Read Gangte DAN NIHNA 19 Bible Online

DAN NIHNA 19 - Gangte bible

DAN NIHNA 19

¹“A gam uh LALPA na Pathien un a hun piek nam haw chuh LALPA na Pathien un a sukmangthai a, na nawhdawk u a, a khawpi hawu, a In hawu a na chen tieng u leh,

²LALPA na Pathien un luoh dinga a hun piek gam achun a lailung deuh deuha um khawpi thum nang u dinga na kawihchuom dinguh ahi.

³Tuolthat taphawt a taihlut na ding un, LALPA na Pathien un a hun luoh sak gam chuh mun thum in khen in na tin un, na gamgiteu siem in na tin un, zie khawpi haw ding chun lampi na guonggalh dinguh ahi.

⁴Chun, tuolthat zie a chuh tailut a bit thei ding haw chuh ziehaw hi ahiu, tuma lam a kimelmakna nei sam lo a a invengte that khapalh taphawt te,

⁵Mi a invengte tawh thing tu dinga gamlaka chieh a, thing tu dinga a heicha a vak lap leh a chang tawng in a invengpa sep lum khapalhte, ziete chuh zie khawpi khat pên pên achun tai intin, a hinna humbit ina;

⁶Khawpi khat chauh um leh gamla taluo’n tin, thisan phuba lak guo kuo ahim in a lungnat sosan lai taka zie pa chuh delhzui in, a gamlat zieka makhelh in va that khâna; tuma lama hawtna ana nei ahih loh ziekin amah chuh thi thuk dinga kilawm hikimahlele.

⁷Zieziek a chuh, nang u dingin khawpi thum na guot dinguh ahi, ti a thu ka hun piek na hiu hi.

⁸“Na pileputeu kawma kihâksiela tiem guola LALPA na Pathien un na gam u a hun keklet saka;

⁹LALPA na Pathien u chuh hehpih a, a lampi haw hawh zing dinga tunia thu ka hun piek dân haw hi chingthei taka na zuih ziek u a na pileputeu piek dinga a tiem gam pumpi chuh a hun piek chun; zie khawpi thum te hi tihloh in nang u dingin khawpi dang thum behlap un.

¹⁰LALPA’n luoh dinga a hun piek na gamsung u a chuh sukkhelh na neilote thisan suoh ahih loh a, thisan suoh thiemloh channa na chung uh a a um lohna dingin.

¹¹“Ahihziekin, mi’n a invengte a hawt a, a na chana, a sawisak diek a, a sukliem a, a thih a, zie khawpi haw laka khat pên pên a hi a taih chun,

¹²A chênna khuo upate’n thu thâk u henla, khawpi apat chun puikit u henla, thisan phubalatu khut ah thi dingin pieu hen.

¹³Na lungsiet dinguh ahi puoh a, Israel gam apat sukkhelhna neilote thisan suohna zieka thiemlohna chuh na sukbeih dinguh ahi, na hung lamzan theihna dingun.

¹⁴“LALPA na Pathien un luoh dinga a hun piek, na luoh dinguh gama na mau a ana kiphutsa na invengte gamgi chuh na chawn dinguh ahi puoi.

¹⁵“Mi manlohna ahim, gitlohna ahim ngawh a um thiemloh chansakna dingin hetpihtu khat chauh chuh huntawk puo’n a; hetpihtu nih ahim thum ahim thugen apat ngawhna chuh namdet chauh ding ahi.

¹⁶Mi suksiet guo hetpihtu’n mi thil diklo hih a a ngawh chun,

¹⁷a kilangsehte nih chuh LALPA ma a, zie pêt a thiempute leh vaihawmte ma a chuh a din dinguh ahi;

¹⁸Chun, vaihawmte chun gunchuh takin dawng viel untin; chun, ngaitie, hetpihtu chuh mi sietna ding deih hetpihtu a suohpih chuh lepchieh a ngawh ahih chun,

¹⁹A suohpih chunga hih a guot chuh amah chunga na hih dinguh ahi; zie tawbang chun na lak u a thil phalo chuh na sukmang dinguh ahi.

²⁰Mi dang haw chun zie chuh hun heu intin un, lau intin un, tunung leh zie tawbang thil phalo himhim chuh na lak u ah hih ta puo’n au.

²¹Na diem himhim loh dinguh ahi, hinna thathenga hinna, mit thathenga mit, ha thathenga ha, khut thathenga khut, keng thathenga keng hi ding ahi.