Read Gangte DAN NIHNA 11 Bible Online

DAN NIHNA 11 - Gangte bible

DAN NIHNA 11

¹Zieziekchun, LALPA na Pathien u chuh na hehpih un a thilphut haw, a dân haw, a vaihawm haw leh a thupiek haw chuh na zuih zing dinguh ahi.

²Tuni hin heu in; LALPA na Pathien u thununna haw, a thupi zie haw, a khut hattak leh a bân zak chuh,

³melchikna haw, Aigupta gamsung a Aigupta lengpa Pharaoh chung leh a gamsung chengchenga a thilhih haw,

⁴Chun, Aigupta sepaihte leh a sakawl u leh a kangtalai hawu chunga a thilhih haw; a hun delh lai u a Tuipi San in achup lup sak dân haw, tu chana LALPA’n a sukmangthai dân haw;

⁵Zie mun na tun masangsieh u a gamthip a na chungu a a thilhih dân haw;

⁶Reuben chapa Elkiab chapa Dathan leh Abiram chunga a thilhih dân haw; lei in a kam a kat a Israel mite chengcheng lak apat amau leh a inkawteu leh a puon-In hawu leh a gancha puih chengcheng uh a valh zawh vek dân haw helo na suonteu kawma gen ka hi puoh a;

⁷Na mit ngêi u a LALPA’n thil lopi taktak a hih chengcheng mute na hi zaw ngâl u a.

⁸Zieziekchun, na hung hât u a, luoh dinga na zawtnau gam chuh na luoh theihna dingun leh,

⁹Bâwngnawi leh khuoizu luonna gam na pileputeu leh a suonteu piek dinga LALPA kihâksielna gama chuh na damsawt theihna dingun tu a thu ka hun piek, thupiek chengcheng te hi na zuih dinguh ahi.

¹⁰Na va luoh dinguh gam chuh na hung pawtnau Aigupta gam, huon a thaichi na chîn u a, na kenga tui na buok seknau ancheh-lohing huon tawbang khah ahi puoh a;

¹¹Himahleh, na va luoh dinguh gam chuh tânghaw leh guom haw um na, van guoh tui in a chawm gam ahi zawi.

¹²LALPA na Pathien un a etkawl gam ahi a: LALPA na Pathien uh mit chukna ahi a, kum bul apat kum tâwp chanin a entha zing ahi.

¹³Chun, hiti hi hi’n tin, LALPA na Pathien u chuh hehpih ding leh na lungthim chengcheng u leh na ngaihtuohna chengcheng u a na sem dinga ka thupiek tu a ka hun piek hi phachuomngai taka na zuih u chun,

¹⁴na gam u chuh a hunbi zel ah, guohtui kie masa leh guohtui kie nunung chuh hun pie’ng ka ting, khutichun, na buh hawu, uain hawu leh na thau hawu lakhawm thei inlau.

¹⁵Na ganchateu dingin le na gam u ah hampa keh sak ing ka ting, khutichun, neklechâk buting in na tin un, tai takin um inlau.

¹⁶Chingthei takin um un, khutilochun, na lunggil u chuh thep in um intin, petmang in, pathien dang haw na sema ho in um kha’n lau.

¹⁷A khutih chun, na chungu ah LALPA lungnatna kuong intin, van chuh khak bit intin, guoh zu ta puo’n tin, lei in a gahsuoh ta puo’n tin, khutichun LALPA hun piek gam phatak apat hin mangthai pai zieng ding na hiu hi.

¹⁸Zieziekchun, zie ka thu haw hi na lungthim u leh na ngaihtuohnau ah khum unla, melchikna dingin na ban u ah khitdên unla, na mit kikal na chalpâng u ah tat un.

¹⁹Ziehaw chuh na chateu sinsak unla, na In u a na chut lai un le, lampi a na chieh pet un le, na kuol tiengu lele, na thawh dawk tiengu lele ziehaw thu achu na holim dinguh ahi.

²⁰Chun, na kawtbieng hawu leh na kelkawt hawu a le na zik dinguh ahi:

²¹Khutichun, LALPA’n kihâksiela na pileputeu piek a guot gam achun na damsung niteu leh na chateu damsung nite chuh, lei chunga van a um sung chanin, behlap sak in um inlau.

²²Chun, LALPA na Pathien u chuh hehpih ding leh a lampi chengcheng hawh ding leh amah tudet zing dinga phachuomngai taka zie thu ka hun piek thupiek haw chengcheng hi na zuih phawt u chun.

²³LALPA chun zie nam chengcheng te hi na mau apat in nawhdawk intin, nang u sanga thupi zaw leh thilhih thei zaw namte gam chuh luoh inlau.

²⁴Na kêngpêk u a na tawhna taphawt u chuh nang u a hi’n tin, simlam a gamthip apat in mâllam a Lebanon tâng chanin, suohlam a Euphrates luipi apat in Mediterranean tuipi chanin na gam uh hung hi’n a.

²⁵Kuoma’n nanguh hun nang zo puo’n tin un; LALPA Pathien in na kawm u a a gen guol khan, na va tawh dinguh gam haw chengcheng chung achun nang u hun huphulhna leh lauhna umsak ina.

²⁶Ngaitiem u, tuni hin na mau ah vangsakna leh gâusapna ka kawih hi;

²⁷LALPA na Pathien u thupiek tu a ka hun piek haw hi na zuih u chun, nanguh a dingin vangsakna hi’n tin;

²⁸LALPA na Pathien thupiek uh haw hi na zuih loh u a, na hêtkhâk loh uh pathien danghaw na ho u a, chun, ka hun thupiek hi na petmangsan u chun chuh, nanguh a dingin gâusapna hiding ahi.

²⁹Chun, hiti hi hi’n tin, na va luoh dingu gama chuh LALPA na Pathien un a hun puihlut tieng leh Gerizim tâng achun vangsakna chuh phuong unla, Ebal tâng achun gâusapna chuh phuong un.

³⁰Zie tâng haw hi Jordan gal lam, tumlam a, Moreh phaicham haw kawma, Gilgal zawna, Jordan guom sunga cheng Kanaan mite gamsung a chuh um ahi puou maw?

³¹LALPA na Pathien un a hun piek gam chuh va luoh dinga Jordan chuh na kân dinguh ahi a, luoh in na tin un, zie chun cheng inlau.

³²Tuni a na mau a ka kawih, dân leh vaihawmna haw chengcheng hi zui dingin chingthei un.