Read Gangte JOHAN 14 Bible Online

JOHAN 14 - Gangte bible

JOHAN 14

¹“Na lunggil uh lunggim kiheh; Pathien na gingchau hi, Kei le ei gingchau in.

²Ka Pa In ah umna tamtak a um a, a um loh chun, nanguh hun hilh ta’ng ka; nang u ding mun siem a chieh ding ka hi.

³Chun, nang u dinga mun ka va siem zawh tieng chu leh, hungkit ing ka ting, ka kawmah nanguh hun lang ka, ka umna a nang u le na um theihna dingun.

⁴Ka chiehna ding lampi chin na heu hi,” a ti a.

⁵Thoma’n a kawmah, “LALPA, na chiehna ding chin ka he dang u! a lampi bangti’n a ka het dinguh?” a ti a.

⁶Isu’n a kawmah, “Keimah hi lampi leh Thutak leh Hinna ka hii; keimah a chieh lo chuh, kuomah Pa kawm a tung ngei puou.

⁷Kei nei he leu chin, ka Pa le he ding na hi tau a; tu’n amah na he tau a, amah na mu ta ngâl u a,” a ti a.

⁸Philip in a kawmah, “LALPA, Pa chuh kei uh nei muh sak ta! tichun, kei u dingin hun set ina,” a ti a.

⁹Isu’n a kawmah, “Philip, chanpi hi na kawmah ka um a, khutisa chun le nei he puo maw? Kuole, ei mu chuh Pa mu a hii. ‘Pa chuh kei u le nei muh sak ah’ bangti tih a na tih ahi?

¹⁰Kei Pa a ka um leh, Pa keimah a um hi tih gingcha lo na hi maw? Na kawm u a ka thugen hi, keimah phuok kawma ka gen ei puoi; Pa chuh keimah ah a um zing a, zie chun thil a hih zawk sek a hii.

¹¹Kei Pa a ka um hi tih leh, Pa, keimah a um hi tih gingchau in.

¹²Tihtakzet, tihtakzet a ka hilh na hiu hi, kuole, ei gingcha chun, thil ka hih haw hi, ama’n le hih ina; ziehaw sanga thil lopi zaw hile hun hih ina, Pa kawma chieh ding ka hih ziekin.

¹³Chun, ka min a thil bang hitaleh na nget u chun, hih zel ing ka, ti a chuh Chapa zieka Pa limbawla a um theihna dingin.

¹⁴Nangun ka min a thil bang hitaleh na nget u chun, zie chuh hih zel ing ka.

¹⁵“Nangun nei hehpih u chun, ka thupiek haw chuh zawp unlau.

¹⁶Tichun, Pa kawmah ngên ing ka ting, ama’n Lungmuonpa dang nanguh hun pie’n a, kumkhuo a na kawm u a um dingin.

¹⁷Zie chuh Pathien chanchin diktak phuongdawk sek Thagau chuh ahi. Vannuoi in zie chuh a nei thei puou hi, amah a muh loh u a, het le a het loh ziekun. Nang haw’n vang, na kawm u a a um zing ziek leh, nangmau a a um ziekin, amah chuh na heu hi.

¹⁸“Thawmhau in nanguh hun nusieh puo’ng ka; na kawm u ah hungkit ing ka.

¹⁹Chawmkhat hal leh, khawvel in ei mu kit ta puo’n au; himahlele, nang u vang in chuh ei mu’n lau; keimah ka hin ziekin, nang haw le hing un lau.

²⁰Zie ni tieng chu leh, Kei pa a ka um leh, Kei nangmau a ka um guolin, keimah ah na um ui tih hun he’n lau.

²¹“Kuole, ka thupiek haw pawm a, zawp ta chuh, ei hehpih ahii. Kuole, ei hehpih chuh Pa’n, amah le hehpih ina; ken le amah chuh hehpih ing ka ting, a kawmah kilak ing ka,” a ti a.

²²Chun, Juda (Juda Iskariot lo zaw chun) a kawmah, “LALPA, keihaw kawma na kilak a, vannuoi kawma na kilak loh ding chuh bangti a hi?” a ti a.

²³Isu’n a dâwng a, “Mi’n ei hehpih chun, ka thu zawp intin, ka Pa’n amah chuh hehpih ina, tichun, a kawmah hung ing ka ting un, a kawmah um zing ung kau.

²⁴Kuole, ei hehpih lo chun, ka thu a zawp puoi; thu na het hawu hi keia ahi puoi; Pa, ei sawlpa a ahi zawi.

²⁵“Na kawm u a ka um pêt hin, zie thu haw hi ka hun hilh na hiu hi.

²⁶Chun, Lungmuonpa Thagau Thiengtho, Pa’n, ka min a a hun sawl ding khan, zie chun bangakai nanguh hun sinsak intin, na kawm u a ka gen chengcheng kha hun het dawk sak kit ina.

²⁷“Lungmuonna ka hun nutsieh na hiu hi; keimah lungmuonna ka hun piek na hiu hi; khawvel in a hun piek guolin ka hun piek na hi puou hi.

²⁸Na lunggil uh lunggim kiheh, lauh le lau kiheh. ‘Chieh mang ding ka hi a, na kawm u ah hungkit ing ka,’ ka hun tih khah na he tau kha. Nangun nei hehpih hi leu chin. Pa kawma ka chieh ding ziekin kipâk ding na hiu a, Pa chuh keimah sangin a lopi zaw ngâl a.

²⁹Tu’n, a hungtun ma hin ka hilh sa na hi tau hi, a hung tun tienga na ginchak theihna dingun.

³⁰Na kawm u ah thu gen kit man ta puo’ng ka, zie khawvel vaihawmpa hi hung ding ahi ta ngâl a; amah chun ka chungah bangmah hih theih him a nei puoi,

³¹himahleh, ken Pa ka hehpih leh, Pa’n thu ei piek bang zela thil ka hih hi, khawvel in a hetna ding ahi zawi. Kipan un, tak apat hin pawt hitiu.