Read Gangte DAN NIHNA 2 Bible Online

DAN NIHNA 2 - Gangte bible

DAN NIHNA 2

¹Ziephet chun, I kinunghei u a, LALPA’n I kawm u a a gen guolin Tuipi San lam ah gamthip ah I lut tau a; Seir tâng chuh ni tamtak I kimvel tau a.

²“Chun, LALPA chun ei hopih a,

³Zie tâng hi na kimvel sawt ten tau a; mâllam zuonin kihei tau in.

⁴Mipite chuh, ‘Seir tânga um, Esau suonte, na suohpihteu, gam chuh hawhpai ding na hiu a; amau chun hun na lau intin un; zieziekchun, na chittheih ten dinguh ahi;

⁵kido pih hiel kiu in; a gam u chuh hawitak pên le, kêngpêk kithawlna phet le hun pie lo hiel ding ka hi; Seir tâng chuh Esau chanvo dinga ka piek ahi tai.

⁶A an hawu chuh na nek dingun sumin kichawk in na tin un; chun, a tui u chu le na dâwn ding u a suma na châwk dinguh ahi.’

⁷“ ‘LALPA na Pathien u chun na sep taphawt u ah a hun vangsak sek a, zie gamthip za tak hi na hawhpai dân u chuh a he ngâl a; zie kum sawmli sung cheng hin LALPA chuh na kawm u ah a um a, bangmah na tasam puou kha, ti’n thu pieh,’ ti’n.

⁸“Khutichun, Elath leh Ezion-geber apat in Arbah lampi hawh in Seir tânga um Esau suonte, I suohpih teu gam chuh I pal tan u a. Chun, I kilehhei u a Moab gamthip lam zuonin I chieh tau hi.

⁹“Chun, LALPA’n ka kawmah, ‘Moab te chuh hosie kiu inla, galdo in do kiu in; a gam u chuh na chanvo ding u a hun pie lo ding ka hi. Lot suonte chanvo dingin Ar chuh ka piek ahi tai.’”

¹⁰(Zie chun tuma lam in Emim te a na cheng ui; amau chuh lien taktak, tamtak ahiu a, Anakim te tawbanga sang tak tak ahiu hi;

¹¹Anakim te tawbang mah a amau chu le Rephaim ti a het ahiu a; ahihziekin, Moab te chun amau chuh Emim ti’n a sam ui.

¹²Zielo chun, Seir tâng ahin Hor te le a na cheng ui; ahihziekin, Esau suonte’n a nawhdawk u a, a that u a, a mun u achun amau a cheng tau hi, LALPA’n a chanvo ding u a a piekna gam Israel te’n a hih guol u khan).

¹³“Khutichun, kipan unla, Zered lui chuh kân tau in, a ti a. Khutichun, Zered lui chuh I kân tau a.

¹⁴Kadesh-barnea I nutsieh u apat Zered lui I kân chan u khah kum sawmthum leh kum giet ahi; zie sung chun LALPA’n amau a na haksiel guol khan zie khanga galdo thei chengcheng chuh a thi zo vek tau hi.

¹⁵Mipi lak apat a beihmang kei masangsieh un amau sumangthai dingin LALPA khut chuh a chung u ah a um zing hi.

¹⁶“Khutia chuh mipi lak apat galdo thei tieng chengcheng a manthai u a, a thih zawh phet u chun,

¹⁷Chun, LALPA’n I kawm u ah,

¹⁸‘Tuni hin Moab gam chuh Ar muna pal tan ding na hiu a;

¹⁹chun, Amon suonte gam chuh na vanaih tieng u leh hosie kiu inla, kido pih hiel kiu in; Amon te gam chuh nanguh hun pie lo hiel ding ka hi, Lot suonte chanvo dinga ka na pieksa ei tai.’”

²⁰(Zie gam hile miliente gama sim ahi; zie hin tuma lam in Rephaim te a na cheng sek ui; ahih ziekin amau chuh Amonte’n Zamzummim a ti sek ui.

²¹Amau chuh Anak te guola lien leh tam leh sang taktak ahiu a; ahih ziekin amau chuh LALPA’n a sumangthai a, a gam u chuh Amonte’n a luoh u a, a mun u achun a um tau hi;

²²Seir tânga um Esau suonte dingin le zie tawbang mah chun LALPA’n a na hih hi, Hor te chuh a sumangthai a, khutichun, a gam u chuh Esau suonte chun a luoh u a, a mun u achun tu chan hin a um tau ahi:

²³Chun, Hazarima Azzah chana khaw neucha cha a ana cheng Avte chule Kaphtor apat a hung pawt Kaphtor mite chun a sumangthai u a, a gam u chuh amau in a luoh tau hi).

²⁴“Na khuolzin nau chieh zel unla, Wadi Arnon phaicham kân un; ngaitiem u. Amor mi, Heshbon lengpa, Sihon leh a gam chuh ka hun pie tai; luoh phawt unla, galdo in do un.

²⁵Tuni hin van khupsin nuoia namtin chungah nang u hun huphulhna leh hun lauhna um pat sak ing ka ting, na chanchin uh a na heu intin, kilîng intin un, nang u ziekin beidawng taka um ding ahiu hi,” ti’n.

²⁶Chun, Kedemoth gamthip apat in Heshbon lengpa Sihon kawm achun chamna thu puon mi ka sawl a,

²⁷“Na gam hi ei hawh sak in, lamtuongpi zel ah chieh ing ka ting, changlam ahim, veilam ahim ale pet puo’ng ka.

²⁸Ka nek dingun an sumin a chawkin ei châwksak thawh in na tin, ka dâwn dingin tui le sumin a chawkin ei châwksak thawh in na tin, Kenga ka hawh pai uh ei phalsak in,

²⁹Jordan, ka kaih a LALPA ka Pathien un ei piek gam chuh ka lut masangsieh in, Seir a um Esau suonte leh Ar a um Moab te’n ka chunga a hih guol u khan, na gam chuh ei hawhsak mai in,” ti’n.

³⁰Ahihziekin, Heshbon lengpa Sihon chun a gam chuh ei hawhsak nuom puoh a; LALPA na Pathien un na khut u a a piek theihna dingin a lungthim chuh a sukkhauh saka, a suktak sak ta a, na hetsau guol ngêi in.

³¹Chun, LALPA’n ka kawmah, “Ngaitie, Sihon leh a gam chuh hun pie ding ka hi ta a, a gam chuh lâksak inla, luoh phawt mai in,” ei ti a.

³²Khutichun, Sihon leh a mite chengcheng chuh Jahaz muna ei uh ei na do dingin a hung kipan u a.

³³Chun, LALPA I Pathien un amah I khut u ah ei pie ta a; khutichun, amah leh a chapate leh a mite chengcheng chuh I that tau a.

³⁴Ziephet chun, a khuo chengcheng chuh I la tau a, zie khuo haw sunga um mihing chengcheng chuh, numei leh naupang pum in, I that suok kêi u a, hinghawih himhim I nei puou kha;

³⁵I khuo lâk hawu a I thuomphuo lâk hawu leh I gancha lâk hawu chauh chuh I kilak uh ahi kha.

³⁶Amon phai guom panga um Aroer apat leh guom sunga khuo apat Gilead chan chun khuo I lak zawh loh ding khawp u a hât leh det a um puoh kha, LALPA I Pathien un ei piek vek tâk ziek khan.

³⁷Amon suonte gam chauh na va luoh puou kha, Jabok lui pang tuok leh thingtâng gama khuo haw LALPA I Pathien un ei khapna taphawt haw tawh.