Read Gangte DAN NIHNA 4 Bible Online

DAN NIHNA 4 - Gangte bible

DAN NIHNA 4

¹Khaile, aw, Israel mite haw, LALPA na pileputeu Pathien in a hun piek gam chuh hing leh dama na luoh theihna dingun na pawm ding u a ka hun sinsak dân leh thutanna haw hi ngaithau in.

²Ka hun thupiekte hi na behlap dinguh ahi puoh a, chun, na lâk khen ding u le ahi puoi; khutichun, LALPA na Pathien dân thu hun piekte leh zuih dinga ka gente hi zui dik thei un lau.

³Peor tânga LALPA thilhih kha na mit ngêi un na mu ta ngâl u a: Peor muna Baal hote chengcheng LALPA na Pathien un na lak u apat in a sumangthai a.

⁴Ahih ziekin, LALPA na Pathien uh tudet te cheng vang chuh tuni tieng hin hing leh dam in na um chiet u a.

⁵“Ngaitiem u, na valuoh dinguh gama chule na zuih zel dingun LALPA ka Pathien in thu ei piek bang takin dân haw leh thutanna haw chuh ka hun sinsak a.

⁶Khutichun, pawm det un la, hih uh; zie dân haw chengcheng hi he a, ‘Zie nam lopi takte hi miching leh hetthiemna nei ahi na maizen u e,’ hun ti nam dangte mitmuh achun zie chun na chit zieu leh hetthiemna na neih zieu taklang ina.

⁷“I sap cheng u a LALPA I Pathien un ei naih zieng guola amau naih zieng sek Pathien nei nam thupi dang kuo a um?

⁸Hiti lâwm lâwma kitûp, dân haw leh thutanna haw, tunia na masang u a ka zam haw tawbang dân nei nam thupi dang kuo a um?

⁹Bang hita lele, kivengphau inla, ngaikhawk takin nangmau ki-enchien phawt mai un; khutilochun na mit ngêi u a na thil muh hawu chuh hengilh in, na damsung un na lungthim u apat in bei kha khâna; na chateu leh na tuteu le sinsak un;

¹⁰chun, Horeb tânga LALPA na Pathien uh masanga na din u a, LALPA’n ka kawma, ‘Mipite chuh ei sap khawm sak in, lei chunga a um sung cheng u a ei lauh dân a het theihna dingun leh a chateu a sinsak theihna dingun ka thu haw a na hetsak ing ka,’ ei tih ni kha le hengilh kha’n lau.

¹¹“Khutichun, na hun naih u a, tâng bul achun na hung ding u a, vanlaizawl sun tâng chuh thimte, meipite, meipi thim sah mepmup te um sak in mei a kuong a.

¹²Chun, LALPA chun mei kuong apat chun a hun hopih a; aw git na zau a, ahih ziekin, mellepâng nei bangmah na mu puou a, aw git chauh na heu ahi.

¹³A thuthun na zuih ding u a thu a hun piek, Thu sawm piek chuh na kawm u ah a phuong a, suongpek nih ah a zika.

¹⁴Zielai chun, chieh galkai a na va luoh dingu gama chuh na zuih ding u a dân haw leh thutanna haw chuh nang uh hun hilh dingin LALPA’n thu ei pie a.

¹⁵“Zieziekchun, chingthei ten un; Horeb tânga LALPA’n meikuong lak apat a hun hopih ni a khah mellepâng nei bangmah na muh loh ziek u khan,

¹⁶milim haw poh kisiem kawmin, pasal tawbang ahim, numei tawbang ahim,

¹⁷lei chunga gamsa tawbang ahim, huih laka leng vacha tawbang ahim,

¹⁸leituol a bawkvak ganhing tawbang ahim, nuoia tui laka um nga tawbang ahim haw poh hun kisiem in hung kisusie kha’n lau;

¹⁹Ahihloh leh, na mit u a van lam a dâk to in, nisa ahim, thapi ahim, aksi haw leh vanthamzawl a thilsiem chuom chuom te, LALPA na Pathien un van nuoia nam chuom chuom te dinga a guotsak haw ahim chuh na muh tieng u leh hun hîp mang in, hun ho in, a nau hun sem kha’n lau.

²⁰LALPA chun a mite, a go hiding in thik hâltuina apat, Aigupta gam apat chuh ahun puihdawk zawk na hiu hi, tu a na hih na bang u hin.

²¹Zie chauh chule hilo in, nang haw ziekin LALPA chuh ka chungah a lungna a, Jordan lui chuh ka kaih loh a, na luoh ding u a gam phatak LALPA na Pathien un a hun piek u achun ka lut lohna dingin le a kihâksiel tai,

²²kei chuh zie gama hi thi ding ka hi a, Jordan lui chuh kailo ding ka hi; himahleh, nang haw vang chuh kai in na tin un, zie gam phatak chuh luoh in lau.

²³Kivengpha ten mai un, khutilochun LALPA na Pathien un nang u tawh a thuthun chuh hengilh in, LALPA na Pathien un bang mel pu a le siem a phal loh milim haw poh hun kisiem kawm kha vei un lau;

²⁴LALPA na Pathien u chuh mi katum nuom mei, thikthusie Pathien ahi ngâla.

