Read Gangte DAN NIHNA 9 Bible Online

DAN NIHNA 9 - Gangte bible

DAN NIHNA 9

¹Aw, Israel mite haw, ngaitiem u, nang u sanga thupi zaw leh thilhih thei zaw nam haw, khawpi van dawt hiel a kulh nei leh thupi taktak luoh dingin tuni hin Jordan chuh kân ding na hi tau a,

²Milien taktak leh sang taktak, Anak suonte masanga kuo a ding thei ding ti a a chanchin uh na zak sau khah!

³Zieziekchun, LALPA na Pathien u chuh katum zieng mei guola na mau a chieh sek chuh ahi tih tuhin heu in; amah chun amau chuh na mau ah sumangthai intin guollah in kawih intin; khutichun, LALPA’n a hun na tiem guol ngêi khan, amau chuh nawhdawkin na tin un, sumangthai pai ding na hiu hi.

⁴“LALPA na Pathien un a hun nawhdawk sak nung chuleh, ‘I diktatna ziek u a zie gam hi luoh dinga LALPA ei puihlut I hiu hi,’ na lungthim un ti hiel kiu in; zie nam haw hi a gitloh ziekun ahi zawi LALPA’n na mau a a hun nawhdawk sak ding chuh.

⁵Na fel ziekun ahim, na lungthim dik ziekuh ahim a a gam u chuh luoh ding na hi puou a, zie nam haw gitloh ziek leh LALPA’n na pileputeu Abraham leh Isak leh Jakob kawma a kihâksielna thu sudet dinga LALPA na Pathien un amau chuh a hun nawhdawk sak ahi zawi.

⁶Zieziekchun, zie gam phatak hi na fel ziek u a luoh dinga LALPA’n a hun piek ahi puoi tih hi heu in; mi luhlul tak na hi ngâl u a.

⁷“Gamthip a LALPA na suklungnat sek dân u kha hezing unla, hengilh kiu in; Aigupta gam apat na pawt niu apat a zie mun hi na hung tun chan u khan LALPA chungah na hel zing ngâl u a.

⁸Horeb a khan le LALPA na sulungnau a, hun sumangthai nuom hielin LALPA a lungna a.

⁹Suongpek, na kawm u a LALPA’n thu a thunna suongpek la dinga tânga ka kal toh lai khan ni sawmli leh zan sawmli tâng achun ka va uma; chângthâk le ka ne puoh a, tui la ka dâwn puoh a.

¹⁰Chun, LALPA chun suongpek nih, Pathien khutzung a zik chuh ei pie a; zie chung achun kikhawpkhawm ni a tâng chunga mei lak apat LALPA’n na kawm u a a phuon thupiek chengcheng khah a chuong hi.

¹¹Chun, ni sawmli leh zan sawmli nung chun hiti hi ahi a, suongpek nih, thuthunna suongpek chuh LALPA’n ei pie a.

¹²“Chun, LALPA chun ka kawmah, ‘Kipan inla, zie apat hin chieh suk meng ah; Aigupta gam apat a na puihdawk, na mite chuh a kisusie zo tau khu; hawh dinga thu ka piek lampi apat chun kintakin a pet tau a, milim pathien a kisiem tau khu,’ a ti a.

¹³“Chun, LALPA chun, ‘Zie mite hi ka et ka et leh, ngaitie, nam luhlul tak ahiu a;

¹⁴Amau sumangthai ding leh vannuoi apat a min uh thaimang dingin ei thahzan mai in; chun amau sanga nam thilhih thei zaw leh thupi zaw nang apat in siem ing ka,’ ti’n ei hopih a.

¹⁵“Khutichun, tâng apat chun ka hung suka, tâng chuh mei in a kang a thuthunna suongpek nih chuh ka khut nih in ka chawia.

¹⁶Chun, ka vak et leh ngaitiem u, LALPA na Pathien u chungah thil na hihkhiel tau a; bâwngno lim sunkawm na kisiem u a, LALPA’n thu a hun piek lampi apat chun kintakin na pet tau a.

¹⁷Chun, suongpekte nih chuh ka chawi a, ka khutte nih apat chun ka paih a, na muhna ngêi u ah ka suphel ta a.

¹⁸Chun, zie maa ka hih guol khan ni sawmli leh zan sawmli LALPA ma ah ka bawkkhup a; a lung suna dinga LALPA mitmuha na hih uh na gitlohnateu chengcheng ziek chun chângthâk la ka ne puoh a, tui la ka dâwn puoh a.

¹⁹Nang haw hun sumangthai nuom khawpa LALPA lungnatna leh hachangthakna leh lungkim lohna nasatak chuh ka lau ngâla. Ahih ziekin, zie chung chun le LALPA’n ka thu ei ngaihthak saka.

²⁰Chun, Aron chuh sumangthai nuom khawp in LALPA chuh a lungna a; ahihziekin, Aron ding chun ka paucham zieng a.

²¹Na gitlohna ziek u a na siem uh bâwngno lim chuh ka la a, mei in ka hâla, ka sugawp a, leivui bang hielin ka gawi nêl a; chun, a nêl chuh tâng apat a hung luong lui achun ka paih ta a.

²²“Chun, Taberah ale, Massah ale, Kibroth-hattavah ale LALPA chuh na sulungnau a.

²³Chun, LALPA’n, ‘Gam ka hun piek chuh va luoh un,’ ti a Kadesh-barnea apat a a hun sawl lai khan le LALPA na Pathien u thupiek chuh na helsan u a, amah chuh na taksang puou a, a aw chule na ngaitha puou a.

²⁴Ka hun het tûng apat in le LALPA chunga hel hat mi na hi zing u a.

²⁵Khutichun, LALPA’n ‘Sumangthai ding ka hi,’ a hun tih ziek khan LALPA ma ah ka bawkkhup a, ni sawmli leh zan sawmli ka bawkkhup kha.

²⁶Chun, LALPA kawm achun ka paucham a, ‘Aw, LALPA Pathien, na thilhih theihna thupi taka na tatdawk, Aigupta gam apat a khut hât taka na puih dawk na mite leh na gochante hi sumangthai ki’n.

²⁷Na suokte Abraham leh Isak leh Jakob chuh hezing inla, zie mipite luhlulna leh a nunsiet nau leh a gitlohnau hi kimuhloh sak in;

²⁸Khutilochun, nei puih dawkna gama mite chun, LALPA’n a gam tiem a chuh a puih lut theih loh ziek leh a hawt zieka gamthip a suklup dinga a puih dawk ahiu ui, ti kha’n au.

²⁹Na thilhih theihna thupi tak leh na bân zaka na puih dawk, na mite leh na gochante ahi ngâl u a,’ ka ti a.