Read Gangte JOHAN 10 Bible Online

JOHAN 10 - Gangte bible

JOHAN 10

¹Chun, Isu’n, “Tihtakzet, tihtakzet in ka hilh na hiu hi, kuole, belam huong a kawtkhaka lut lo a, mun chuom khata kal dawka lut chuh, zie chuh gucha leh suommang ahi.

²Kuole, kawtkhaka lut vang chuh, belam chingpa a hii.

³Kawtkhak ngakpa’n amah chuh a na hawn sak sek a; a belamte chun a aw a zau a; chuleh, a belamte chuh amin un a sama, a puidawk sek hi.

⁴Amah a cheng a thahdawk tieng leh, a masang u ah a chieh sek a, belamte chun amah a zui sek, a aw a zak sek ziekun.

⁵Mi dang vang chuh zui puou untin; taih mang san zaw’nau, mi dang aw chuh a het loh ziekun,” a ti a.

⁶Zie tehkal thu chuh Isu’n a kawm u ah a gen a, himahlele, a kawm u a bang thugen a hih a he dawk thei ngâl puou hi.

⁷Khutichun, Isu’n a kawm u ah a gen kit a, “Tihtakzet, tihtakzet in ka hilh na hiu hi: Kei hi belam kawtkhak chuh ka hii.

⁸Ka masanga hungte chengcheng kha gucha leh suommang ahiu a, belamte chun a thuu a ngaitha puou hi.

⁹Kei kawtkhak chuh ka hi. Kuole, keimah a lut ta chuh, humbit in um intin, lut in pawt intin, nek ding le kimuh ina.

¹⁰Gucha chuh, gu ding leh, that ding leh susie ding ngâllo chun a hung sek puoi. Kei vang, hin na neihna ding u leh, tamtak a na neih na ding u a hung ka hi zawi.

¹¹“Kei belam chingpa pha ka hi, belam chingpa pha’n belamte dingin a hinna a pie sek hi.

¹²Kithalak, belam chingpa tak hilo a, belamte le amah a hilo te chun, ngêi hung a muh tieng leh, belamte a taihsan sek a; tichun, ngêi chun belam haw chuh a pet a, a sudalh sek hi.

¹³Kithalak mai a hi a, belamte a limsak loh ziekin, a taimang sek a hii.

¹⁴Kei belam chingpa pha ka hi a, ka belamte ka he a, chun, ka belamte’n le ei heu hi.

¹⁵Pa’n kei ei het leh, ken Pa ka het guol hin, keia te chuh ka he a, amau inle ei heu hi. Belamte dingin ka hin ka pie sek hi.

¹⁶Chun, zie belam huong a um tih loh hi, belam dang le ka nei hi; amau chule hun pui ding ka hi; ka aw le he’nau; khutichun, lawikhat in um un tin, a chingpa khat tawh.

¹⁷“Zieziek hin Pa’n ei hehpih ahi, lak kit dinga ka hinna ka piek ding ziekin.

¹⁸Kuoma’n ei lâksak thei puo’n a. Keimah thu thu a pie ding ka hi zawi. Pie thei ka hi a, la kit thei le ka hi. Ziehi, ka Pa’n thu ei piek chuh ahi,” a ti a.

¹⁹Zie thu haw ziek chun, mipite lak achun kibungkhenna a hung um kit ta a.

²⁰A lak u a mi tamtakin, “Thitha a vawp a, ngawl a hi hi; bang zieka a thu ngaitha?” a tiu a.

²¹Himahleh, abang in vang, “Zie thu haw hi, thitha vawp thugen ei puoi. Thitha’n mitdûk mit a suvak theia ahim?” a tiu a.

²²Chun, phalbi lai ahi a, chuleh, Pathien Ho-In latna Kut le Jerusalem a mat lai tak ahi.

²³Isu chuh Pathien Ho-In a Solomon bithaliep achun a vak viel a,

²⁴mipite chuh a kawmah a hung khawm u a, a kawmah, “Bang chana ginleduop a nei kawih dinguh? Krista na hih chun, chientakin kei uh nei hilh ah,” a tiu a.

²⁵Isu’n a kawm u ah, “Ka hun hilh ta kha la, na gingcha nuom puou a. Ka Pa min a thil ka hih hin, ka chanchin a hetsak ahi.

²⁶Himahlele, na gingcha ngâl puou a, ka belamte laka na hih loh ziekun.

²⁷Ka belamte’n ka aw a ngaitha sek ui; ken le amau haw chuh ka he a, amau chun ei zui sek ui.

²⁸Amau haw chuh kumkhuo a hinna ka pie a, thi ngei ta puo’n au. Kuoma’n ka khut apat ei chuhthâk sak ta puo’n au.

²⁹Amau haw ei pie pa, ka Pa chuh, mi chengcheng sanga lopi zaw ahi; kuoma’n Pa khut apat chun chuhthâk sak thei puo’n au.

³⁰Kei leh ka Pa chuh pumkhat ka hi ngâl u a,” ti’n a dâwng a.

³¹Ziephet chun, mipite chun a sehna dingin suong a luok kit u a.

³²Isu’n amau chuh a hopih a, “Pa’n hih dinga ei piek, thilpha tamtak, nang haw ka hun etsak a, ziehaw laka khan, a bang pên ziek khan em, suong a nei seh dinguh?” a ti a.

³³Amau chun a dâwng u a, “Nasep pha ziekin, suongin hun sep puo’ng kau; Pathien na gensiet ziek leh, nang mihiem hi ngâl a, Pathien a na kisiem ziek hin ahi zaw’i,” a tiu a.

³⁴Isu’n a kawm u ah, “Na Dan Lehkhabuu ah, ‘pathien haw na hiu ka tii,’ tih zik hilo ahim?

³⁵Pathien thu tunnate bawn, pathiente a tih u chun, Pathien lehkha thu’n a gen chu la a kitheng ngei puoh ngâl a.

³⁶Kei ka hih leh, Pa’n ei tel a, khawvel a hin ei sawl ka hi ngâl a. Khutichun, ‘Pathien Chapa ka hi,’ ka tih ziekin bangtia Pathien na gensiei, nei tih uh ahi?

³⁷Ka Pa nasem ka hih loh chun, ei gingcha kiu.

³⁸Amahvang chuh, sem ka hih chun, kei ei gingcha kileu chin le, nasephaw bêk hi gingchau in; Pa, keimah ah a um hi tih leh, Kei, Pa ah ka um hi tih na het u a, na ginchak theih na dingun,” ti’n a dâwng a.

³⁹Khutichun, Isu chuh mat a guo kit tau a, himahlele, a khut u apat a pawt a.

⁴⁰Tichun, Isu chuh, Jordan lui gala, Johan in mi a baptist na a khan a chieh kit a, taka chun a um zing ta a.

⁴¹Chun, mi tamtak a kawmah a hung u a, “Johan in thilmak bangmah a hih puoh a; himahlele, Johan in zie pa chungchâng thu a gen khah a na dik ten hi,” a tiu a.

⁴²Chun, zie tak mun achun, mi tamtakin amah a gingcha tau hi.