahi.

³Chun, Aigupta a nutsieh nung uh kum sawmli a tin kum a tha sawm leh tha khatna ni khat ni chun LALPA’n Israel mipite hilh dinga thu a piek chengcheng chuh Mosi’n a kawm u ah a gen ta a;

⁴Heshbon a um, Amor te lengpa, Sihon leh Edrei leh Ashtaroth a um, Bashan lengpa Og chuh a thah zawh nung in,

⁵Jordan suohlam a Moab gama a um lai un zie dân hi Mosi’n a phuong pan ta a,

⁶“Horeb tânga I um lai u khan LALPA I Pathien un I kawm u ah, ‘Zie tânga hin na um sawt hun tawk tau a.

⁷Kisau inla, kichawn unla, Amor te tâng gam leh a kimvela gam um chengcheng, Arabah ah, tâng gam haw leh phaigam haw ah, simlam gam haw leh Kanaan mite umna Mediterranean Tuipi pang haw leh Lebanon ah, lui lien tak, Euphrates luipi chanin, chieh zel un.

⁸Ngaitiem u, zie gam chuh ka hun piek sa ahi tai: na pileputeu Abraham leh Isak leh Jakob te leh a nung u a a suonteu kawma pie dinga LALPA kihâksiel na gam chuh va luoh tau in,’” ti’n.

⁹Chun, zie lai khan na kawm u ah, “Kei mai in nanguh ka hun paw zo puoh a,

¹⁰LALPA na Pathien u chun a hun supung a, ngaitiem u, tuhin na tam lam u chuh van a aksi zah hiel na hung hi tau hi.

¹¹LALPA, na pileputeu Pathien chun tu a sang hin aleh sang tam takin hun supung hen la, a hun na tiem guol ngêi in, hun vangsak ta hen.

¹²Bangti’n kei mai in na buoina teu leh na puokgikteu leh na kinîknonateu chuh ka paw zo dem?

¹³Na phung cheng u apat in miching, lemhe leh thil chin he hung kitel dawk unla, na chung u a lawiupa’n siem ing ka,” ti’n ka hun na hilh ta a.

¹⁴Chun, nangun, “Na thugen chuh kei u dingin a pha mah mah hi,” ti’n nei dâwng u a.

¹⁵Khutichun, na nam sung u a lawiupate chuh ka pawm a, na phung hawu lak apat a miching, thil chin he haw chuh na chung u a vaihawm dingin ka siem a, sang chunga vaihawmte, za chunga vaihawmte, sawmnga chunga vaihawmte, sawm chunga vaihawmte leh hotute le.

¹⁶Chun, zielai chun na vaihawmteu chuh, “Na suohpih teu thubuoi chuh ngaihthak sak unla, Israel mi leh Israel mi kal thu hi henla amau leh na lak uh a chêng gamdang mi kal thu hilele diktakin khen sak un.

¹⁷Vaihawmna ah deihchuom na neih dinguh ahi puoi; mi neu leh milien thu le langpanna neilo a na ngaihthak sak dinguh ahi; kuomah na lauh dinguh ei puoi; vaihawmna chuh Pathien a ahi ngâl a; nang u dinga thu haksa taluo chuh ka kawmah hun tun sek in na tin un, chun, zie chuh ken a na khen sak ing ka,” ti’n thu ka pie a.

¹⁸Chun, thil dang na hih ding dân u le zielai chun ka hun sinsak vek ta kha.

¹⁹Chun, LALPA I Pathien un thu ei piek guolin Horeb tâng apat chun I pawt u a, Amor te thingtâng gam lampi a gamthip zatak leh lauh-um tak na muh u kha I hawhpai u a, khutichun, Kadesh-barnea chuh I hung tung u a.

²⁰Ziephet chun, na kawm u ah, “LALPA I Pathien un ei piek Amor te thingtâng gam chuh na hung tung tau a.

²¹Ngaitiem u, LALPA na Pathien un gam chuh a hun pie chienkei ta a; chieh to unla, LALPA na pileputeu Pathien in a na gen tâk guol khan va luoh un; lau kiu inla, lungkie hiel kiu in,” ka ti a.

²²Ziephet chun, na bawn un ka kawmah na hung u a, “A gam chuh a gûka va enviel a, I chieh tohna dinguh lampi leh I va chiehna dinguh khaw chanchin haw ei hung hilh kit dingin I mau ah mi sawl leuhing,” na tiu a.

