Read Gangte DAN NIHNA 29 Bible Online

DAN NIHNA 29 - Gangte bible

DAN NIHNA 29

¹Ziehaw hi Horeb tânga a kawm u a thu a thun tihloh a, LALPA’n Moab gama Israel suonte kawma Mosi thu a thun sak thuthun thu haw chuh ahi:

²Khutichun Mosi’n Israel mipite chengcheng chuh a sam khawm a, “Aigupta gama Pharaoh chung leh a miliente chung leh a gam chengcheng chunga LALPA thilhih haw cheng kha nangmau ngêi in na muu a;

³Patepna nasatak haw, melchikna mak taktak leh thilmak thupi taktak na mit ngêi u a na muh hawu kha:

⁴Ahihziekin, tuni tieng hin LALPA’n hetthiemna lungthimte, muh theihna mitte leh het theihna bilte a hun piek loh na hiu hi.

⁵Gamthip ah kum sawmli ka hun na pui ta a; na niklepuon teu chuh na silh chul puou a, na kengtawbek teu le na but chul puou.

⁶Kei hi LALPA na Pathien uh ka hi tih na hettheih na dingun, nek ding chângthâk leh dâwn ding greptui leh zupi le na dâwn puou a,

⁷Chun, zie mun hi na hung tun phet un Heshbon lengpa Sihon leh Bashan lengpa Og chuh ei uh ei do dingin a hung kipan u a, ahih ziekin, amau chuh I na zo u a;

⁸Chun, a gam u chuh I lâksak u a, Reuben leh Gad namte leh Manasseh nam kimkhatte luoh dingin I pieu a.

⁹Zieziekchun, na thilhih taphawt u a na lamzan zel theihna dingun zie thuthun thu haw hi pawm unla, chingthei takin zui un.

¹⁰“Tuni hin na bawn un, na phung makaiteu, na upateu leh na milienteu leh Israel mi tincheng,

¹¹Na naupangteu, na ziteu leh na lak u a cheng gamdang mi na thing puo teu leh na tui khaiteu pum in LALPA na Pathien mau a ding na hiu hi;

¹²LALPA na Pathien un na pawm ding u a thuthun a siem ahin tuni hin lut ding na hi tau a,

¹³Na pileputeu Abraham leh Isak leh Jakob kawma ana kihâksiel guol leh nang u kawma ana tiem guol a na Pathien uh ahih theihna dingin amah mite hi dinga tunia hi a hun namdet na hiu hi.

¹⁴Zie kihâksielna leh thuthun hi nanguh kawm maia ka thun ahi puoh a,

¹⁵Tunia zie muna LALPA I Pathien mau a ei din pih nang haw chauh hilo in tunia zie a um lote le ka thun pih ahiu hi.

¹⁶“Aigupta gama I khawsak danteu leh nam dang haw I hun pal tan dân hawu kha nangmau ngêi in na he ngâl u a:

¹⁷Thing leh suong leh dakguo leh sana a kisiem, a lak u a um, a thil kihdak-um teu, a milim hawu kha na mu ngâl u a.

¹⁸Khutilochun, na lak u ah pasal ahim, numei ahim, inkuon ahim, phung ahim zie nam pathiente ho ding chun a lunggil un tuhin LALPA I Pathien u chuh kiheisan in, na lak u ah thil kha leh gamsai kehdawkna bulhaw hung um khapalh kha’n lau.

¹⁹Zie tawbang mi chun zie kihâksiel khum thuthun thu haw hi a het tieng leh amah leh amah kihamphat intin, ‘Ka ut dân dân in, lochal takin, um zing leng le bangmah ti puo’ng ka,’ ti’n, ngaihtuoh ina. Zie chun na bawn u a hun susie ding ahi, mi pha le mi phalo le.

²⁰Zie tawbang mi chuh LALPA’n ngaidam hiel puo’n tin, LALPA lungnatna leh thikthusietna chun amah chuh kâng intin, zie lehkhabu a hansie chuong tincheng hi a chungah tung intin, LALPA’n a min chuh vannuoi apat in thaimang ina.

²¹Chun, LALPA chun amah chuh Israel phung chengcheng lak apat in sik dawk chuom intin, zie Dan Lehkhabu a kizik thuthun a chuong gâusapna haw chengcheng guol hin a chungah sietna tunsak ina.

²²“Khangthak hung um zel dingte leh tunung a na chateu leh gamla tak apat a hung gam chuom mite chun zie gam chunga sietna ana tung leh LALPA’n a gawtna natna haw chuh muu intin,

²³Gam pumpi chuh chi leh kât a dim, bangmah kichîn lohna, bangmah cha keh lohna leh hampa nasan le a keh lohna hi’n a. Gam chuh LALPA’n lungna leh hachangthaka a suksiet Sodom leh Gomorra leh Admah leh Zeboiim khawpi haw tawbanga kha suksiet hi’n a.

²⁴Namtin te chun, ‘LALPA’n bang zieka zie gam hi a hiti bawl ahi dem? Bang zieka khuti lungnat lâwm lâwm ahi dem?’ ti’n tin un;

²⁵Zie tieng chuleh, mite chun, ‘Aigupta gam apat a, a puih dawk laia a thuthun, LALPA, a pileputeu Pathien thuthun chuh a kiheimangsan u a:

²⁶pathien dang a hêtkhâk ngei loh uh pathiente, ama’n a guotsak hilote na a sep u a, a ho ziekuh ahi.

²⁷Zieziekchun, zie gam chunga hin LALPA lungnatna chuh a kuong a, zie lehkhabu a kizik gâusapna chengcheng hi a chunga a tunsak ahi;

²⁸Chun, iplah leh lungna leh hachangthak in LALPA’n amau chuh a gam u apat in a bawt dawka gam danga a paih lut ahiu hi, tunia amau haw na muh guol ngêi hin,’ ti’n au.

²⁹“Thil kiselte chuh LALPA I Pathien uh a ahi a, thil suklat a um haw vang chuh zie dân thu tincheng hi I zuih theihna ding u a kumkhuo a ei u leh I suonteu a hizing ding ahi.