Read Gangte DAN NIHNA 22 Bible Online

DAN NIHNA 22 - Gangte bible

DAN NIHNA 22

¹“Na invengteu bâwngchal ahim belam ahim a mang na muh tieng u leh na thipsan mai dinguh ahi puoh a, a neite In a na puihtung sak kit tei dinguh ahi.

²Chun, a neite chuh na kieng nai u a cheng ahih loh u a, ahihloh leh, kuo a ahih le na het loh u chun, gancha chuh na In u ah kai in na tin un, enkawl in na tin un, a neite’n a hung hawl tak leh na piek kit dinguh ahi.

³A sabiltung u le khutia chuh na hih dinguh ahi a, zie tawbang mah a chuh a niklepuon le na hih ding ahi a, zie tawbang mah a chuh na invengte thil mansak na muh taphawt u chuh na hih dinguh ahi a, na kihetloh sak mai dinguh ahi puoi.

⁴“Na invengte sabiltung ahim bâwngchal ahim lampi a awp chak zieng na muh u chun na kimuhloh sak mai dinguh ahi puoh a, na kaihdinpih tei dinguh ahi.

⁵“Numei pasal vana a kivan ding ahi puoh a, pasal le numei vana a kivan ding ahi puoi; kuole zie tawbang hih taphawt chuh LALPA na Pathien u ngaih in mi tenum ahiu ui.

⁶“Lam panga thing lêk ahim leituol ahim a vacha bu, a tui ahim a no ahim a pi’n a awplai na muh u chun a no chuh a pi puma na lak dinguh ahi puoh a,

⁷A pi chuh na thahdawk teitei dinguh ahi, a no chuh vang la thei unla; khutichun, lamzang in na tin un, dam sawt inlau.

⁸“In thak na sak tieng u leh, na In chung u apat mi kie lo a, na In u chuh thisan suohna In ahih lohna dingin na In chung u chuh na ûmkimvel dinguh ahi.

⁹“Na grep huon u a thaichi chi nih na chîn loh dinguh ahi; khutilochun, na thaichi chîn gah leh na grep huon a thilpawt chengcheng chuh a buok hi kha’na.

¹⁰“Bâwngchal leh sabiltung lokai a na mat khawm loh dinguh ahi.

¹¹Samul leh pattak kigan hel a na kivan loh dinguh ahi.

¹²“Na puontheh silh u chuh a ning li a a kîmna na siem dinguh ahi.

¹³“Mi’n zi a neih a, a kuolpih nunga a deihloh kita,

¹⁴Zie nu hi ka kichênpih a, ahih ziekin, ka kipawlpih phetin nungak thieng a hihna ka mu puoi, ti a gen thanghuoia a sukminsiet chun,

¹⁵“Nungak nu nulepa chun zie khuo upate kawm achun kulh kawt ah nungak thieng a hihna chuh sulang dingin a puihdawk dinguh ahi.

¹⁶Chun, nungaknu pa chun upa haw kawm achun, ‘Zie pa hi ka chanu ka neihsak a, ahih ziekin, tuhin a deih ta puoh a,

¹⁷Na chanu hi nungak thieng a hihna ka mu puoi, ti’n a gen thanghuoia, ahih ziekin, ziehi ka chanu nungak thieng a hihna namdetna chuh ahi,’ ti’n tin, tichun, khuo upa haw ma achun a puon uh phah un au.

¹⁸Chun, zie khuo upate chun zie pa chuh gawt in au;

¹⁹Israel nungak thieng a sukminsiet ziekin dangka sekel za khat lieusak beh in au; nungaknu pa chuh pie’n tin un, zie nu chuh a zi hi zing ta’n tin, a dam lai chan chuh a mâk phal hita puo’n a.

²⁰“Ahihziekin, zie pa ngawhna chuh adik ahih a, nungaknu chuh nungak thieng a hihna namdetna muh zawh ahih loh chun.

²¹Zie nu chuh a pa kawt ah puidawk intin un, khuo a mite chun suongin seplum in au, a pa, In a thanghuoi taka uma Israel te laka gitlohna zahchâk um tak a hih ziekin; khutia chuh, zie thil phalo chuh na sukbeih dinguh ahi.

²²“Pasal khat leh mi dang zi kuolkhawm muh ahih u chun, a nih u a suklup ding ahi, a kuolpih pa leh zie nu chuh; khutichun Israel te lak apat zie thil phalo chuh na sukbeih dinguh ahi.

²³“Nungak thieng, pasal nei dinga mi tawh kihuollai, mi khatin khawpi sung ah va mu henla, kuolpih ta leh,

²⁴A nih u chun khaw paw lam achun puidawk in na tin un, suong a na sehlup gel dinguh ahi; nungaknu chuh, khuo a um ngâla a kiko loh ziekin; zie pa chuh, a invengpa zi huollai a kuolpih ziekin; khutia chuh na laku apat zie thil phalo chuh na sukbeih dinguh ahi.

²⁵“Ahih ziekin, nungak mi huollai mi’n gamlaka a muh a, a pawngsuol a a kuolpih chun, a kuolpih pa chauh chuh suklup ding ahi a,

²⁶Nungak nu chuh bangmah na lawh dinguh ahi puoi, nungaknu chung achun thihna kham gitlohna a um puoi; zie tawbang hi chuh pasal khatin a invengte buluh a that tawbang ahi;

²⁷Zie pa chun nungaknu chuh gamlak ah a va tuok kha a, mi huollai nungak chuh a kikoa, ahih ziekin amah hukdawk ding kuomah a um puoh ngâla.

²⁸“Mi’n nungak thieng huol loh a tuohkhak a, a pawngsuol a, a kuolpih a hetdawk ahih chun,

²⁹Zie pa chun nungaknu pa chuh tangka sekel sawmnga a piek ding ahi chun zie nu chuh a kichênpih teitei ding ahi a sukthanhuoi tâk ziekin; a damsung chengin amah chuh ma thei ta puo’n a.

³⁰“Kuoma’n a pa zi a kichênpih ding ahi puoh a, a pa a sukmaimawk ding ahi puoi.