Read Gangte JOHAN 12 Bible Online

JOHAN 12 - Gangte bible

JOHAN 12

¹Chun, Chiehkân Kut masang ni gup chun, Isûn thihna apat a a kaihthawh, Lazarus umna khuo Bethani khah a hung tung a.

²Zie tak achun amah a dingin guolvakna a siem u a, zie chun, Martha chuh a tawiviel in a pang a, Lazarus chu la Isu ankuong ûmpih in a pang a.

³Tichun, Mari’n, khaih kimkhat, spiknard thau gimlim man tamtak a hun chawi a, Isu kênghaw chuh a nuh a, a sam in a kênghaw chuh a thiek a; tichun, zie thau gim chun In sung chuh a zel suok chai chai zieng a.

⁴Himahlele, Isu sinsakte laka mi khat, Juda Iskariot a matsak ding pa chun,

⁵“Zie thau gimlim hi bangati a, makhai zathum a khawng a, mi gimtheite kawma pie zaw lo?” a ti a.

⁶Mi gimtheite a khawksak zieka zie thu hi a gen ahi puoi, gucha ahi a, dangkadip a vawp a, a sunga kikawih haw chuh a lak sek ziekin ahi zawi.

⁷Chun, Isu’n, “Khutichun um sak un! A thil neih chuh ka kivuih ni a dingin sit heh.

⁸Mi gimtheite chuh kumkhuo a na kawm u a um zing ahiu a; kei vang chuh, kumkhuo a na kawm u a um ding ka hi puoi,” a ti a.

⁹Chun, Isu chuh Bethani khuo achun a um hi tih Juda mipite chun a he tau a, tak achun a hung u a, Isu ziek chauh a hung ahi puou a, Isu’n thihna apat a a kaihthawh Lazarus khale muh nuom kawm ahiu hi.

¹⁰Khutichun, thiempu liente chun, Lazarus chule thah dingin a kidawp tau a,

¹¹Amah zieka Judate tamtakin, a taihsan u a, Isu a ginchak ziekun.

¹²Chun, a zing chun, Kut na a hung mipi tamtakin, Isu Jerusalem khuo a hung ding a hi tih a he tau a.

¹³Khutichun, tûmbâk haw chuh chawiin, a muok dingin a chieh u a, “Hosanna, LALPA min a Israel Leng hung chuh a hamphai,” ti’n a kiko u a.

¹⁴Chun, Isu’n sabiltung no a mu a, a chungah a chu a,

¹⁵“Lau kih, Zion chanu; Entie, na Leng chuh! Sabiltung no chunga chu’n, Hung ding a hii,” ti a Pathien lehkhabu a zik guol khan.

¹⁶Ziehaw chuh, a tûngin a sinsakte’n a he puou a; himahlele, Isu limbawla a um nung leh, a chanchin ah zie thu haw chuh zik a hii tih leh, a chungah ziehaw chuh a na hih nau hi tih a na he tau hi.

¹⁷Chun, Lazarus thân apat a sap dawk a, mithi lak apat a kaih thawh laia, a kawma mipi umte khan a thu chuh a hetsak zel tau a.

¹⁸Zieziekchun ahi, mipite chun a mah a va muok uh, zie thilmak chuh a hih hi tih a he ngâl u a.

¹⁹Khutichun, Pharisaite chun, “He tau in, bangmah na lawh thei puou hi! en un, khawvel in amah a zui tau hi!” a tiu a.

²⁰Chun, Kut hun sunga Pathien va chibai dinga Jerusalem a va chiehte lak achun, Grik mi khenkhat a tel u a.

²¹Ziete chuh, Galili gama Bethsaida khuo a um, Philip kawmah a va chieh u a, a kawmah, “Hepu, Isu muh ka nuom ui,” a tiu a.

²²Philip chun Andrew a va hilh a, chun, Andrew leh Philip chun Isu a va hilh tau a.

²³Isu’n a dâwng a, a kawm u ah, “Mihiem Chapa limbawla a um phat chuh a hungtung tai.

²⁴Tihtakzet, tihtakzet a ka hilh na hiu hi, buh chang leia a kiek a, a thih loh chun, amah mai in a um zing sek; a thih le chuh tamtakin a gah sek hi.

²⁵Kuole, a hinna thalah chun a chan sek a; kuole, zie khawvel a hi, a hinna ngaitam chun, kumsawt a hinna ding vawp zing ina.

²⁶Kuo’n le, keia ding a sep nawp chun, ei zui heh, ka umna ah kei dinga sempa le um ina; kuo’nle, kei ding a sep chun, amah chuh Pa’n limbawl ina.

