Read Gangte DAN NIHNA 5 Bible Online

DAN NIHNA 5 - Gangte bible

DAN NIHNA 5

¹Chun, Mosi’n Israel suonte chengcheng chuh a sam khawm a, a kawm u ah, “Aw, Israel mite haw, na zil u a, na zuih u a, na hih ding u a dân haw, thutanna haw na hetnau a tunia ka gen hi chingthei takin ngaithau in.

²LALPA I Pathien un Horeb achun I kawm u ah thuthun a siem a.

³LALPA chun zie thuthun hi I pileputeu kawma khan a thun puoh a, eihaw lawi, tu chana hing leh dama um nalai chengcheng te kawma hin ahi zawi a thun chuh.

⁴LALPA chun tângah kimaichangtuoh in meikuong in a hun hopih a,

⁵(Zie lai chun LALPA thu hun kâwkmuh dingin LALPA tawh na kikal u ah ka dinga; meipi ziek chun na lau u a, tâng achun na chieh ta puou a)

⁶“Kei hi LALPA na Pathien uh, Aigupta suok apat hun puidawkpa chuh ka hi.

⁷“ ‘Kei tihloh chuh Pathien dang himhim na neih ding ahi puoi.

⁸“ ‘Milim siemkawm, chunglam van a thil um lim ahim, nuoi lam lei chunga thil um lim ahim, lei nuoi lama tui laka thil um lim ahim, a khawipen kibatpih chuh hitaleh na kisiem ding ahi puoi;

⁹Ziehaw masanga chuh khun a na ho ding ei puoh a, a nau le na sep ding ei puoi; kei LALPA na Pathien hi Pathien thikthusie, pate manlohna zieka chate gawt seka, ei hawte chuh khang thumna leh khang lina chana gawt sek,

¹⁰Himahleh, ei hehpih a ka thupiek haw pawmte sang tamtak te chunga lungsietna latsak sek ka hi hi.

¹¹“ ‘LALPA na Pathien min chuh na mawk suoh maimai ding ahi puoi. LALPA chun a min suoh mai maite chuh thiemloh chansak lo a pawtdawk sak ding ahi puoh ngâla.

¹²“ ‘LALPA na Pathien in thu a hun piek guolin chawlhni chuh na nit thiengtho zing ding ahi.

¹³Ni gup sungin sem in na tin, na na chengcheng chuh na sep ding ahi;

¹⁴Himahleh, a ni sagih ni chuh vang LALPA na Pathien dingin chawlhni ahi; zie ni chun na himhim na sep ding ahi puoi, nang le, na chapa’n le, na chanu’n le, na suokpa’n le, na suoknu’n le, na bâwngchal inle, na sabiltung inle, na suokpate, na suoknu te le a chawlh theihna dingun.

¹⁵Nang le Aigupta gama khan suok na hi ta a, LALPA na Pathien in zie apat chuh khut hattak leh bân zaka a hun puihdawk na hi tih hezing in; ziezieka chuh LALPA na Pathien in chawlhni nit thiengtho ding thu a hun piek ahi.

¹⁶“ ‘LALPA na Pathien in thu a hun piek guolin na nu leh na pa zahbawl in; khutichun, LALPA’n gam a hun piek ahin lamzang in na tin, dam sawt ding na hi.

¹⁷“ ‘Tuol na thah ding ahi puoi.

¹⁸“ ‘Zawl na saih ding ahi puoi.

¹⁹“ ‘Na gûk ding ahi puoi.

²⁰“ ‘Na invengte chunga hetpih diklo a na pan ding ahi puoi.

²¹“ ‘Na invengte zi na awhchâk ding ahi puoh a, na invengte In ahim, lo ahim, suokpa ahim, suoknu, bâwngchal ahim, sabiltung ahim, na invengte thil bangmah na awhchâk ding ahi puoi,’ ti’n.

²²“Zie thu haw hi tânga khan meikuong haw leh meipi haw leh thim sah tak haw apat in aw ngeih tak in kikhawmte chengcheng kawmah LALPA’n a gena, a behlap diek ta puoh a. Ziehaw chuh suongpek nih ah a zika, ei pie ta a.

²³“Chun, tâng chuh mei in a kâk laia, thim apat a aw gi na vak zak phet u khan hiti hi ahi a, nei hun naih u a, na phung makaiteu chengcheng leh na upateu chun ka kawmah;

²⁴Ngaitie, ‘LALPA I Pathien u chun I kawm u ah a thupi zie leh a lopi zie a latsak a, mei apat a a aw chuh I za tau a; Pathien in mi a hopih leh thihna ahi diek sam puoi tih tuni hin I mu tau a.

²⁵Ahih ziekin, bang ziekin e I thih ding uh? Zie mei nasatak hin ei kângtum mai ding ei ve; LALPA I Pathien awu chuh I zak kit u chun thi mai ding I hiu hi.

²⁶Taksa nei taphawt mei apat a Pathien hing aw I het guol u a he a, hing nalai kuo a um?

²⁷Nangin va naih inla, LALPA I Pathien un a gen ding chengcheng chuh nang keihaw kawmah gen inla, khutichun, ngaitha’ng ka ting un, zui ing kau,’ na tiu a.

²⁸“Chun, nei hopih lai u a na thugen u chuh LALPA’n a na he a; khutichun, LALPA’n ka kawmah, ‘Zie mipite’n na kawma a thu gen u chuh ka na he a; a thugen chengcheng u chuh adik ahi.

²⁹Zie bang lungthim chuh pu sek leu aw, ei lau intin un, ka thupiek haw chuh zui zing intin un, amau leh a chateu haw le kumkhuo a lamzang ding ahiu a!

³⁰A kawm u ah, Na puon-In chiet u ah chieh kit un, va tih.

³¹Himahleh, nang vang chuh ka kawmah ding inla, a luoh ding u a gam ka pieka a zuih ding u a na sinsak ding thupiekte chengcheng leh dân haw leh thutanna haw chuh hun hilh ing ka,’ a ti a.

³²“Zieziekchun, LALPA na Pathien uh thupiek guola hih dingin chingthei un; changlam ahim, veilam ahim a na pet dinguh ahi puoi.

³³Na valuoh dinguh gama chuh na um u a, na hung lamzan u a, na dam sawt theihna dingun, LALPA na Pathien un thu a hun piek chengcheng chuh na zuih suok kêi dinguh ahi.