Read Gangte DAN NIHNA 20 Bible Online

DAN NIHNA 20 - Gangte bible

DAN NIHNA 20

¹“Na melmateu do dinga na kuon u a, sakawl haw, kidona kangtalai haw leh nang u sanga tamzaw sepaih na muh tieng u leh amau chuh na lauh dinguh ahi puoi; Aigupta gam apat hun puidawk LALPA na Pathien u chuh na kawm u ah a um ngâla.

²Kidona phuol a na chieh ding kuon u leh thiempupa chuh malam ah hung dawk intin sepaihte kawma chuh,

³‘Aw, Israel te haw, ngaiun, tuni hin na melmateu do ding na hi tau a, lungkie kiu inla, lau kiu in; tiza kiu inla, a masang u ah taisie kiu in,

⁴Guolzawhna na chan theihna ding u a na melmateu do dinga hun umpih zing chuh LALPA na Pathien uh ahi ngâla,’ a tih ding ahi.

⁵“Zie tieng chuleh, lawiupate chun mipite kawm achun, ‘In thak sa a latna nei nailo na um u? A In ah chieh kit hen, khutilochun kidona ah thi taleh, mi dangin a latna nei kha’na.

⁶Grep huon siem ngâla a gah ne nailo na um u? A In lam ah chieh kit heh, khutilochun kidona ah va thi taleh, mi dangin ne zaw kha’na

⁷A zi ding huol zo zet ta a nei nailo na um u? A In lam ah chieh kit heh, khutilochun, kidona ah va thi taleh mi dangin kichênpih khâna,’ ti a a gen ding ahi.

⁸“Lawiupate chun mipite kawm achun, ‘A lau leh a lungkie na um u? A In lam ah chieh kit hen a unaute le a lungkiek lohna dingun,’ tih beh nalai u hen.

⁹Lawiupate chun mipite kawma thu a gen zawh tieng u leh mipite mapui dingin sepaih hotu ding a guot dinguh ahi.

¹⁰“Do dinga khuo na vanaih tieng u leh, kichamna thu phuon khum phawt unla.

¹¹Chun, hiti hi hi’n tin, a hun kichampih u a, kulh kawthaw a hawn u chun, khaw sunga um mi chengcheng chuh nasemin mang in na tin un, na nau sem in au.

¹²Chun, a hun kichampih nuom loh u a, a hun do guot u chun a khuou chuh huol in na tin un;

¹³LALPA na Pathien un a hun piek tieng leh khaw sung a um pasal cheng chuh chemzâma na thah chimit dinguh ahi:

¹⁴Ahih ziekin numei leh naupang, gancha leh khaw sunga thil um chengcheng chuh gâllâk thil chengcheng tawh, nang u ding ahi; LALPA na Pathien un a hun piek gâllâk thil chengcheng chuh na chan dinguh ahi.

¹⁵Na kinaihpih uh namte khawpi hilo na umnau apat a gamla khawpi haw chengcheng chule khutimah a chuh na sawisak zel dinguh ahi.

¹⁶“Ahih ziekin, LALPA na Pathien un luoh dinga a hun piek gama namte khawpi sunga hinna nei taphawt chuh, LALPA na Pathien un thu a hun piek guolin, bangmah na hinhawih loh dinguh ahi.

¹⁷Hit mite, Amor mite, Kanaan mite, Periz mite, Hiv mite leh Jebus mite haw hi na thah chimit kêi dinguh ahi:

¹⁸Khutilochun, a pathienteu a honau a thil kihdak-um a hih sek hawu zui dingin hun sinsak intin un, LALPA na pathien uh chungah thil hihkhiel kha’n lau.

¹⁹“Lak guo a na do u a, khuo sawttak na huol tieng u lele a kimvela theikung haw chuh heicha a na phuk loh dinguh ahi; na nek dinguh ahi a, na khuo umnau a matchâk dingin na phuk dinguh ahi puoi. (gamlak a thing hi mihing hinna ahi.)

²⁰Thing a gah nek theih loh na hetchien hawu vang chuh phuk unla, khuo chuh na lak masangsieh u a na huolnau a na pansakna dinguh siemna a na mat dinguh ahi.