²³Zie chun ei sukipak mah mah a; khutichun, na lak uh a mi sawmlenih, phung khata khat chiet ka teldawk a;

²⁴Khutichun a kipan u a, tâng achun a kalto u a, Eshkol guom a va tung u a, a tawhleng suok kêi u a.

²⁵Zie gama theigah chuh a khut un a hun lo u a, I kawm u ah a, hun paw suk u a, “LALPA I Pathien un ei uh ei piek gam chuh gam phatak ahi,” ti’n chanchin ei hilh u a.

²⁶Ahih ziekin, na chieh to nuom puou a, LALPA na Pathien u thupiek chuh kalh in na hel tau a;

²⁷na puon-In hawu achun na phun na chiek u a, “LALPA’n ei uh ei hawt zieka Amor te thah chimit dinga a khut u a piek dinga Aigupta gam apat ei puih dawk ahi.

²⁸Khawilam zuon I hitau hileh? Ka suohpihteu in, ‘Mi haw chuh eihaw sangin a lienzawu a, a sang zawu a; khuo haw chule lien tak tak, van dawt hiel hiela sang kulh nei ngencha ahiu a, chun Anak suonte le ka muu hi,’ ti’n ei sulungkieu a,” na tiu a.

²⁹“Ziephet chun, ken na kawm u ah, ‘Amau haw chuh huphulh kiu inla, lauh le lau himhim kiu in.

³⁰Na makai uh LALPA na Pathien u chun na mitmuh ngêi u a Aigupta gama a hih guol mah khan hun dopih intin,

³¹mi’n a cha a puok guola gamthip a le LALPA na Pathien un zie mun na tun chan u a, lam tungtawna, a hun puok dân kha na mu tau khala,’ ka ti a.

³²Ahihziekin, zie sasa chun le LALPA na Pathien u chuh na taksang nuom puou a,

³³Na masang u a chieh na puon-In zakna dingu hun hawldawk sak, na lampiu hun kâwkmuh dinga zan leh meikuong a sun leh meipi a hun pui pa chuh ahi ngâla.

³⁴“LALPA’n na thu gen u chuh a het phatin a lungna a,

³⁵‘Zie khang gilo tak laka khatcha hin le na pileputeu piek dinga ka na kihâksiel khum gam phatak chuh mu hiel puo’n au,

³⁶Jephuneh chapa, Kaleb, tih loh ngâl chun; amah hin chuh mu’n a; amah leh a suonte chu vang a kenga a tawhna gam chu pie’ng ka, ama’n LALPA chuh a lungthim cheng chenga a pawm det kei ziekin,’ ti’n a kihâksiel ta a.

³⁷Nang haw ziekin kei chung ale LALPA chuh a lungna a, ‘Nang hi le zie chun lut puo’n na tin:

³⁸Nang hun kithuohpih, Nun chapa, Joshua hi chuh lut ina; amah hi tîlkhoh in la, amah hin Israel te chuh bit taka puilut ding ahi.’

³⁹“Na chaneu hawu, gâlmat ding phet, na tih hawu leh tu a asie apha le he nailo na chateu hi lut in au, amau chuh pie’ng ka ting, luoh un au.

⁴⁰Nang haw vang chuh kinunghei unla, Tuipi San lam ah gamthip ah chieh zieng uh, a ti a.

⁴¹“Ziephet chun, nangun, ‘LALPA chungah thil ka na hihkhiel tau hi, va chieh to ing ka ting un, LALPA ka Pathien un thu ei piek guolin va do ing kau,’ ti’n nei dawng u a. Khutichun, zie tâng gama va chieh toh chuh thil baihlam ten dinga gingcha’n na kigalvan chiet tau a.

⁴²“Ahihziekin, LALPA’n ka kawmah, ‘Chieh to kiu inla, va do se kiu in; na lak u ah ka um puoh ngâl a, na melmateu chun hun na sulum kha’n au, a kawm u ah tih,’ ei ti a.

⁴³Zie chuh ka hun hilh a; na pawm diek puou a, LALPA thupiek chuh na helsan zaw tau a, tâng achun na chieh to teitei tau a.

⁴⁴Zie tânga um Amor te chun a hun na do u a, khuoi hawn mi delh bang mai in a hun na delh u a: Seir apat Hormah chanin ahun that zel tau a.

⁴⁵Chun, na hung vaikit u a, LALPA ma achun na kap u a, ahih ziekin, LALPA chun na awu chuh a ngaitha nuom puoh a, a bil le nang u lam ah a dawh nuom ta puoh a.

⁴⁶Khutichun, zie taka na va um sung u chuh ngaihtuoh in, Kadesh achun sawt tak na um u a.