Read Gangte JOHAN 15 Bible Online

JOHAN 15 - Gangte bible

JOHAN 15

¹“Kei Grep gui taktak chuh ka hii, ka Pa a huon ngakpa ahi.

²Ka kizawppih bâk gah lo ta cheng a paih sek a, a gah pha ta chuh a hih thiengtho sek hi, a gah tam zawk diek na’n.

³Na kawm u a ka thugen ziek chun, tu’nle na thiengtho pai zieng tau hi.

⁴Keimah ah um zingun, keile, nangmau ah um zing ing ka. Bâk chuh grep guia a um zing loh a amah maia a gah theih loh guolin, nang u le keimah a na um zing loh u chun, gah thei puo’n lau.

⁵“Kei grep gui chuh ka hi a, nang haw a bâk na hiu hi; kuole, keimah a um zinga, keile amah a ka um zing na chuh, zie mah chuh tamtakin a gah sek hi; keimah lo in bangmah na hih thei ngâl puou a.

⁶Mi, keimah a a um zing loh chun, bâk guola paih dawkin a um a, a vuoi sek; tichun, a chawm u a, mei ah a paih u a, a kâng sek.

⁷Nanguh keimah a na um zing u a, ka thu le nangmau a a um zing chun, na deih chenguh ngên un, nang u dingin hihin um ina.

⁸Zie vanga hi ka Pa le limbawla um ahi, tamtak a na gah u hin; khutichun, ka sinsakte hin lau.

⁹Pa’n ei hehpih guolin ken le ka hun hehpih na hiu hi; ka hehpih in um zingun.

¹⁰Nangun ka thupiekte na zawp u chun, ka hehpih in um zing unlau, ken le ka Pa thupiekte ka zawpa, a hehpih a ka um zing guol mah hin.

¹¹“Ka kipahna nangmau a a um zing na’n leh, na kipah uh a bukimna’n zie thu haw hi na kawm u a ka gen ahi.

¹²Ziehi ka thupiek ahi: Ken ka hun hehpih guol mah hin, nanguh kihehpih un.

¹³Mihiem in a guol sika a hinna a piek khela hehpihna nasa zaw kuoma’n a nei puoi.

¹⁴Thu ka hun piek cheng na hih u chun, ka guolte hi’n lau.

¹⁵Suok hun tikit ta puo’ng ka; a pu thilhih suok in a he puoh ngâl a; guolte hun ti zaw ta’ng ka; Pa apat a thil ka het cheng na kawm u ah ka phuong ta ngâl a.

¹⁶Nangun nei tel puou a, ken ka hun tel zawk na hiu ui; chieh a, sawttak a um zing dinga tamtak a va gah dingin ka hun guot na hi ngâl u a. Khutichun, ka min a Pa kawma na nget tak uh hun pie zel ina.

¹⁷Zie hi ka hun thupiek chuh a hi: Kihehpih tuoh chiet un.

¹⁸“Khawvel in a hun hawt u leh, a hun hawt mau in kei ei haw tau hi tih na he tau hi.

¹⁹Nang haw khawvel mi hi leu chin, khawvel in amah mite a hehpih ding a hii; khawvel a mi na hi ngâl puou a, khawvel a um, ka teldawk na hih zawk ziekun, khawvel in a hun hawt na hiu hi.

²⁰‘Suok, a pu sangin a lopi puoi’ tih ka hun hilh na hi tau kha, hezing un. Amau in kei ei bawlsiet tâk u chun, nang haw le hun bawlsie’n au; ka thu a zawp tak u chun nang haw thu le zawp un au.

²¹Himahleh, keia na hih ziekun ziehaw cheng hi na chungu ah hih un au, ei sawlpa a het loh ziekun.

²²Kei a kawm u a hunga thu gen lo hi leng, gitloh nei lo ding ahiu a; tu’n vang chuh a gitlohnau ah paulap ding a nei ta puou hi.

²³Kuole, kei ei haw chun, ka Pa le a hawt a hii.

²⁴Thil kuomah hih khâk loh cheng a kawm u ah hih kileng, gilo a thiemmawh kichanna nei lo ding ahiu a, tu’n vang chuh, amau in kei leh Pa chuh ka nih un ei mu tau a, hawt le ei haw a hi tau hi.

²⁵Bang hitaleh, Dan Lehkhabu ah, ‘Amau haw’n bangmah a ziek dukdak um lo in ei hawu ahi,’ tih zik kha a hung guitun theihna dingin ti ahiu hi.

²⁶“Chun, Pa kawm apat Lungmuonpa na kawm u a ka hun sawl ding chuh, Pathien chanchin diktak phuongdawk sek, Thagau chuh a hii. Amah chuh Pa kawm apat ka hun sawl ahi a, amah chun ka chanchin hun hetsak ina.

²⁷Chun, nangun le ka chanchin gen unlau, atûng apat ka kawma um na hih tâk ziekun.