Read Gangte DAN NIHNA 28 Bible Online

DAN NIHNA 28 - Gangte bible

DAN NIHNA 28

¹“Chun, hiti hi hung hi’n tin, LALPA na Pathien awu chuh phachuomngai taka na ngaihthak u a, tunia ka hun piek a thupiek haw chengcheng hi chingthei taka na zuih u chun, LALPA na Pathien un lei chunga nam chengcheng laka a chungnung pên in hun siem ina;

²chun, LALPA na Pathien thuu na pawm phawt u chun zie vangsakna haw chengcheng hi na chung u ah hung um intin, hun zui zel ina.

³“Inchen lama le, lo neih lama le vangsak in um inlau.

⁴“Na gil gah teu, na lei gah teu, na gancha noteu, na bâwng noteu leh na belamno teu le vangsak in um in au.

⁵“Na seng u leh na chângthâk mêkna hawu tiengin vangsak in um in au.

⁶“Na kuon dawk lam un le vangsak in um in na tin un, na tun lam un le vangsak in um in lau.

⁷“Na melmateu nang u hun do dinga hung kipan haw chuh LALPA’n hun zawhsak intin; a hun do dingin lampi khat hun hawh intin un, na mau ah lampi sagih ah taizak in au.

⁸“LALPA’n na buh-In hawu leh na khut nasepteu chengcheng chung achun vangsakna hun sawl intin; LALPA na Pathien un gam a hun piek achun hun vangsak ina.

⁹“Na kawm u a kihâksiela a na tiem guol khan LALPA chun amah dinga nam thiengtho hi dingin hun phutdet ina, LALPA na Pathien u thupiek haw hi na zuih u a, a lampi haw hi na hawh phawt u chun.

¹⁰Khutichun, khawvel a namtin in LALPA min pu na hih u hi hun he’n tin un, hun kihcha’n au.

¹¹Chun, nang u hun piek dinga na pileputeu LALPA’n ana tiem gam achun gil a gah lam ah, gancha lam ah, chun, buh leh bâl lam ah nasa takin hun phungvuk ina.

¹²LALPA chun ahun taka na gam uh chawm dinga guohtui hun pie ding leh na khut nasepteu chengcheng hun vangsak dingin, a hauhsakna kawihkhawmna go bawm, van chuh hun hawn sak intin; khutichun, nam tamtak te chuh palâksak in na tin un, nangun vang amau a chuh palâk kha puo’n lau.

¹³Chun, LALPA’n luchang in hun siem intin, a mei hilo ding na hi; nuoinung kha puo’n na tin un, chungnung zing zaw’n lau; tunia thu ka hun piek LALPA na Pathien u thupiek haw hi zui ding leh hih dinga na chittheih zing u a,

¹⁴tuni a thu ka hun piek haw hi, pathien dang haw na sem ding leh zui dinga veilam ahim changlam ahim a khatchale na petmangsan loh phawt u chun.

¹⁵“Ahih ziekin, hiti hi hung hi’n tin, LALPA na Pathien u aw chuh gunchuh taka na ngaihthak loh u a, tunia thu ka hun piek thupiek haw chengcheng hi chingthei taka na zuih loh u chun zie gâusapna haw chengcheng hi na chungu ah hung tung intin, hun delhzui zing ina.

¹⁶“Inchen lam leh lo neih lama le gausap chang inlau.

¹⁷“Na sêng u leh na chângthâk mêkna haw cheng u le gausap changin um in au.

¹⁸“Na gil u a gah te, na lei gah teu, na bâwngno teu leh na belamno teu cheng le gausap in um in au.

¹⁹“Na kuon dawk lam un le gausap changin um in na tin un, chun, na tun lam un le gausap changin um in lau.

²⁰“LALPA’n na chungu ah gâusapna hun sawl intin, na sep na bawl cheng u ah buoina leh gimthawnna hun sawl intin, amah nusieh a thil phalo na hih ziekun, kintaka sietna leh châtvaihna na tuok masangsieh un.

²¹Luoh dinga na lutnau gam apat chuh a hun sukmangthai masangsieh in, LALPA’n na laku ah hilegau lênsak zing ina.

²²LALPA chun nuhpi natnate, khawsikte, meimasiete, huih sate, khawkhalte leh thaichi natnate’n hun gawt intin; na manthai masangsieh un hun delhzui zel in au.

²³Na chungu a van chuh dakguo bangin tâk intin, guoh himhim zu puo’n tin, na nuoi u a leituol chuh kahpathik guolin tâk ina.

²⁴Na gam u achun LALPA’n guoh thasang in pîlnel zuk sak intin, leivui huihpite hun sawl intin, na manthai masangsieh un na chungu ah van apat in, a zuk in zuk thawh ina.

