Read Gangte JOHAN 13 Bible Online

JOHAN 13 - Gangte bible

JOHAN 13

¹Chun, Isu’n, Chiehkân Kut maa zie khawvel hi pawtsan a, Pa kawma chieh phat a tung tai tih a he a. Amah mi, khawvel a um, a hehpih sekte chuh, a tâwp tiengin le a hehpih zing a.

²Isu leh a sinsakte’n nitâk Ankuong a um u a. Diabol in Simon chapa, Iskariot Juda lungthim achun, Isu matsakna dingin na a na sem zo kêi ta ngâl a.

³Isu’n, Pa’n thilhih theihna bukim a piek dân te. Pa kawm apat a hung pawt leh, a kawma chieh kit ding ahih dante chuh a hezing a.

⁴Khutichun, dawhkân apat chun a kipan a, a puon silh chungnung te chuh a kawih a, kithiekna puon a la a, a cheng a.

⁵Tichun, kuong ah tui a sung a, a sinsakte keng chuh a sil sak a, kithiekna puon a chen chun a thiek hul sak zel a.

⁶Khutichun, Simon Peter kawmah a hung a, amah chun a kawmah, “LALPA, nang lâwm lâwm in ka keng sil ding na hi a a hi?” a ti a.

⁷Isu’n a dâwng a, “Ka thilhih hi tu’n na he puoi, himahlele, tu nung leh hun he ding na hi,” a ti a.

⁸Peter in a kawmah, “Ka keng sil hiel puo’n la,” a ti a. Isu’n a kawmah, “Ka hun sil loh leh, ka kawmah bangmah chan nei puo’n la,” a ti a.

⁹Simon Peter in a kawmah, “LALPA, khuti chuh a hih leh, ka keng mai hilo in, ka khut leh ka luchang le la,” a ti a.

¹⁰Isu’n a kawmah, “Kisil sa chuh a keng tih loh sil a ngai puoi, a ngim kei hilo maw; nanguh na ngim ui, na bawn un vang ahi puoi,” a ti a.

¹¹(A matsak ding pa chuh a he ngâl a; zieziekchun, na bawn un vang na ngim puou, a tih ahi.)

¹²Khutia, a kenghawu a sil a, a puon a lak a, a chut kit phet chun a kawm u ah,

¹³Na chung u a ka thilhih hi bang tihna a hih na heu hi? Nang haw’n, “Sinsakpa leh LALPA nei ti sek ui; na ti dik ui, ka hi him hi.

¹⁴Kei Sinsakpa leh LALPA bawnin na keng uh ka sil chun, nangmau haw le na keng uh na kisil sak dinguh ahi.

¹⁵Na chung u a ka hih guola hi, nang haw’n le na hih na dingun ka hun lam pat sak ahi.

¹⁶Tihtakzet, tihtakzet a ka hun hilh na hiu hi; suok, a pu sangin a lopi puoi; sawlchak le, a sawlpa sangin a lopi diek puoi.

¹⁷Zie tawbang thudik na het u chuh hih leu chin, bang tienga kipâkin na um ta phet ding um maw!

¹⁸“Na bawn u a chung thu gen kei puoi, ka telte chuh ka hêi. Himahlele, ‘Ka chângthâk nekpihpa’n a khawtalzum ka chungah a lek tai,’ tih Pathien lehkha Thu kha a hung guitun theihna ding a hi.

¹⁹Tu akipat a hungtun ma’n ka hilh na hiu hi, a hung tun tieng leh, ‘amah kha ka’ hi tih na het theihna dingun.

²⁰Tihtakzet, tihtakzet a ka hilh na hiu hi, kuole, ka sawl ta poh lawp ta chuh keimah ei lawp ahi a, kei ei lawp chu le, ei sawlpa lawp a hii,” a ti a.

²¹Isu’n tawbanga chuh a gen zawhin, a lungthim in a lungkham a, “Tihtakzet, tihtakzet a ka hun hilh na hiu hi, na lak u a khat hin ei matsak unlau,” ti’n a gendawk ta a.

²²Ziephet chun, Sinsakte chun, kuo a tih chuom a he puou a, a ki-entuoh u a.

²³A sinsakte laka mi khat, Isu’n a hehpih chuh, dawhkân sika Isu kawm achun a chu a.

²⁴Simon Peter in zie pa kawm achun, “Kuo thu pên a hi a gen, vak dawng tie,” a ti a.

²⁵Khutichun, amah chuh Isu sik achun a kichawn naih deuh a, a kawmah, “LALPA, kuo pên a hi?” a ti a.

²⁶Isu’n, “Chângthâk thêm ka dieh saka, ka piek pên chuh hi’n a,” a ti a, a dâwng a. Khutichun, chângthâk thêm a dieh nung chun, a la a, Iskariot, Simon chapa Juda kawm achun a pie ta a.

²⁷Khutichun, Juda’n chângthâk a lak lak chun, Setan chuh a sung ah a lut ngâl ta a. Ziephet chun, Isu’n a kawmah, “Na hih ding ding chuh hih meng ah,” a ti a.

²⁸Dawhkân sika chuh haw kuomah chun, Isu’n bang zieka zie tawbang thu chuh a kawma gen ahim tih a he puou hi.

²⁹Sinsakte khenkhat chun, Juda chun dangka a vawp zieka, Kut na a dinga thil sinmawh cheng va chaw’n ti hoh ahim, Mi gimtheite kawma bang ahim khat piek ding gen hoh ahim, a tiu a.

³⁰Tichun, Juda chun chângthâk thêm chuh a la a, a pawt ngâl ta a. Zie chuh zan lai ahi.

³¹Chun, Juda’n a pawt san nung chun Isu’n, “Tuhin, Mihiem Chapa limbawl in a um tai, amah ziekin Pathien le limbawl in a um tai.

³²Amah zieka Pathien lopina suklata a um tâk ziekin, Pathien ngêi in, Mihiem Chapa lopina le sulang ina, zie chuh hih zieng ding ahi.

³³Naute haw, na kawm u a um sawt lo ding kei tai. Nang un nei hawl un na tin uh, himahlele, Judate kawma, ‘Ka chiehna ding ah hung thei puo’n lau’ ka tih guol khan, tu’n khuti mah chun, na kawm u ah ka gen a hi.

³⁴“Thutiem Thak ka nun piek na hiu hi, kihehpih unla; ken nanguh ka hun hehpih guol hin, nang haw le kihehpih tuoh chiet un.

³⁵Na kihehpih u chun, mi cheng chengin ka sinsakte na hiu hi tih, zie tak achun hun he’n au,” a ti a.

³⁶Simon Peter in a kawmah, “LALPA, hawi ah e na chieh ding?” a ti a. Isu’n, “Ka chiehna ding ah nangin tu’n nei zui thei puo’n la, tunung le vang chuh nei zui inla,” a ti a, a dâwng a.

³⁷Peter in a kawmah, “LALPA, bangati a e tu a le ka hun zuih theih loh ding? Nangmah ziekin ka hinna chan ing ka,” a ti a.

³⁸Isu’n a kawmah “Keimah ziekin na hinna chan ding maw? Tihtakzet, tihtakzet a ka hun hilh na hii; âk khuo’n masang in, nangin thum vei ei kizuksan inla” a ti a.