Read Gangte DAN NIHNA 15 Bible Online

DAN NIHNA 15 - Gangte bible

DAN NIHNA 15

¹Kum sagih a tin kum cheng leh ngaihdamna na siem dinguh ahi.

²Ngaihdam ding dân chuh hiti hi hi’n a: a thil mi bat sak taphawt in a invengteu a palâksak u chuh a ngaihdam dinguh ahi; a invengte le a unaute le a pawng bet ding ahi puoi, LALPA bat ngaihdamna chuh phuon ahih tâk ziekin.

³Nam chuom mite chuh hun dit dingin nawhsie thei inlau; ahihziekin, na thil uh bang hita leh na unau in a mat chuh na ngaihdam dinguh ahi.

⁴Ahih ziekin, na lak u a khat le gimthei in um puo’n lau (na LALPAU Pathien in luoh dinga a hun piek gam achun nasa taka hun vangsak ding ahi ngâla);

⁵tunia ka hun piek zie thupiek haw chengcheng hi zui dinga na chittheih u a, LALPA na Pathien thuu hi na zuih phawt u chun.

⁶LALPA na Pathien un a tiem guol ngêi in hun vangsak intin, nam tamtak te chuh palâksak in na tin un, nangun vang chuh palâk puo’n lau; nam tamtak chungah vaihawm in na tin un, nang u chunga vang chuh vaihawm puo’n au.

⁷LALPA’n a hun piek gamsung a na umnau a na unauteu laka mi gimthei a um u chun, na unau mi gimthei ding chun na lungthim khauhsak ki’n la, panpih lo in um ki’n.

⁸amau dinga chuh na tângphal tei tei dingu ahi a, a, taksapnau a dinga tingzo ding, na palâksak dinguh ahi zawi.

⁹Kingaihdam kum, kum sagihna chuh hung tung ding ei tai, ti a, na unau gimthei chuh mit phalo taka en a, bangmah pie nuom lo a, na lungthim u a ngaihtuohna phalo taktak a um lohna dingin chingthei un; khutilochun, na chung u a lungkim lo in LALPA a na sam intin, nang u dingin gitlohna hung hi khâna.

¹⁰Tangphal taka na piek teitei dinguh ahi, chun, na piek tieng u leh na lungthim uh giksak takin ahi lo ding ahi; zie tawbang thil ziek chun ahi LALPA na Pathien un na thilhih chengcheng u leh na khut nasep chengcheng u a a hun vangsak ding chuh.

¹¹Gamsung achun mi gimthei beih tik um lo ding ahi ngâla; ziezieka chuh, “Na gamsung u a um na unauteu chung leh tasamte chung leh na mi gimtheiteu chunga na tângphal teitei dinguh ahi,” ti a thu ka hun piek na hiu hi.

¹²Na unaute, Hebrai mi pasal ahim numei ahim na kawma zawk ahih a, kum gup na nau a sep tâk chun, kum sagih kum chuleh na pawtsak dinguh ahi.

¹³Chun, na pawtsak tieng u leh khut ngawn a na pawtsak dinguh ei puoi;

¹⁴Na belam hawn lak u a leh na buhphuol u a leh na greptui thawkna khuk u a haw chuh phal taka na piek dinguh ahi; LALPA na Pathien un a hun vangsak dân dungzui zela na piek dinguh ahi,

¹⁵Aigupta gama khan suok na hi tau a, LALPA na Pathien un a hun tatdawk na hiu hi tih hi na hetzing dinguh ahi; ziezieka chuh zie thu hi ka hun piek ahi.

¹⁶Chun, hiti hi hi’n tin, suok chun nang u leh na inkuon uh a ngaihnat ziek u leh na kihotheih ziek u a, “Ka hun nusieh nuom puoi,” a tih chak kêi u chun;

¹⁷Thik zum la’n na tin un, kawtkhak tawh a bilnah sun den in vit hawm in na tin un, khutichun, kumkhuo’n na suok un um ta’n au. Chun, na suoknu le zie tawbangmah achu na bawl dinguh ahi.

¹⁸Suok pawtsak chuh thil haksa a na ngaih dinguh ahi puoi. Kithalawhte sep lehnih sem in kum gup zet na nau a hun sepsak ta ngâl a; hiti a hi na hih u chun, LALPA na Pathien un na hih takphawt uh hun vangsak zel ina.

¹⁹Na bâwngno u leh na belamchal pieng masapen taphawt chuh LALPA na Pathien u chan dinga na piek dinguh ahi; bâwngchal pieng masapen chuh na sema na mat dinguh ahi puoh a, na belam suok masapen u chule a mul na met dinguh ahi puoi.

²⁰Ziehaw chuh nang u leh na inkuonteu in kum cheng leh LALPA na Pathien u ma a, LALPA’n mun a guotna dinga chuh, na nek dinguh ahi.

²¹Demkai, a kêngbâi ahim a mitdûk ahim, demkai taphawt chuh LALPA na Pathien u kawma kithawihna a na mat loh dinguh ahi.

²²Ziehaw chuh na chênna khuou a na nek dinguh ahi zawi; zeklechan thu a buok leh thiengte’n le sangai sa leh sakhi sa guolin ne thei gêl gêl in au.

²³Thisan chuh na nek loh hiel dinguh ahi; tui guola leia na sunthak zieng dinguh ahi.