²⁵“LALPA chun na melmateu zawh dingin hun siem intin; amau va do dingin lampi khat hawh in kuon in na tin un, a mau ah lampi sagih ah taizak inlau; lei chunga gam tin cheng ah thehzak in um inlau.

²⁶Na luong u chuh chung leng vachate leh gamsate’n an in nei intin un; a nawhmang ding kuomah um puo’n au.

²⁷LALPA chun Aigupta uilutte, meimasiete, vun natnate leh uithak in hun gawt intin; ziehaw apat chun sukdam theih hi puo’n lau.

²⁸LALPA chun ngawlna, mitdûkna leh lungthim buoina’n hun gawt intin;

²⁹Thimlaka mitdûk a kimai a kimai guolin sunchang lai tak in le kimai kimai in na tin un, na khawsakna phawt u ah lamzang puo’n lau; nuoisieh in um zingin na tin un, na thil uh mi’n hun mawk lâksak zingin tin un, nang u hun hukdawk dingin kuomah um puo’n a.

³⁰“Zi ding huol in na tin un, mi dangin kuolpih in au; In sa’n na tin un, ahihziekin, a sung achun cheng puo’n lau; grep huon siem in na tin un, ahihziekin, a gah chuh ne puo’n lau.

³¹Na muhna tak u ah na bâwngchal uh thah hi’n tin, ahihziekin, a sa chuh ne puo’n lau; na sabiltung uh hun pawng lâksak intin un, hun pie kit hiel puo’n au; na belamteu chuh na melmateu piek hi’n tin, nang u hun hukdawk dingin kuomah um puo’n a.

³²Na chanuteu na chapateu chuh na muhna tak u ah namdangte suok a um dingin piek hi’n tin un, amau ngaiin ni cheng leh, a thawn in, a hungna ding lam uh mit chau hielin thil zing sek inlau; ziehaw dalna ding chun bangmah hih theih nei puo’n lau.

³³Na lei gahteu leh na sepgim gahteu chuh na hêtkhâk loh uh nam in ne zo intin un; chun, nang u chuh nuoisieh leh tawhden hi kumkhuo’n lau;

³⁴khutichun, na thil muh hawu chuh ngawl lawh hiel inlau.

³⁵LALPA’n na khûp hawu na keng hawu ah uilut na chi sukdam theih loh hun vei sak ina, na kengtawu apat na lusip chan un.

³⁶“Nang u leh na pileputeu in le a hêtkhâk loh uh, nam kawm achun nang u leh na lengpau ngêi chuh LALPA’n hun nawhlut intin, zie chun thing leh suong a kisiem pathien dang haw na va sem inlau.

³⁷Khutichun, LALPA’n a laku a a hun nawhlutna ding mite chun na chungu a thil tung haw chuh tizat-um sa’n tin un, zawnho leh nuihzatbuk in hun nei in au.

³⁸“Lo ah buhchi tamtak tuh in na tin un, ahih ziekin, tawmcha chauh ât un lau, khaupe’n ne zo ding ahih ziekin.

³⁹Grep huon siem in na tin un, enkawl in na tin un, ahihziekin, a tui chuh dâwn puo’n na tin un, a gah chule tep le tep puo’n lau; lung in ne zo vek ding ahi.

⁴⁰Na gamsung chengcheng u ah olive thing chîng in na tin un, ahih ziekin, a thau chuh kinuh puo’n lau, a gah haw chuh ahut in pulh zo ding ahi.

⁴¹Chanu chapa nei in na tin un, ahih ziekin, nang u chang puo’n lau; sal a puih a um ding ahiu hi.

⁴²Na theikung chengcheng u leh na thaichi teu chengcheng chuh khaupe’n ne zo ina.

⁴³“Na laku a gamdang mite chuh nang u sangin khangto hiei hiei in tin un, nang u chuh kieniem deuh deuh inlau.

⁴⁴Amau in hun palâksak intin un, nangun vang palâksak puo’n lau; amau chuh luchang in pang intin un, nang u vang chuh amei lam in pang unlau.

⁴⁵“A thupiek haw leh a dân a hun piek chuh zui dinga LALPA na Pathien awu chuh na ngaihthak loh ziekun, zie gâusapna haw chengcheng hi na chungu ah hung tung intin, na manthai masangsieh un hun delhzui zel intin un, hun phanawt in au;

⁴⁶Zie gâusapna haw chuh nang u leh na suonteu chungah kumkhuo a melchikna leh maksak dingin um ina.

⁴⁷Thil bangkima buting taka na um ziek un lungthim thalawp tak leh kipâk taka LALPA na Pathien u na nasep loh ziekun;

⁴⁸nang u hun do dinga LALPA’n a hun sawl ding na melmateu na chuh gilkiel leh dangchâk pum in, ngawnchang leh thil chengcheng tasam kawmin sem in na tin un; a hun sukmangthai masangsieh un na ngâwng u ah kahpathik namkawl hun puoksak in au.