²⁷“Tu’n ka lung a dawng hi; bang ka gen ta die aw? ‘Hepa, zie hun apat hin ei hukdam in,’ ka ti die leh aw? Bang hilele, zie gimtheihna thuok hi ka hung lawh ahi ngâl a.

²⁸Hepa, na min limbawl ah,” a ti a. Ziephet chun, van apat in aw a hung pawt a, “Ka limbawl tai, limbawl kit zel ing ka,” a hun ti a.

²⁹Zie taka mipi dingte chun aw chuh a zau a, khenkhat in, Van gi ahi, a tiu a; a dangin, “Vânsâwlchâk in amah a hopih a hii,” a tiu a;

³⁰Isu’n a kawm u ah, “Zie aw chuh keia dinga hung kigen ahi puoh a, nangmau haw a ding ahi zawi.

³¹Tu’n zie khawvel hi a chung thu ngaihtuoh hun a hi ta a; zie khawvel vaihawmtu hi paihthak a um ding ahi.

³²Chun, kei lei apat a khaihkang a ka um chun, mi chengcheng ka kawmah hîp vek ing ka,” a ti a.

³³(Zie thu chuh a thih ding dante gen a na hi.)

³⁴Mipite chun a dâwng u a, “Ka Dan Lehkhabuu chun, Krista chuh kumlekhuo’n hing zing ina, ti’n ei hilh a puo! Aleh, bangti dana, nangin Mihiem Chapa hi khaihkang a um ding ahi na tih a? Zie Mihiem Chapa chuh kuo a hi?” a tiu a.

³⁵Chun, Isu’n a kawm u ah, “Vak hi chawmkhat na kawm u ah um tadih ina. Vak na neih sung u hin na thilhih teu hih zawm zel un, thim in a hun dal lohna dingin; kuole thima leng chun a chiehna chin a he sek puoi.

³⁶Vak na neih sung u hin, vak hi gingchau in, tichun, vak chate na hung hih theihna dingun” a ti a. Chun, Isu’n zie thu haw chuh a gen zawhin, a chieh manga, amau haw apat in a kisel mang ta a.

³⁷Zie thilmak chengcheng chuh amau haw umna ngêi ah hih mah lele, a gingcha diek puou hi,

³⁸Thiemgau Isai in a chungthuu a gen hi a hung guitun theihna dingin: “LALPA, ka thugen uh kuo a gingcha? LALPA thilhih theihna chule kuo chungah ahi suklata a um?” a tih hi.

³⁹Zieziek hin ahi a ginchak theih loh uh, Thiemgau Isai in:

⁴⁰“Pathien in a mit uh a hih dûk a, a lungthimteu a khâk sak a, Khutilochun a mit un mu khau un tin uh, A lunggil un he kha’n au, Tichun, hung kihei kit khau untin, Ken amau haw a na hihdam khang ka,” ti a a na gen ziek hin.

⁴¹Isai in a lopi zie a muh leh a chanchin a gen ziekin ziehaw chuh a gen ahi.

⁴²Zie hun tieng chun, Juda lawiupa tamtakin Isu chuh a gingcha tau a; himahlele, Pharisaite ziekin tângphuong takin a gen dawk puou, Kikhawpna In apat a nawhdawk a hih lohna dingun.

⁴³Pathien kipahpih a um sangin mihingte pahchak a um a ut zaw ngâl u a.

⁴⁴Chun, Isu chun aw ngeih tak in, “Kuole, ei gingcha chuh, kei ei gingcha ei puoh a, ei sawlpa gingcha ahi zawi.

⁴⁵Kuole, ei mu chuh ei sawlpa mu ahi.

⁴⁶Kei hi khawvel salhvak dinga hung ka hi, kuole ei gingcha ta chuh thima a um zing lohna dingun.

⁴⁷Mi’n ka thugente a zak a, a zawp diek loh chun, a chung thu ken ka tan puoi; khawvel thutan dinga hung ka hi puoh a, a hukdam dinga hung ka hi zawi.

⁴⁸Kuole, ei deih lo a, ka thugente pawm nuom lo chuh, a chungthuu tan sak ding khat a nei ui. Ni tawp ni chu leh, ka thugente ngêi hin ahi, amau haw chungthu a hun tan ding chuh!

⁴⁹Ka phuok kawma ka gen ei puoi, Pa ei sawlpa chun ka gen ding leh ka hilh ding chuh thu ei piek zawk ahi.

⁵⁰Amah thupiek chuh kumkhuo hinna a hi tih ka hêi; zieziekchun, thu ka gen hi, Pa ei hilh bang zel a ka gen a hi,” a ti a.