Read Gangte JOHAN 17 Bible Online

JOHAN 17 - Gangte bible

JOHAN 17

¹Zie thu haw chuh Isu’n a gen zawhin, van lam en in, “Hepa, a hun a tung tai. Na Chapa limbawl ah, Chapa’n le a hun limbawl na ding in.

²Mi chengcheng chunga thunei in na siem a, ti a chuh, na piekte kawma hinna a piek theihna dingin.

³Ziehi kumkhuo hinna a hii, Nang Pathien tak tak leh, na sawl Isu Krista het hi.

⁴Nangin thilhih dinga nei piek kha ka hih zo a, lei chungah ka hun limbawl tai.

⁵Aw he Pa, khawvel kisiem ma pek a na kawma lopina ka chan kha, zie tawbang mah khan tuhin ei limbawl kit in.

⁶“Nangin khawvel apat a mi nei piek dawkte kawm achun na min ka sulang tai. Amau haw chuh nanga ahiu a, nangin kei nei piekte ahi ngâl u a. Amau chun na thu a zawp tau hi.

⁷Nangin ka kawma thil nei piekte chuh, nangmah ngêi apat a hi tih tu’n a he tau hi.

⁸Nangin thu nei piek kha a kawm u ah ka pie ta a, ziehaw chuh a ching u a, nangmah kawm ngêi apat ka hii tih dik takin a he tau a, nei sawl ngêi ka hii tih le a gingcha tau hi.

⁹“Amau haw dinga ngetsak ka hi. Khawvela dinga ngetsak ka hi puoh a, nangin nei piek haw dinga nget sak ka hi zawi; nanga ahi ngâl u a.

¹⁰Thil chengcheng keia tapoh nanga a hi a, nanga chule keia a hi ngâl a; amau haw ziekin limbawl in ka um sek.

¹¹Tu’n, kei na kawma hung ding ka hi a, khawvel ah um ta puo’ng ka; amau haw vang hi khawvel ah um un au. He Pa, Thiengtho, nangin kei nei piekte hi na min in hum ah; pumkhat a hih theihna dingun, nang leh kei pumkhat I hih guol mah bang hin.

¹²A kawm u a ka um sungin, nangin kei nei piekte haw hi na min in ka hum sek; amau haw ka veng a, a lak u a khatchale a mangthai puou, mangthai chapa ngâllo chuh; Pathien Lehkha thu kha a hung guitunna dingin.

¹³Himahlele, tuhin, na kawma hung ding kei tai; ka kipahna amau a a bukim theihna dingin, zie thu te hi khawvel kawma ka gen ahi.

¹⁴Na thu a kawm u ah ka pie tai; khawvel in amau haw chuh a hawu a, khawvel a a hih loh ziekun leh, kei khawvel a ka hih loh guol mah hin.

¹⁵Nangin, amau haw chuh khawvel apat a na lak dawk dinga ngên ka hi puoh a, migilo laka chuh na hum ding ti ka hi zawi.

¹⁶Khawvela ka hih loh mah bang hin, amau haw chule khawvel a ahi puou hi.

¹⁷Amau haw chuh thutak in hih thiengtho ah, na thu chuh thutak ahi ngâl a.

¹⁸Nangin khawvel a kei nei sawl guolin, ken le amau haw chuh khawvel a ka sawl a hii.

¹⁹Amau haw ziekin keimah ngêi nang kawmah ka kilân thiengtho ahi, ti a chuh, amau haw le nangmah kawma dik taka a kilân thiengtho theihna dingun.

²⁰“Ziete hawa ding maia hi ngetsak ka hi puoh a, a thugen teu zieka kei ei hun gingcha dingte ding ale ngetsak ka hi kawm hi.

²¹A bawn u a pumkhat a hih theihna dingun ka ngetsak ahi. He Pa, nang keimah a na um leh, kei nangmah a ka um mah bang hin, amau haw le eimah a a umna dingun. Pumkhat a hih u a, ti a chuh khawvel in kei nei sawl ngêi ahi tih a ginchak theihna dingun.

²²Nangin lopina kei nei piek kha a kawm u ah ka pie tai, nang leh kei pumkhat I hih guola, amau haw le pumkhat a hih theihna dingun:

²³Khawvel in, kei nei sawl a hii tih leh, kei nei lungsiet guolin amau haw na lungsiet hi tih a hetna ding u a, kei a mau a ka um a, nang keimah a na um a, pumkhat a hih bukim theihna dingun.

²⁴“Hepa! nangin kei nei piekte hi, ka umna a ka kawma um dingin ka deih hi; nangin nei piek, ka lopina khah a muhna dingun, lei kisiem masang apat in nei hehpih ta ngâl a.

²⁵Aw he Pa diktat! khawvel in vang a hun he puou a, ken vang ka hun hêi; te haw hin le, nangin kei nei sawl a hii tih a heu hi.

²⁶A kawm u ah na min ka hetsak ta a, hetsak kit zel ing ka, ti a chuh, nangin kei nei hehpihna kha amau ah a um a, keile amau a ka um theihna dingin,” a ti a.