Read Gangte DAN NIHNA 33 Bible Online

DAN NIHNA 33 - Gangte bible

DAN NIHNA 33

¹Zie vangsakna hin ahi Pathien mi Mosi’n a thih maa Israel suonte a vangsak chuh.

²Sinai apat in LALPA chuh a hunga, Seir apat in a hung suok hi a chung u ah ni guolin, Paran tâng apat in a hung eng dawka, Mithiengtho a sing a simte tawh a hung; A khut changlam ah amau dingin dân meikuong chawi kawmin.

³Ahi, chitin te chuh a hehpih a; A mi thiengthote chengcheng chuh na khut ah a um ui; Na keng bul ah a chuu a; Na thupiek chuh a pawm chiet ui.

⁴Mosi chun dân chuh ei pie a, Jakob mipite dingin go luoh ding.

⁵Jeshurun ah Leng ahi a, Mipi phungkai lawiupate a kikhawpkhawm lai u khan, Israel phung tinte tawh.

⁶“Reuben chuh dam zing henla, thi kihen, A mite chuh tawm mahleu,” a ti a.

⁷Chun, ziehi Juda mite a vangsakna chuh ahi; “Aw LALPA, Juda aw chuh ngaitha’n la, A mite kawmah pui in; A khut in amah ding a chuh a, A melmate a dona ah panpih in,” tih hi.

⁸Chun, Levi mite chungchâng achun; “Na Thumim leh na Urim chuh na mi thiengtho kawmah a um hi, Amau chuh Massah ah na patepa, Meribah tui mun ah a dik zieu na phawchien a;

⁹‘Ka nu leh pa khawk ka sa puoi,’ tite khan, A suohpihteu, a chateu le a ngaikhawk puou; Ahih ziekin, na thu a ngaikhawk ui, Na thuthun a zui ui.

¹⁰Jakob te chuh hilh in au na thutanna haw, Israel te chuh, na dân; Na ma ah gimlim kawih in au, Na maichâm ah hâlmang kithawihna,

¹¹Vangpie’n, LALPA, a sum a pai, A khut nasep haw a na pawm in; Amau kilanpihte kâwng chuh zêp inla, Amau hawte kâwng le, a kipat kit tâk lohna dingun,” a ti a.

¹²Chun, Benjamin te chung thu achun; “LALPA deihtak chuh bit takin cheng ina,” a kawmah, “ni tum in awp khum in tin; A liengkote nih kikal ah chawldam ina,” a ti a.

¹³Chun, Joseph te chungthu achun; “A gam chuh LALPA vangsak in um hen, chunglama van dai tui lul tak haw leh, tui thuk tak nuoi lam a tui haw chun,

¹⁴Nisa lum in a gah dawk sak theigah phapente leh, Thapi’n a gahsuoh sak thil lul tak te chun,

¹⁵Tuonthangmang tângpi a thil deihum pên haw chun, Kumsawt tânga thil lul te chun,

¹⁶Lei leh a chunga thil lul haw chun, Sinai a cheng pa deihsakna chang ta hen; Zie vangsakna chuh Joseph lu chung ah um henla, A suohpihte lak apat khenchuom a umpa luzâng achun um hen.

¹⁷A lopina chuh bâwngchal suok masa lopina tawbang ahi a, A kihaw chuh zangsiel ki tawbang ahiu; zie chun namtin si’na kâwlmawng chanin; A kihaw chuh Ephraim te sangsawm haw chuh ahiu, Manasseh asâng asâng a sim haw chuh ahiu,” a ti a.

¹⁸Chun, Zebulun te chungthu achun; “Zebulun chuh tuipi chunga a sumkawlveina achun lawhting henla, kipâk hen, Issakar hauhsakna chuh a puon-In haw ah pung hen.

¹⁹Tang achun chitin namtin sam khawm intin un, Zie chun felna kithawihna pie’n au; tuipi a hauhsakna haw chuh chen ding ahi ngâl u a, Pilnêl laka go kisel haw tawh,” a ti a.

²⁰Gad te chungthu achun; “Gad te gam sulienpa chuh pahchak in um hen, Sakeibaknei guolin a châng a, Gad a luoi tel a, a lu vun a khuot hawk a.

²¹Gam phatna pên chuh amah a dingin a tel a, Lawiupa chanvo chuh piek ahi ngâla. Mipite lawiupa haw a kikhawp tiengu leh, LALPA vaihawmna dik chuh a pawdawka; Israel te chunga a thutanna haw chuh,” a ti a.

²²Dante chungthu achun; “Dan chuh sakeibaknei no ahi, Bashan apat a hung chawm dawk sek chuh,” a ti a.

²³Naphtali te chungthu achun; “Aw, Naphtali, deihsakna a lung-awi, LALPA vangsakna a dim, Sim leh tumlam luoh in,” a ti a.

²⁴Aser te chungthu achun; “Aser chuh chalenau a vangsak in um henla, A suohpihte lak ah thuthawl henla sathau in a keng sil hen.

²⁵Na kawtkamna chuh kahpathik leh dakguo hi’n tin, Na damsung ni chengin thahat takin um zingin,” a ti a.

²⁶“Aw Jeshurun Pathien tawbang khat le a um puoi, A hun panpih dinga van a chuonga, A thupi na a meipi chunga chuong chuh!

²⁷Kumsawt Pathien chuh na kisêlna ahi a, Nuoi lam ah kumsawt bân haw chuh a um, Melmate chuh a hun nawhmang saka, ‘Sumangthai in,’ a tii.

²⁸Khutichun, Israel chuh gâlmuong takin a uma, Jakob tuilaihdawk chuh melma apat a bit, Grep tui leh buh tamna gam achun; Ahi a vante chun dâichîm a vat sak ui.

²⁹Aw Israel, na hampha ie, LALPA’n mipi a hukdam, nang tawbang kuo a um? A hun panpih phaw na lopina phaw, Na lopina chemzâm ahi! Na melmate na kawmah kitulut intin un, A mun sang teu chuh tawh den inla”