Read Gangte DAN NIHNA 26 Bible Online

DAN NIHNA 26 - Gangte bible

DAN NIHNA 26

¹“Chun, hiti hi hi’n tin, LALPA na Pathien un a hun piek gama chuh na valut u a, na luoh det u a, na chen tieng u leh,

²LALPA na Pathien un a hun piek gama pieng lei gah tung masapen haw chuh neukhat khatin lakhawm in na tin un; bawm ah kawih in na tin un, LALPA na Pathien un a Min umsakna dinga a guot ding muna chuh na va chawih dinguh ahi.

³Chun, zie pet a thiempu kawm achun chieh in na tin un, ‘Ei uh piek dinga LALPA’n I pileputeu kawma ana kihâksiel gam achun ka hung tai tih tuni hin LALPA na Pathien kawmah ka phuong hi,’ a kawma chuh na tih dinguh ahi.

⁴“Chun, thiempu chun na khut u apat in bawm chuh la’n tin, LALPA na Pathien u maichâm maa chun kawih ina.

⁵Chun, nangun LALPA na Pathien u maa chuh, ‘Ka puu chuh Suria mi, mi vakvai ahi a, Aigupta gam ah a na chieh suka, zie chun malzin guolin a na chênga, tawmcha ahiu a; chun, zie tak achun nam lopi tak, hât tak leh tamtak a hung hi tau a;

⁶Chun, Aigupta mite chun phalo takin ei bawl u a, ei sugimthei u a, na haksa taktak ei sepsak u a;

⁷khutichun, ka pileputeu LALPA Pathien kawm achun ka mau tau a, LALPA chun ka awu chuh a na za a, ka gimtheih zieu leh ka sepgim zieu leh nuoisieh ka hih zieu chuh a mu ta a;

⁸Chun, LALPA chun Aigupta gam apat chun khut hât tak leh bân zak in, thil lauh-um nasatak tak leh melchikna haw leh thilmak haw mang in ei na puidawk ta a,

⁹Zie mun ahin ei pui luta, zie gam, bâwngnawi leh khuoizu luonna gam hi ei pie ta a.

¹⁰Tuhin, hun pie’n, na tih dinguh ahi; ngaitie, Aw LALPA, Nangin nei piek gama lei gah masapen chiet ka hun chawi ui,’ na va tih dinguh ahi. “Chun, LALPA na Pathien u ma achun kawih in na tin un, LALPA na Pathien u maa chun amah ho in kun in na tin un;

¹¹Chun, LALPA na Pathien un nang u leh na inkuonteu thilpha cheng ahun piek zieka chuh, na lak u a cheng Levi mite leh gam chuom mihaw chuh tawh, na In u a kipâk taka na um dinguh ahi.

¹²“Chun, a kum thumna, sawma-khat piek kum a na sepgahteu chengcheng sawma-khat na kawihchuom zawh tieng u leh sawma-khat haw chuh Levi mite, gam chuom mite, nauchagahte leh meithaite na piek dinguh ahi, na khuou ngeia a nek u a tai tak leh vah taka a um theihna dingun;

¹³Chun, LALPA na Pathien u kawma chuh hiti ahi na gen dinguh ahi, ‘Nei thupiek haw cheng guolin ka In u apat in thil zek thiengtho haw chuh ka kawihchuom u a, Levi mite, gam chuom mite, nauchagahte leh meithaite chuh ka pie tau a, na thupiek haw chuh ka petmangsan puou a, khatchale ka hengilh puou hi;

¹⁴Ka lusûn lai un thil zek haw chuh ka ne puou a, ka buok lai un le ka dawm chawn viel viel puou a, mithite le zie laka chuh ka pie diek puou hi; LALPA ka Pathien u thu chuh ka nung u a, nei thupiek chengcheng guolin ka hih vek uh ahi.

¹⁵Na umna mun thiengtho, van apat chun hun en suk inla, na mi Israel te leh bâwngnawi leh khuoizu luonna gam, ka pileputeu kawma kihâksiela na na tiem guola nei piek gam hi hun vangsak in,’ na tih dinguh ahi.

¹⁶“Tuni hin LALPA na Pathien u chun zie dân haw leh thupiek haw hi zui dinga thu a hun piek na hiu hi; zieziekchun, na lungthim chengcheng u leh na lunggil chengcheng u a na pawm u a na zuih dinguh ahi.

¹⁷Tuni hin a lampite hawh a, a dân haw, a thupiek haw leh a vaihawmna haw zuia LALPA chuh na Pathien u hi dingin na phuong tau a;

¹⁸Chun, tuni hin a hun tiem guol khan, a thupiek chengcheng te zuia, amah a chuom hi ding leh,

¹⁹A na gen tâksa guola LALPA na Pathien dinguh a mi thiengtho na hih theihna dingu leh a nam siemsa chengcheng te laka pahchakna leh minthanna leh, zahna chang dinga LALPA’n a hun tel na hi tau hi,” a ti a.