Read Gangte DAN NIHNA 27 Bible Online

DAN NIHNA 27 - Gangte bible

DAN NIHNA 27

¹Chun, Mosi leh Israel upahaw chun mipite kawm achun, “Tuni a thu ka hun piek chengcheng hi na pawm dinguh ahi.

²LALPA na Pathien un gam a hun pieka chuh chieh dinga Jordan lui na kaih niu chuleh hiti hi hi’n tin, suong lien taktak phut in na tin un, suong rawng a na zut nâm dinguh ahi a;

³Chun, na galkaih zawh tieng u leh suong chung hawa chuh zie dân thu chengcheng hi na zik dingu ahi; khutichun, LALPA na pileputeu Pathien in a hun na tiem guol khan bâwngnawi leh khuoizu luonna gam, LALPA na Pathien un a hun piek gam achun chieh thei inlau.

⁴Chun, Jordan lui na kaih zawh tiengu leh hiti hi hi’n tin, tunia thu ka hun piek guol hin Ebal tâng achun suonghaw chuh phut in na tin un, suong châlna a na châl dinguh ahi.

⁵Chun, zie tak achun LALPA na Pathien dingun maichâm, suong maichâm na siem dinguh ahi, thik matchâk na mat dinguh ahi puoi.

⁶LALPA na Pathien u maichâm chuh suong sek loh a na siem dinguh ahi; zie chun LALPA na Pathien dingun hâltum thilpiek haw pie’n na tin un;

⁷Kichamna thilpiek haw’n kithawi in na tin un, zie chun ne’n na tin un, LALPA na Pathien mau a chuh kipâk taka na um dinguh ahi.

⁸Chun, suonghaw chung achun zie dân thu chengcheng hi kichien taka na zik dinguh ahi,” ti’n thu a pieu a.

⁹Chun, Mosi leh thiempu Levi te chun Israel te chengcheng kawm achun, “Aw Israel mite haw, thipkêi in um unla, ngaitiem u! Tuni hin LALPA na Pathien u mite na hung hitau a.

¹⁰Zieziekchun, LALPA na Pathien thuu chuh na awih dinguh ahi a, tunia thu ka hun piek, a thupiek haw leh a dân haw chuh na zuih dinguh ahi, a tiu a.”

¹¹Chun, zie ni mah chun Mosi chun mipite chuh thu a pie a,

¹²“Jordan lui na kaih tiengu leh zie phung haw hi mipite vangsak dinga Gerizim tânga a din dinguh ahi; Simeon phungte, Levi phungte, Juda phungte, Issakar phungte Joseph phung leh Benjamin phung haw cheng hi.

¹³Chun, gâusapna phuong dingin zie phung haw hi Ebal tânga a din dinguh ahi: Reuben phungte, Gad phungte, Aser phungte, Zebulun phungte, Dan phungte leh Naphtali phung haw cheng hi.

¹⁴Chun, Levi te chun Israel mite chengcheng kawmah aw ngeih tak in hun phuong un tin:

¹⁵“ ‘Khutthiemte thilsiem, LALPA dinga tenum, milim sêk thawh ahim sun thawh ahim siema a gûk a kawih taphawt chuh gausap in um hen,’ ti’n. “Chun, mipite chengcheng chun, ‘Amen,’ ti a ana dâwn dinguh ahi.

¹⁶“ ‘A nu ahim a pa ahim zah lo taphawt chuh gausap in um hen,’ ti’n tin un, “mipite chengcheng chun, ‘Amen,’ ana tih dinguh ahi.

¹⁷“ ‘A invengte gamgi melchikna chawn chuh gausap in um hen,’ ti’n tin un. “Chun, mipite chengcheng chun, ‘Amen,’ ana tih dinguh ahi.

¹⁸“ ‘Lampi a mitdûk ahilo lama pui kawi chuh gausap in um hen,’ ti’n tin un. “Chun, mipite chengcheng chun, ‘Amen,’ ana tih dinguh ahi.

¹⁹“ ‘Gam chuom mite, nauchagahte, meithaite chunga diklo taka vaihawm chuh gausap in um hen,’ ti’n tin un. “Chun, mipite chengcheng chun, ‘Amen,’ ana tih dinguh ahi.

²⁰“ ‘A pa zi kuolpih chuh gausap in um hen, a pa sumuolpho ahih ziekin,’ ti’n tin un. “Chun, mipite chengcheng chun, ‘Amen,’ ana tih dinguh ahi.

²¹“ ‘Bang gancha hita leh kipawlpih chuh gausap in um hen,’ ti’n tin un. “Chun, mipite chengcheng chun, ‘Amen’ ana tih dinguh ahi.

²²“ ‘A suohpihnu, a pa chanu ahim, a nu chanu ahim kuolpih chuh gausap in um hen,’ ti’n tin un. “Chun, mipite chengcheng chun, ‘Amen,’ ana tih dinguh ahi.

²³“ ‘A pizawnnu kuolpih chuh gausap in um hen,’ ti’n tin un. “Chun, mipite chengcheng chun, ‘Amen’ ana tih dinguh ahi.

²⁴“ ‘A gûka a invengte that chuh gausap in um hen,’ ti’n tin un. “Chun, mipite chengcheng chun, ‘Amen’ ana tih dinguh ahi.

²⁵“ ‘Bangmah sukkhelh neilo thahna dinga gawlhgukna la chuh gausap in um hen,’ ti’n tin un. “Chun, mipite chengcheng chun, ‘Amen’ ana tih dinguh ahi.

²⁶“ ‘Zie dân thu hi zui a pawm det lo taphawt chuh gausap in um hen,’ ti’n tin un. “Chun, mipite chengcheng chun, ‘Amen’ ana tih dinguh ahi.