Read Gangte DAN NIHNA 24 Bible Online

DAN NIHNA 24 - Gangte bible

DAN NIHNA 24

¹“Mi’n zi a neih a, a chunga thil kilawmlo bang ahim a het zieka a mit a tun loh chun hiti hi hi’n tin, amahnu ding chun kimâkna lehkha zik intin, pie’n tin, a In apat a sawldawk ding ahi.

²Chun, a In apat a pawt nung chun mi dang tawh vakicheng thei ina.

³Chun, a pasal nunung zaw chun a deih loh a, kimâkna lehkha amahnu dinga chuh a zika, a pieka, a In apat a sawl dawk ahim, a pasal nunung zaw a kichênpihpa chuh a thi ahim ahih chun,

⁴A pasal masa zaw ana ma pa khan sukbuok ahih nung chun kichênpih kit thei puo’n a; zie chuh LALPA ngaih in tenum ahi: LALPA’n luoh dinga a hun piek gama chuh gitlohna na lut sak dinguh ahi puoi.

⁵“Zi nei tûng pan chuh galdo a a chieh ding ahi puoh a, na danga le phut ding ahi puoi; a zi chu tawh kum khat In a zalen taka a um dinguh ahi.

⁶“Mi buh hêkna suong ahim, a suongpek chungnung zaw ahim chuh a bat zieka na hen dinguh ahi puoi, khutia chuh na hih chun mi kivakna a thil bat zieka lâksak hi ding ahi ngâla.

⁷“Kuole, Israel suon, a suohpihte pummat a suok bawla bawl ahim, zuok ahim het dawk ahih chun, suklup ding ahi; zie guola chuh na lak u apat zie thil phalo chuh na sukbeih dinguh ahi.

⁸“Phâk hi chungchâng achun, Levi mi thiempute hun hilh dân chuh ngaikhawk taka zuia, a hun hilh dân tak u a hih dingin chingthei un; amau thu ka piek guola chingthei taka na hih dinguh ahi.

⁹Aigupta apat na hung pawt u a lampi a LALPA na Pathien un Miriam chunga a hih kha hezing un.

¹⁰“Bang hita leh na unaute na palâksak tiengu leh bat gâkna a puon a kawih guot la dinga a In sunga na lut dinguh ahi puoi;

¹¹In pawlam ah ana dingin na tin un, a thil kawih guot chuh amah ngêi in nang kawma a hun chawihdawk ding ahi.

¹²Mi chagah ahih chun, a puon chuh na kawm u a na zan gieh sak dinguh ahi puoi;

¹³A puon chuh kisilh a, a ihmut a, na chungu a a kipah theihna dingin ni tum tieng leh na piek kit sek dinguh ahi, khutichun, LALPA na Pathien u masanga na kipahna ding hi’n a.

¹⁴“Mi gimthei leh tasam nasema na gawih chuh, na Israel chanpih u hi henla na khuou a cheng gam chuom mi hilele, na nuoisieh dinguh ahi puoi;

¹⁵Nicheng leh nisa tum ma a a lawh chuh na piek dinguh ahi, mi gimthei ahi a, a kineppih mah mah ziekin; khutilochun, nang u hun awimawh in LALPA uou intin, gitlohna hih a thiemlo hi kha’n lau.

¹⁶“Chate zieka pate suklup ding ahi puo a, pate zieka chate le suklup ding ahi diek puoi; mi cheng amah gitloh zieka suklup ding ahi zawu hi.

¹⁷“Gam chuom mite leh nauchagahte chuh diklo takin vaihawm khum kiu inla, meithai puon chuh bat gâkna a na lak dinguh ahi puoi;

¹⁸Nang u le Aigupta gama khan suok na hiu a, LALPA na Pathien un zie apat chuh a hun tatdawk na hiu hi tih hi na hetzing dinguh ahi; ziezieka chuh zie hih dinga chuh thu ka hun piek ahi.

¹⁹“Na lo u a buh na ât tieng u leh buhphal na muh khelh uh a um chun na va vainung lak dinguh ahi puoi; gam chuom mite, nauchagahte leh meithaite dinga na nutsieh dinguh ahi zawi; khutichun, LALPA na Pathien un na khut nasep chengcheng u ah hun vangsak ina.

²⁰Na olive gah uh na khet pulh tieng u leh a bâk haw chuh na vel khet dinguh ahi puoi; a kinusieh haw chuh gam chuom mite, nauchagahte leh meithaite a ding ahi.

²¹Na grep huon u a grep gah na lawh tieng u leh na vel hawl dinguh ahi puoi; a kinusieh haw chuh gam chuom mite, nauchagahte leh meithaite a ding ahi.

²²Aigupta gama khan suok na na hiu hi tih hi na hetzing dinguh ahi; zieziekchun ahi zie hi hih dinga thu ka hun piek chuh.