Read Gangte DAN NIHNA 30 Bible Online

DAN NIHNA 30 - Gangte bible

DAN NIHNA 30

¹“Chun, hiti hi hi’n tin, LALPA’n a hun thehzak na nam dang laka na um lai u a zie vangsakna leh gâusapna tu a na kawm u a ka gen hi na chungu a a hung tun tieng leh; deih tel ding na neih u hi hezing un.

²LALPA na Pathien lam uh na vaihkit u a, tu a thu ka hun piek guola hi nang u leh na chateu in na lungthim chengcheng u leh na lunggil chengcheng u a a aw na zuih tieng u leh,

³LALPA na Pathien un na saltannau subei intin, hun lungsiet intin, LALPA na Pathien un namtin laka a hun thehzak na apat hun puikhawm kit ina.

⁴Na lak u a van tâwp chana nawhdawk a um u lele LALPA na Pathien un zie apat chun hun puikit intin, zie apat chun hun puidawk kit ina;

⁵Chun, LALPA na Pathien un na pileputeu luohna gama khan hun puilut kit intin, luoh in na tin un; chun, amah chun hun hih lamzang intin, na pileputeu sanga khawsathei zaw leh tamzaw’n hun siem ina.

⁶Chun, na hin theihna ding u a LALPA na Pathien u chuh na lungthim chengcheng u leh na lunggil chengcheng u a na hehpih theihna dingun LALPA na Pathien un nang u leh na suonteu lungthim zek hun tan sak ina.

⁷Chun, LALPA na Pathien un zie gâusapna haw cheng hi nang u hun hawa hun sugimthei na melmateu chungah tunsak ina.

⁸Ahih ziekin, na hung kihei kit u a, LALPA thupiek chuh na zuih kit u a, tunia thu ka hun piek a thupiek chengcheng hi na zuih kit dinguh ahi.

⁹Khutichun, LALPA na Pathien un na khut nasepteu chengcheng leh na chalenau teu leh na gancha no teu leh na lei gah teu chuh LALPA na Pathien un nasa takin hun sukpun sak intin, na pileputeu chunga a kipah guol khan nang u chunga le kipâk intin, khawsathei taka hun kawih ding ahi ngâla;

¹⁰LALPA na Pathien thuu na zuih u a, zie Dan Lehkhabu a chuong a thupiek haw leh a vaihawmna haw hi na tuk det u a, na lungthim chengcheng u leh na lunggil chengcheng u a LALPA na Pathien lam uh na ngat kit phawt u chun.

¹¹“Zie thupiek, tu a ka hun piek hi nang u dinga thil kisel ahi puoh a, gamla taka um le ahi diek puoi.

¹²‘I zak u a I zuih theihna dingun kuo a van a va kal a ei va lâksak ding?’ na tih dinguh a van a um ahi puoh a,

¹³‘I zak u a, I zuih theihna dingun kuo a tuipi gal lam pek a va chieh a ei va lâksak ding?’ na tih dinguh a tuipi gal lam pek a um le ahi diek puoi.

¹⁴Ei puoi, thu chun a hun naih mah mah hi; na zuih theihna dingun na kam u a le a uma, na lungthim u a le a um hi.

¹⁵“En un, tuni hin na mau ah hinna leh lamzanna, thihna leh sietna ka kawih hi;

¹⁶A lampite hawh a, a thupiekte, a dante zuia a vaihawmnate tudeta LALPA na Pathien na hehpih u a, LALPA na Pathien u thupiek, tunia ka hun piek haw hi na zuih u chun, hung lamzang in na tin un, hung pung in na tin un, na valuoh ding gam u achun LALPA na Pathien un hun vangsak ina.

¹⁷Ahih ziekin, na lungthim un, a kiheimangsan a, na limsak loh u a, pathien dang haw ho ding leh a nau sem dinga hîp mang a, na um u chun,

¹⁸Mangthai ngêi ngêi ding na hiu hi tih tuni hin ka hun hilh na hiu hi; Jordan lui kân a, luoh dinga na va lutnau gam achun dam sawt puo’n lau.

¹⁹Na masang u ah hinna leh thihna, vangsakna leh gâusapna ka kawih hi tih na chung u a hetpih dingin tuni hin lei leh van ka sam ahi; zieziekchun, hinna chuh tel un, na hin theihna dingun, nang u leh na suonteu le;

²⁰LALPA na Pathien u hehpih a, a aw ngaitha a, amah tudeta na um theihna dingun; amah chuh na hinnau, na damsawtnau ahi ngâla; khutichun na puteu Abraham leh Isak leh Jakob te kawma kihâksiela piek a tiem gam achun um ding na hiu hi,” a ti a.