Read Gangte DAN NIHNA 25 Bible Online

DAN NIHNA 25 - Gangte bible

DAN NIHNA 25

¹“Mi’n thubuoi a neih tieng u leh vaihawmna ah tun intin un, chun, vaihawmte chun thubuoi chuh khen intin un, a dik chuh thiemchan sak untin, a diklo chuh thiemloh a chansak dinguh ahi;

²Chun, hiti hi hi’n tin, mi phalo chuh zêp dinga kilawm ahih chun vaihawmpa chun kuol sak intin, a masanga a zêp sak ding ahi, a gitlohna dungzuia zêp ding ahi.

³Sawmli vei chana zêp theih hi’n tin, zie sanga tamzaw chuh hilo in; zie zah sanga tamzaw chuh a zêp chun na suohpih u chuh na mitmuh u ah muolpho taluo khâna.

⁴“Bâwngchal in buh a chil pêt a a mûk na kân dinguh ahi puoi.

⁵“Suohpihchan cheng khawm u henla, khatzaw chuh chapa neilo in thi henla hileh, a zi chun amau inkuon pawlam mi a kichênpih loh ding ahi; a pasal suohpihpa chun a kichên pih intin, a suohpihpa hih ding chuh amahnu chunga chuh a hih ding ahi.

⁶Chun, hiti hi hi’n tin, zie nu chapa neih masak pên chun, Israel te laka a min a man lohna dingin, a thisa a suohpihpa min chuh a puok pek ding ahi.

⁷Ahih ziekin, mi’n a suohpihpa zi a kichênpih nawp loh chun a suohpihpa. zi chuh upate kawmah kulh kawt ah va chiehto intin, ‘Ka pasal suohpihpa’n a suohpihpa min Israel te laka umsak zel a nuom puoh a, ka chunga a hih ding chuh a hih nuom puoi,’ a va tih ding ahi.

⁸Khutichun a khuo upateu chun zie pa chuh sam intin un, hopih intin un, chun; amah chun, Ka nei nuom puoh a ei ve, ti a a pan chak kêi leh,

⁹A suohpihpa zi chun upate ma ah amahpa chuh vak zuon intin, a kengtawbek khat lam sut sak intin, a maichang a chil sietkhum intin, ‘A suohpih dinga suon neihsak sumsiel taphawt chung achun zie guola hi hih hi zel hen,’ ti a a dâwn ding ahi.

¹⁰Khutichun, amah suonte chuh Israel te lak achun, ‘A kengtawbek sut sak a umpa suonte,’ ti a het hi ta’n au.

¹¹“Pasal nih a kisuol u a, khatpa zi chun a pasal chuh a kisuolpihpa apat hukdawk guo a khatzawpa chuh a zahmawh a a mat chun,

¹²A khut chuh na tan sak dinguh ahi, zie nu chunga chuh zah na ngaih himhim dinguh ahi puoi.

¹³“Na dip sung u a, a ha lam tehna suong, alien leh a neu na neih dinguh ahi puoi.

¹⁴Na In u ah, a tui lam tehna, agik leh a zâng na neih dinguh ahi puoi.

¹⁵Khutichun, LALPA’n gam a hun piek na ahih na damsawt theih na dingun tehna diktak leh bûkna diktak na neih dinguh ahi.

¹⁶Kuole thil tehna a mi thêm a mi lepbawlte chengcheng chuh LALPA na Pathien u ngaih in mi tenum ahiu hi.

¹⁷“Aigupta gam apat na hung pawtna lampiu a Amalek mite hun na bawl dân kha na hetzing dinguh ahi:

¹⁸Chawl leh nânga na um lai tak u a gamta lailak a a hun tintan u a, Pathien lauhna himhim neilo a, na lak u a mi pha zo lo leh a nunung nung a thah dân u kha hezing un.

¹⁹Zieziekchun, hiti hi hi’n tin, LALPA na Pathien un luoh dinga gam a hun piek a chuh na kim na vel u a na melmateu chengcheng lak apat a LALPA na Pathien un gâlmuonna a hun piek tieng leh van khupsin nuoi apat a Amalek te hetzingna chuh na sukmang kei dinguh ahi; na hetngilh loh hiel dinguh ahi.