Read Gangte DAN NIHNA 31 Bible Online

DAN NIHNA 31 - Gangte bible

DAN NIHNA 31

¹Khutichun, Mosi chun Israel mite chengcheng kawmah zie thu haw hi a gen zawm zela.

²A kawm u ah, “Tuhin chuh kum za leh sawmnih ka hi ta a; vakviel thei ka hita puoh a, na mau ka kai thei ta puoi; zielo a chun le, LALPA’n, ‘Zie Jordan lui hi galkai lo ding na hi,’ ei ti a.

³LALPA na Pathien u ngêi chun na mau kai zel intin; zie nam haw hi hun sukmangthai sak intin, a gam u chuh luoh inlau; chun, LALPA’n ana gen guol khan Joshua’n na mau kai ina.

⁴Chun, LALPA’n Amor lengte, Sihon leh Og chunga a hih guol khan a chung u ah hih ina; amau chuh a gam u tawh a sukmangthai ahiu kha.

⁵LALPA’n amau chuh hun pien tin, thu ka hun piek haw chengcheng guola kha a chung u a na hih ding ahi.

⁶Hattak leh hangsan takin um unla, huphulh kiu inla, amau chule lau hiel kiu in; a hun kitawnpih zing chuh LALPA na Pathien uh ahi ngâla; hun nusieh ngei puo’n tin, hun thahtham ngei puo’n a,” a ti a.

⁷Chun, Mosi’n Joshua chuh a sama, Israel mite chengcheng muhna ah a kawmah, “Hattak leh hangsan takin um in, LALPA’n a pileputeu kawma kihâksiela piek dinga ana tiem gama chuh zie mipite hi tawh chieh ding na hi a, chun, zie gam chuh na luoh sak ding ahi.

⁸Chun, nanguh hun puipa chuh LALPA ahi a, hun umpih zing intin, hun nusieh ngei puo’n tin, hun thahtham ngei puo’n a; lau ki’n la, lungkie hiel ki’n,” a ti a.

⁹Khutichun, Mosi’n zie dân chuh a zik zawh phet chun LALPA thuthun bawm zawna pang Levi chapate, thiempute, leh Israel upate chengcheng kawm achun a pie a.

¹⁰Zie zawh chun, Mosi’n amau chuh, “Kum sagih tâwp cheng leh, ngaihdam kum chenga, Bawkcha Kut laia,

¹¹Mun a guot dinga Israel mi chengcheng LALPA na Pathien mau a a hung kilat tiengu leh, zie dân hi Israel te chengcheng zaka na sim dawk sek dinguh ahi.

¹²Mipite, amei-apa, naupang neuchacha haw leh gam chuom mi na khuou a cheng haw cheng le sam khawm unla, a zil u a, LALPA na Pathien u chuh a lauh u a, zie dân thu cheng hi chingthei taka a zuih theihna dingun leh

¹³A chateu ana hekha nailo hawn le a het u a, Jordan lui galkai a na valuoh dingu gama na um sung chengcheng u a LALPA na Pathien u lauh dân a het theihna dingun sam khawm un,” ti’n thu a pie a.

¹⁴Zie zawh chun LALPA’n Mosi kawmah, “Ngaitie, na thihna ding hun chuh a nai ta a; Joshua chuh sam inla Kihona Puon-In a chun va um un, ti a chuh, thu ka piek theih na dingin,” a ti a. Khutichun, Mosi leh Joshua chuh a chieh u a, Kihona Puon-In a chun a va um tau a.

¹⁵Chun, LALPA chuh Puon-In kawt chunga chun mei khuom in a hung kilak a; chun, mei khuom chuh kikhawpna Puon-In kawt chung achun a dinga.

¹⁶Chun, LALPA’n Mosi kawma chun, “Ngaitie, na pilepute kienga ipmu ding na hi ta a, zie mite hi kipan untin, a va umna dingteu gama pathiente chung achun zawl ei saihsan intin un, ei ngaihsak puo’n tin un, amau tawh ka thuthun chuh bawtsie’n au.

¹⁷Khutichun, zie tieng chuleh a chung u ah ka lungnatna kuong intin, thahtham ing ka ting kiselmangsan ing ka. ting, sukmangthai hi’n tin un, tuohsie leh haksatna tamtak a chung u ah tung ina; khutichun, zie ni chuleh, I Pathien un ei umpih loh zieka zie thil phalo haw hi I chung u a tung hilo ahim, tiu in tin.

¹⁸Pathien dang haw lam nga a thil phalo a hih ding hawu chengcheng ziek chun zie ni chuleh kiselmangsan teitei ding ka hi.

¹⁹“Zieziekchun, tuhin, nang u dingin zie la hi ziktha’n la, Israel suonte chuh sinsak inla, zie la chuh Israel suonte chungchanga ei hetpihtu ahih theihna dingin a kam u ah kawih in.

²⁰A pileputeu kawma piek dinga kihâksiela ka tiem, bâwngnawi leh khuoizu luonna gam achun ka puih luta, ne leh cha a a um u a, a hung tai u a, a hung khawsak theih tiengu leh pathien dang haw lam hun nga’n tin un, a nau sem in tin un, ei musit intin un, ka thuthun haw bawhsie ding ahi ngâl u a.

²¹Chun, hiti hi hung hi’n tin, tuohsie leh haksatna tamtak a chungu a ahung tun tieng leh zie la hi amau hetdawk saka pang hung hi’n tin, a suonteu kam apat hetngilh theih hi puo’n a; tu a ka kihâksiel na gama ka puih lut ma him hin le a lungput dân uh chuh ka hetsa mawng ahi ngâla,” a ti a.

²²Khutichun, zie ni mah mah chun Mosi chun zie la hi a ziktha a, Israel suonte chuh a hilh ta a.

²³Chun, Nun chapa Joshua chuh a thu a pie a, a kawmah chun, “Hattak leh hangsan takin um in; Israel suonte chuh kihâksiela ka tiem gama chuh puilut ding na hi ngâla; chun, hun umpih zing ding ka hi,” a ti a.

²⁴Chun, hiti hi ahung hi a, zie dân thu haw hi Mosi’n kimtaka lehkhabu a a zikthak zawh suok kêi phet chun,

²⁵Mosi’n, LALPA thuthun bawm zawna pang, Levi te kawm achun,

²⁶“Zie Dan Lehkhabu hi lau inla, na chungchâng thuu a hetpih hiding in, LALPA na Pathien u thuthun bawm ning achun kawih un, zie taka chuh um zing dingin.

²⁷Na hel hât zieu leh na lochal zieu hi ka he ngâla; ngaitiem u, tu a ka hun dam pih laia hi bawn LALPA chunga hiti hel zing na hiu a, ka thih tieng vang leh bang tawbang phetin na huhel ta ding um!

²⁸A hetna ngêi u a zie thu hi ka gena, a chung u a hetpih a pang dinga lei leh van ka sap theihna dingin, na phung tin u a upahawu leh na hotuteu chengcheng ei sap khawmsak un.

²⁹Ka thih nung leh nasa takin kihihsieu in na tin, ka thupiek lampi apat hi petmang ding na hiu hi tih ka he ngâla; chun, tunung lam vangvang leh na chung u ah thil phalo hung tung ina; nangmau thilhih ngeia amah chuh châwk lungna a LALPA mitmuh a thil phalo hun hih ding na hih ziekun,” ti’n, thu a pie a.

³⁰Khutichun, Israel mipi hung khawm chengcheng te hetna ngêi achun Mosi chun zie la thu haw hi abul apat atawp chanin a gen suok kêi a.