²⁵“Chun, tu leh chate na hun neih u a, zie gama chuh sawttak na um nung u a, na hung mantheihloh u a, bang ahim kibatpih milim na kisiem u a, a lung suna dinga LALPA na Pathien u mitmuha thil phalo na hun hih himhim u chun,

²⁶Jordan gâlkai a, na va luoh dinguh gam apat chuh beimang pai zieng ding na hiu hi tih na chungchâng thuu a ei hetpih dingin tuhin lei leh van ka sam hi; cheng sawt puo’n na tin un, beimang vek zieng inlau.

²⁷LALPA chun namtin lak ah hun thehzak intin, LALPA’n a hun thehzakna nam haw lak achun tawmcha chauh hingdawk inlau.

²⁸Zie chun muh la mu theilo, het la he theilo, nek la ne theilo, thil gim le he theilo, mihing siemkawm thing leh suong Pathien haw chuh ho inlau.

²⁹Himahleh, zie apat chun le LALPA na Pathien u chuh na hawl u a, na lunggil cheng u leh na lungthim chengcheng uh a na hawl u chun mu kit inlau.

³⁰Gimtheihna hun thuok u a zie thil chengcheng chuh na chungu a a hung tun tieng leh, a tâwp a tâwp leh LALPA na Pathien lam uh hun nga kitin na tin un, a thu chuh hun pawm ta’n lau;

³¹LALPA na Pathien u chuh zahngai thei Pathien ahi ngâla; hun thahtham puo’n tin, hun sumangthai puo’n tin, na pileputeu kawma kihâksiela a thuthun chuh hengilh hiel puo’n a.

³²“Na masang uh, na malai nite chuh vak sût leu chin Pathien in lei chunga mihing a siem ni apat khan kâwl mawng langkhat apat a lehlam chanin zie tawbanga thil thupi hi a um ngêi in, het ahi kha mawngmawng em?

³³Mei lak apat thu hun gen Pathien aw nang u guola he a hing nalai mi a um kha?

³⁴Ahihloh leh, LALPA na Pathien un Aigupta gama na mitmuh ngêi u a a hih guola patepnate, thilmakte manga nam dang lak apat amah dinga nam khat puihdawk guo pathien a um kha mawng mawng em?

³⁵LALPA chuh Pathien ahi tih na het theihna dingun na kawm u a suklat ahi a; amah tih loh adang himhim a um puoi.

³⁶Nang uh, a hun sinsak theihna dingin van apat in a aw a hun zak saka, lei chung ahin a mei thupi tak chuh a hun muh saka, zie mei lak apat chun a aw na zau a.

³⁷Na pu na pateu a hehpih ziekin a nung u a a suonteu chuh a hun tel a, a umpihna leh a hatna nasatak chun Aigupta apat a hun puidawk a;

³⁸A thilhih theihna thupi takin nam dang, nang u sanga thupi zaw leh hatzawte a hun nawhdawk saka, a gam u chuh luoh dinga hun lut sak in Aigupta gam apat chuh a hun puidawk a, tu a na hihnau guol ngêi hin.

³⁹Zieziekchun, tuni hin na lunggil un vawp unla, chunglam van a leh nuoi lam leia hin le LALPA chuh Pathien ahi tih heu in; adang himhim a um puoi tih heu in.

⁴⁰Zieziekchun, kumkhuo a dinga LALPA na Pathien un a hun piek gama chuh nang u leh na suonteu na hung lamzan u a na chên sawt theihna dingun a dân haw leh a thupiek haw, tu a ka hun piek hi na zuih dinguh ahi,” tih hi.

⁴¹Khutichun, Mosi chun Jordan gâl suohlam pang achun khuo thum a guot chuom a;

⁴²Tuma lama a na kimelmakpih le hi khello a invengte that khapalh haw a gâl taihna dingun; zie khuo laka khat pên pên a chuh a taihlut phawt chun hing ina;

⁴³Zie khuo haw chuh Reuben te dingin, gamthip a tângzawl chunga um, Bezer khuo ahi a, Gad te dingin, Gilead gama Ramoth khuo ahi a, Manasseh te dingin, Bashan gama Golan khuo ahi.

⁴⁴Chun, zie hi Mosi’n Israel suonte dân a piek chuh ahi;

⁴⁵Zie hetsakna haw leh thutanna haw hi Aigupta apat a hung pawt lai u a,

⁴⁶Jordan suohlam a, Beth Peor gala, guom sunga, Aigupta apat a hung pawt lai u a Mosi leh Israel suonte’n a thah uh, Heshbon-a um, Amor te lengpa, Sihon gama a piek chuh;

⁴⁷Amah gam chuleh Bashan lengpa Og gam, Jordan suohlam panga um Amor leng nih te gam, chuh a luoh u a;

⁴⁸Zie gam huopsung chuh Arnon guom panga um Aroer khuo apat mâllam a Sirion tâng chanin ahi a (zie chuh Hermon tâng le a tiu);

⁴⁹Chun, Jordan gâl suohlam panga Arabah chengcheng leh simlam Tuipi Thi chanin, chun, suohlam a Pisgah tâng kên kai chan ahi.