⁴⁹Gamla tak apat, kâwlmawng apat in, mupi kisukkhawh guola chan-gang, a pau le na hetloh uh nam chuh nang u hun do dingin LALPA’n hun pui intin;

⁵⁰upate le khawksalo, khangthakte le lungsiet diek lo, hiemngam melpu tak nam chuh.

⁵¹Ziete chun na manthai masangsieh un na bâwng noteu leh na lei gah teu ne zo in au; na buh teu, na greptui teu, na sathau teu, na gan guol teu leh na belamno teu sit puo’n au, a hun sukmangthai masangsieh un.

⁵²Na gamsung u a na kimuonpih uh kulh chengah hun ûmbichilh untin, LALPA na Pathien un a hun piek na gamsung u a na khawpiu haw achun hun huolkhum un au.

⁵³“Chuleh, na melmateu in a hun huolkhum ziekun leh a hun suklungzin ziekun, LALPA na Pathien un a hun piek na gil u a gah, na chanuteu na chapateu taksa ngêi chuh hun ne hiel inlau.

⁵⁴Na laku a mi nun leh khan hawih leh mipha tak te’n le, a suohpihteu leh a pawmlai uh a zi teu leh a sit naklai uh a cha leh nau teu nasan le hun hilcha’n tin un,

⁵⁵Tichun, a nek dinguh a chateu sa chuh a khawitak chule, kuomah hawm nuom puo’n au; a hun huol kimvelnau leh a hun ûmbichilh ziek u a na melmateu in kulh kawtkhak chenga a hun sukgimtheih ziek u a nek ding bangmah a neih tâk loh ziekun.

⁵⁶Na lak u a numei tino kiuhkeuh leh tingêk tak tak, tuol tawh nuom lo khawpa umngêk zo haw chun le a ângsung a kuol a pasal leh a chanu teu leh a chapateu nasan chule hilcha’n tin un,

⁵⁷A pawmlai uh a chasen teu leh a hung pieng kit dingte nasan chuh enlah un tin, melmate’n a huolkhum u a, a ûmbichilh ziek u leh a sukgimtheih ziek u a thil cheng a tâksap tâk ziekin a gûkin ne ding ahiu hi.

⁵⁸“LALPA NA PATHIEN tih min thupi tak leh lauh-um tak hi na lauh theihna dingu a zie lehkhabu a kizik, zie dân thu chengcheng hi chingthei taka na zuih loh u chun,

⁵⁹LALPA’n nang u leh na suonteu chungah hipi huoisie tak tak, bei theilo leh natna huoisie tak tak leh bei thei lo lênsak ina.

⁶⁰Na lauh mah mah uh Aigupta gama hipi haw kha na chungu ah lênsak kit intin, zie natna haw chuh nang u ah bek zing ina.

⁶¹Zie dân lehkhabu a hi kizik lo natpi leh hipi tincheng le, na manthai masangsieh un, na chungu ah LALPA’n lênsak ina.

⁶²LALPA na Pathien thuu na zuih loh ziekun, van a aksi zah pha hielte kha tawmcha chauh hung hi ta’n lau.

⁶³Na chungu a thilpha bawla hun sukpun hi LALPA thalawp lam tak ahih guol mah khan na chungu a sietna tun sak a hun sukmangthai chuh LALPA thalawp lam tak hung hi’n tin, luoh dinga na lutnau gam apat hin bawhdawk hung hin lau.

⁶⁴“Chun, LALPA chun kâwlmawng langkhat apat a kâwlmawng lehlam chanin namtin lak ah hun thehzak intin, zie chun nang u leh na pileputeu in le na hêtkhâk loh uh thing leh suong pathien dang haw na va sem inlau.

⁶⁵Zie nam haw lak achun chawlhdamna himhim mu puo’n na tin un, na keng ngakna ding nasan u le mun um puo’n a; zie chun LALPA’n lungthim lînglau zingin, tasam mit hah gieuguou in, lungthim thadah nguingui in hun kawih ina;

⁶⁶dîp dawm zingin khawsa’n na tin un, sun leh zan a lauthawng zingin, na hin ding nasan u le kinem zo lo khawp in.

⁶⁷Zinglam leh, Nitâk himai taleh aw! ti’n na tin un, nitâk lam leh, Zingkal himai taleh aw! ti’n lau; na thil muh hawu zieka lau in na dîp uh phu lun lun ina.

⁶⁸Mu kit ta puo’n lau, ti a ka hun na tiemsa Aigupta lampi achun LALPA’n lawng in hun puikit intin, chun, zie chun na melma teu kawmah suokpa leh suoknu dingin va kizuok in na tin un, ahih ziekin, kuomah ahun chaw ding um ta puo’n a,” ti’n thu a pie tau a.