Read Gangte DAN NIHNA 12 Bible Online

DAN NIHNA 12 - Gangte bible

DAN NIHNA 12

¹LALPA na pileputeu Pathien in a hun piek gam chuh na hun luoh u a, zie gama chuh na um sung cheng u a chingthei taka na zuih dinguh dân haw leh vaihawmna haw chuh ziehaw hi ahiu hi.

²Na va luoh dingu gama cheng nam haw chun tâng tin muol tin chung leh thingbawk tincheng nuoia a pathienteu na a sepna mun chengcheng teu chuh na suksiet suok kêi dinguh ahi

³a maichâm hawu chuh phieu inla, suong khuom zek a phuh hawu chuh khên gawp unla, a pathiennuu Aserah lim khuom haw chuh mei in hâl unla; a pathienteu lim siemkawm haw chuh sat chim unla, zie mun hawa a min u chuh na nawihmang dinguh ahi.

⁴Amau pathien ho dana hih LALPA na Pathien uh na ho dinguh ahi puoi.

⁵LALPA na Pathien un na phung chengcheng lak u a a Min umna dinga a guot ding mun chuh hawl zawu inla, zie a chuh na chieh u a,

⁶Na hâlmang thilpiekteu, na kithawihnateu, na sawma-khatteu, na pei thillat teu, na thutiem thilpiekteu, na ngamtawk thilpiekteu leh na bâwng hawn u leh na belam hawn lak u a pieng masapen haw chuh zie a chuh na hun chawih dinguh ahi;

⁷Zie achun LALPA na Pathien mau ah ne’n na tin un, na khut nasepteu LALPA na Pathien un a hun vangsakna zieka chuh na inkuonteu tawh kipâk taka na um dinguh ahi.

⁸Zie hun chuh a hung tun tieng leh tu a mi chengin eimau phasak dân chieta I hih guol u a hi na hih dinguh ahi puoi.

⁹LALPA na Pathien un a hun piek gam leh chawlhna chuh na tung nai puoh ngâl u a.

¹⁰Jordan lui chuh na kân u a, LALPA na Pathien un a hun luoh sak ding gama chuh na um u a, bit taka na um theihna ding u a na kimvel u a na melmateu chengcheng lak apat a hun chawlhdam sak tieng leh hiti hi hi’n tin,

¹¹LALPA na Pathien un a Min umna dinga a guot ding muna na hun chawih dinguh ka tih chengcheng chuh zie a chuh na hun chawih dinguh ahi, na hâlmang thilpiekteu, na kithawihnateu, na sawma-khatteu, na pei thilpiekteu, na neih lak u a phapen LALPA dinga na tiem hawu chuh;

¹²Chun, LALPA na Pathien mau a chuh kipâk taka na um dingu ahi, nang u leh na chapateu leh na chanuteu tawh, na suokpateu na suoknu teu tawh, na khuou a cheng Levi te tawh, amau chun na lak u ah chanvo leh gam a nei puoh ngâl u a.

¹³Na tuohkhakna mun mun u a na hâlmang thilpiekteu chuh pie mai zieng lo dingin chingthei un;

¹⁴Na phung lak u a khat pên pên gam apat LALPA’n a teldawk ding mun achun na hâlmang thilpiek hawu chuh pieu inla, zie chun thu ka hun piek chengcheng chuh a hih dinguh ahi;

¹⁵Ahih ziekin, LALPA na Pathien un vangsakna a hun piek dungzui in na ganchateu chuh na duhchak hun hun un na khuo sung chiet u a kithah in, a sa chuh ne thei in lau; mi buok leh mi thieng haw chun le sangai sa leh sakhi sa bangin ne thei in au.

¹⁶A thisan vang chuh na nek loh dinguh ahi; tui guola leituol a na sunthak dinguh ahi.

¹⁷Na buh u leh na grep tui u leh olive thau sawma-khat hawu leh na bâwngno u leh na belamno u pieng masapen haw leh na thutiem thilpiek hawu leh na ngamtawk thilpiek hawu leh na khutpei thilpiek hawu chengcheng chuh na khuou ah ne thei puo’n na tin un;

¹⁸LALPA na Pathien un mun ahun guot sak ding ah, LALPA na Pathien mau a nang u leh na chapateu leh na chanuteu tawh, na suokpateu leh na suoknu teu tawh, na khuou a um Levi te chuh tawh, na nek dinguh ahi zawi; na seplebawl teu chunga LALPA na Pathien mau a kipâk taka na um dinguh ahi.

¹⁹Na gam u a na chen lai chan u a Levi te chuh chuombawl lo dingin chingthei un.

²⁰Chun, LALPA na Pathien un a hun tiem guola na gam uh a hun keklet sak a, sa na hun utchak u a, “Sa ka duhcha na e,” na tih u leh, na hinnau in a utchak hun hun chun sa chuh ne thei in lau.

²¹LALPA na Pathien un a Min umna dinga a teldawk ding mun chuh nang u dinga a gamlat takluot chun, thu ka hun piek guol khan, LALPA’n a hun piek, na bâwng uh ahim, na belam uh ahim chuh that in na tin un, na sa utchak u chuh na In u a na nek dinguh ahi.

²²Sangai sa ahim sakhi sa ahim na nek bangin ne’n na tin un, mi buok leh mi thieng in le ne thei gêl gêl in au.

²³Thisan vang chuh ne lo dingin chingthei un; thisan chuh hinna ahi ngâla; hinna chuh sa tawh na nek khawm loh dinguh ahi.

²⁴Thisan chuh na nek loh hiel dinguh ahi; tui guola leituol a na sunthak mai dinguh ahi.

²⁵Na nek dinguh ahi puoi; khutichun, LALPA mitmuh in thil dik hih hi’n na tin un, nang u leh na nung u a na chateu a ding in hung pha ding ahi.

²⁶Na thil kawih thientho hawu leh piek dinga na tiemsa cheng u chuh chawiin, LALPA’n a teldawk ding mun achun chieh un;

²⁷chun LALPA na Pathien u maichâm achun na hâlmang thilpiek u chuh a sa leh a thisan pie’n na tin un; chun, na kithawihnau thisan chuh LALPA na Pathien u maichâm chung achun bunthau in na tin un, a sa chuh vang ne thei inlau.

²⁸Thu ka hun piek chengcheng hi khawk takin ngaiun, khutichun, LALPA na Pathien u mitmuha thilpha leh thil dik hih hi’n na tin un, nang u leh na nung u a na chateu dingin kumkhuo’n pha ding ahi.

²⁹LALPA na Pathien un na va zawh dinguh nam haw chuh na mau a a sukmangthai a, a gam uh na lâksak u a na luoh tiengu leh,

³⁰Na mau a sukmangthai ahih nung u a chuh amau guola sukmangthai na hih lohna dingun, “Zie nam haw hin a pathienteu na a bangti sep u a? A hihdan un ei un le hih hitiu,” ti a, a pathienteu chungchâng dawng viela na âwk lohna dingun chingthei un.

³¹Amau in a pathienteu a ho dân u a LALPA na Pathien u chuh na ho dinguh ei puoi; a pathienteu a ho tieng u leh LALPA ngaih a thil tenum tincheng leh a hawt lam tak haw chuh a hih sek u a; a chapateu a chanuteu ngêi chuh a pathienteu dinga meia a hâl sek ziekun.

³²Hih dinga thu ka hun piek chengcheng hi na hih dinguh ahi; na behlap dinguh ahi puoh a, na lâk khen dinguh le ahi diek puoi.