Read Gangte DAN NIHNA 17 Bible Online

DAN NIHNA 17 - Gangte bible

DAN NIHNA 17

¹Bâwngchal ahim, belam ahim, demkai leh piensuolna nei himhim a LALPA na Pathien u kawma na kithawih dinguh ahi puoi; zie chuh LALPA na Pathien dingun thil tenum ahi ngâla.

²LALPA na Pathien un a hun piek na huongsung a na lak u a cheng pasal ahim numei ahim kuon le, a thuthun bawhsie a LALPA na Pathien u mitmuha thil phalo a bawla;

³Thu ka hun piek kalh a pathien dangte na a sep a, nisa ahim, thapi ahim, van lam thilte ho a;

⁴Zie chuh hilh na hih u a, na hun het u a, phachuomngai taka na dawt viel u a, chun ngaitie, a na dika, a kichet keia, zie tawbang thil tenum chuh Israel te laka hih a na hih taktak chun;

⁵Zie thil phalo hihpa ahim hihnu ahim chuh na khaw kulh pawlam u ah puidawk unla, suong a na sehlup dinguh ahi.

⁶Hetpih nih ahim thum ahim thu apat a a thi ding pa chuh suklup ding ahi, ahihziekin, hetpih khat chauh thu a kuomah suklup ding ahi puoi.

⁷Amah sulum ding chun hetpihte chun khut tha masau intin, zie zawh chuleh mipite chun tha’nau. Khutia chuh na lak u apat a zie thil phalo chuh na sukbeih dinguh ahi.

⁸Thisan suohna chi chuom chuom, neihlelam kichuhna thubuoi leh kikhettuohna thu khenkhat, na khaw sung u a kinielkalhna ting, nang u dinga khen haksa taluo a um tieng leh, LALPA na Pathien un mun a guot ding achun chieh unla;

⁹Zie hun lai taka Levi mi thiempu a pang te leh vaihawmpa kawm achun chieh unla, amau chuh dawng un; khutichun, amau chun thu khen ding dân chuh hun na hilh in au;

¹⁰Khutichun, nangun LALPA’n mun a guot ding apat a thu khen ding dân a hun na kâwkmuh guol u chun hih in na tin un, a hun hilh dân u a chuh chingthei taka na hih dinguh ahi.

¹¹Thu khen ding dân a hun sinsak u leh vaihawm dân a hun hilh dân u chun hih in na tin un: thu khen ding dân a hun na kâwkmuh u chuh changlam ahim, veilam ahim a na petmangsan dinguh ahi puoi.

¹²LALPA na Pathien u ma a nasema ding zing thiempupa ahim vaihawmpa ahim thu pawm lo a mawk tawih taphawt chuh suklup ding ahi: Israel lak apat zie thil phalo chuh na sukbeih dinguh ahi.

¹³Khutichun mi cheng cheng in hun heu intin, lau intin un, mawk tawih kit ta puo’n au.

¹⁴LALPA na Pathien un gam a hun piek chuh na va tun u a, na va luoh u a, na va chen u a “I kim I vel u a nam haw guol hin ei un le leng nei hitiu,” na tih tieng u leh;

¹⁵LALPA na Pathien un a tel ngêi chuh lenga na neih dinguh ahi a; na unau lak u a ngêi lenga na siem dinguh ahi; nam chuom mi, na unau uh hilo chuh na chung u a na kawih dinguh ahi puoi.

¹⁶Ahihziekin, leng chun sakawl tamtak a sepaihte dinga a neih ding ahi puo a, chun, mite chuh sakawl thenna a nei a Aigupta gama a chiehsak ding le ahi diek puoi: LALPA’n, “Tu apat in zie lama chuh na chieh kit tâk loh dinguh ahi,” na kawm u ah a ti ta ngâla.

¹⁷Zi le a neih beh beh zieng ding ahi puoi, khutilochun, a lungthim LALPA apat in petmang kha kha’na; dangka leh sana le a hauh ding ahi diek puoi.

¹⁸Chun, hiti hi hi’n tin, a gam lalchutphah a a chut tieng leh thiempu Levi te etkawl sek dân hi lehkhabu ah zik sawn sak intin;

¹⁹Zie chuh ama’n kawl intin, a damsung cheng a sim sek ding ahi, zie dân leh thupiek chengcheng hi a pawm a, a zuih a, LALPA a Pathien lau dinga a zil theih a;

²⁰A lungthima a unaute sanga phazaw a a kikawih loh a, thupiek chuh changlam ahim, veilam ahim a a petmangsan lohna ding leh khutia chuh lalgam a amah leh a chate chuh Israel chate laka a damsawt theih na dingun.