Read Gangte JOHAN 16 Bible Online

JOHAN 16 - Gangte bible

JOHAN 16

¹“Na ginnau a na nungtawlh lohna dingun, ziehaw hi na kawm u a ka gen ahi.

²Kikhawpna In apat a nawhdawkin um un na tin uh, chuleh, Pathien chunga thilpha bawla kingai a, nang haw a hun thah hun uh hung tung ding a hi.

³Zie thil haw chuh hih un au, Kei leh Pa ei het loh ziekun.

⁴Zie thu haw hi na kawm u a ka gen sa ei tai, a hun chuh a hung tun tieng leh, ka hun na hilh sa ahi tih na het dawk kitna dingun. “Zie thil haw hi atûng apat ka hun na hilh loh him a hii, na kawm u a ka na um tâkdih ziekin.

⁵Himahleh, tun vang chuh, ei sawlpa kawma chieh ding ka hii, na lak u a kuoma’n ka chiehna ding nei dawng puoh ngâl u a.

⁶Mahleh, tu a ka hun hilh phet hin, na lunggil u chuh lungkham na’n a dim hiel ta ahi.

⁷Himahlele, thudik tak ka hun hilh na hiu hi, ka chieh nang u dingin a phai; ka chieh loh chun Lungmuonpa chuh na kawm u a hung lo ding ahi ngâl a. Himahlele, ka chieh chun, nang haw kawma hun sawl ding ka hi.

⁸Tichun, amah chuh a hung tieng leh, khawvel a mite kawm achun, gitloh thu te, diktatna thu te leh vaihawmna thu te ah a dikloh zieu hun hetsak ina.

⁹Gitlohna thu ale thiemmawh chang un au, kei ei ginchak loh ziekun;

¹⁰Diktatna thu ale thiemmawh chang un au; Pa kawma chieh ding ka hi a, nangun nei muh kit tâk loh ding ziekun;

¹¹Pathien thutanna ale thiemmawh changin um un au, zie khawvel vaihawmpa chuh thiemmawh changa thutan khum a hih tâk ziekin.

¹²“Na kawm u a gen ding thu tamtak ka nei nalai hi; himahleh, tuhin, na tin tadih puou hi.

¹³Amahvang chuh, Pathien chanchin diktak phuongdawkpa Thagau chuh a hung tieng leh, thudik cheng chengah hun puilut ina. Amah phuok kawmin thu gen ding a hi puoh a, a thu zakte chauh gen intin; thil hungtung dingte le hun hetsak in a.

¹⁴Amah chun lopina kei ei pie’n a; ka thugente la’n tin, nang haw kawma gen ding a hih ziekin.

¹⁵Ka Pa thil neih chengcheng chuh keia a hi a, zieziekchun ahi, ‘Thagau chun kei kawm apat la’n tin, na kawm u ah gensawn ina,’ ka hun tih chuh.

¹⁶“Chawmlo kalin nangun kei ei mu puo’n na tin uh; chawmlo kal mah in nangun kei ei mu kit unlau, Pa kawma ka chieh ding ziekin” a ti a.

¹⁷Ziephet chun, sinsakte laka khenkhat chun, “I kawm u a a thugen hi bang a tihna a hi? Chawmlo kalin nangun kei ei mu puo’n na tin uh; chawmlo kal mah in nangun kei ei mu kit unlau a tih leh, ‘Pa kawma ka chieh ding ziekin,’ a tih hi, a kitiu a.

¹⁸Amau haw mah chun, ‘Zie chawmlo kal,’ a tih hi a umzie banga? A thugen hi a ngaihna ka he puou hi,” a tiu a.

¹⁹Chun, amah dawt a nuom ui tih Isu’n a he a, a kawm u ah, “Chawmlo kalin nangun kei ei mu puou un na tin uh, chawmlo kal mah in nangun kei ei mu kit unlau, ka hun tih hi na kidawng tuoh uh ahi maw?

²⁰Tihtakzet, tihtakzet a ka hun hilh na hiu hi, nang haw hi kap in lungkham un na tin un, himahleh, khawvel hi kipâk ding ahi; lungkham un na tin uh, himahleh, na lungkhamnau chuh lawpna hung suok ding ahi.

²¹Numei a nauhanat tieng leh a lungkham sek, a hun a tun tâk ziekin, himahlele, nau a hun hin tieng leh, a lungkhamna chuh a he kit ta sek puoi; khawvel a mihiem hung pieng chuh a kipâk ziekin.

²²Zie chuh, tu a nanguh dinmun tawbang hi ahi: tuhin na lungkham u a, himahleh, nanguh hun mu kit ing ka, tichun, na lunggil u chuh kipahna kuoma’n a hun lâksak theih loh ding chun dim ina.

²³“Zie ni chuh a hungtun tieng leh, nangun kei bangmah ei dawng puo’n lau. tihtakzet in ka hun hilh na hiu hi. Pa kawma bang hitaleh, na nget u chun, keimah min in nanguh hun pie’n a.

²⁴Tuchan hin, ka min in bangmah na ngên ngâl puou a; ngên un, tichun, hun pie’n a, na kipâk uh a bukim na dingin.

²⁵“Zie thu haw chuh a thawitham in na kawm u ah ka gen a; himahlele, a hun tun tieng chu leh, a thawitham in gen ta puo’ng ka ting, kichien takin Pa chanchin na kawm u ah gen zaw ta’ng ka.

²⁶Zie ni tieng chu leh, ka min in thil ngên unlau; chun, ‘Pa kawmah ken hun nget sak ing ka’ ti ka hi puoh a;

²⁷Pa ngêi in nanguh a hun lungsiet ngâl a. Nangun kei nei hehpih u a. Pa apat a hung ngêi ka hi tih nei ginchak ziekun.

²⁸Kei Pa kawm apat a hung a, van nuoia hung ka hii; vannuoi taihsan a. Pa kawma chieh kit ding ka hii,” a ti a.

²⁹Chun, a sinsakte’n, “Ngaitie! tuhin chuh chientak in thu na gen a, a thawitham himhim in na gen ta puoi.

³⁰Nangin bangakai na he a, kuomah hun dawt na ngek puoi, tih chientakin ka he tau hi. Zie ngêi chun. Pa apat a hung na hii tih ka gingcha tau hi,” a tiu a.

³¹Isu’n a dâwng a a kawm u ah, “Tu’n chuh, na gingcha tau maw?

³²A hun tung ding ahii, a tung le ahi zieng tai, zie tieng chu leh nangmau In lam chietah dalh vek un na tin uh, keimah chauh in nei thahtha’n lau; himahlele, Pa ka kawma a um ziekin, keimah chauh in ka um diek puoi.

³³Zie thu haw hi na kawm u ah ka gen ta hi, keimah a na um ziek u a lungmuonna na neih theihna dingun. Khawvela hin dahum thuok in na um sek ui. Himahlele, kipâk takin um un, ken khawvel ka zo tai,” a ti a.