Read Gangte JOHAN 18 Bible Online

JOHAN 18 - Gangte bible

JOHAN 18

¹Chun, Isu’n zie thu haw chuh a gen zawhin, a sinsakte tawh a pawtdawk u a, Kidron lui a kân u a. Zie mun achun huon khat a um a, tak achun Isu leh a sinsakte chuh a lut u a.

²Chun, a matsak ding pa Juda chun le zie mun chuh a he a; taka chuh Isu, a sinsakte kawma a va chieh zing sek ziekin.

³Khutichun, Juda chun sepaih lawi tawh, thiempu liente leh, Pharisaite kawma um, mi mante tawh a pui a, thaumei le, meisel le, hiem lethal keng in tak achun a chieh tau a.

⁴Isu’n, a chunga thil tung dingte cheng chuh a he vek a, masang lam zuonin a va chieh a, a kawm u ah, “Kuo a na hawl uh?” a ti a.

⁵Amau chun a kawmah, “Nazareth Isu,” ti’n a dâwng u a.Isu’n a kawm u ah, “Keimah hi ka hi a puo,” a ti a. A matsakpa Juda chule a lak uh achun a ding a.

⁶Chun, Isu’n, “Keimah hi ka hi a puo,” a tih phetin, a kinungchawn u a, tuol ah a puk u a.

⁷Chun, Isu’n a kawm u ah, “Kuo a na hawl uh?” ti’n a dawng kit a. Amau chun a kawmah, “Nazareth Isu,” a tiu a.

⁸Chun, Isu’n a kawm u ah, “Keimah hi ka hi, tih ka hun hilh ta kha,” a ti a. “Kei nei hawl uh a hih chun ziete haw hi chieh sak tadih un,” a ti a.

⁹(“He Pa! nangin kei nei piekte kha khatchale ka mansak puoi,” ti a, a thugen te haw kha a guitun theihna dingin zie thu chuh a gen a hii.)

¹⁰Chun, Simon Peter in chemzâm a vawp a, a zuk a, thiempu lienpen suok a sat a, a bil changlam a satthâk sak ta a. Zie suokpa min chuh Malkas ahi.

¹¹Ziephet chun, Isu’n Peter kawmah, “Chemzâm kha a pai ah thun ah; Pa’n khawn ei piek hi dâwn lo ding ka him?” a ti a.

¹²Khutichun, sepaih lawi tawh, a lawiupa lienteu tawh, Juda mi mante chu tawh, Isu a man u a, a kân u a,

¹³Tichun, Annas kawmah a pui masau a. Amah chuh Kaiapha talpu ahi a, zie kum chun Kaiapha chuh Thiempu Lienpen ahi.

¹⁴Mi chengcheng thih sik in mi khat thih a phazaw khawp puoi, ti a Judate thupie pa kha ahi.

¹⁵Tichun, Simon Peter chun, sinsak dang khat tawh Isu a zui u a. Zie sinsak dang khat chuh, Thiempu lienpen melhet ahi a, tichun, thiempu Lienpen in umna huongsung a Isu kawm achun a va lut a,

¹⁶Peter chuh, Pawlam a kawtkhak bul achun a ding a. Khutichun, sinsak dang, Thiempu lienpen melhet pa chuh a va pawtdawk a, kawtkhak ngaknu nungak chuh a hopih a, tichun, Peter chuh a sung ah a puilut ta a.

¹⁷Kawtkhak ngaknu nungak chun Peter kawmah, “Nang le, zie pa sinsakte laka tel hilo na him?” a ti a. Peter chun, “Ka hi puoi,” ti’n a dâwng a.

¹⁸A dap ziekin, suokhaw leh mimante chun meihawl in mei a tik u a, a kimvela chun din sân a kihailum u a. Peter le a kawm u achun a va chieh a, a lak u a chun dinsân a va kihai lum a.

¹⁹Tichun, Thiempu Lienpen chun Isu chuh, a sinsakte chanchin leh, a sinsak dante a dawng a.

²⁰Isu’n a dâwng a, “Mitin kawmah, tângphuong takin thu ka gen sek; kikhawpna in leh Pathien Ho-In a, Judate chengcheng um khawmna munte achun thu ka gen sek hi. A gûkin thu bangmah ka gen kha puoi.

²¹Bang zieka kei nei dawt ahim? A kawm u a ka thugen dân chuh, ka thugen ngaithate dawng ta! Ka thugen chuh a heu a puo!” a ti a.

²²Isu’n zie chuh a gen phetin, a kienga ding mimante khat chun a bêng a, “Thiempu lienpen tihin na dâwng ngam maw?” a ti a.

²³Isu’n a kawmah, “Thil diklo gen kha ka hih chun, zie tak a um chengcheng te kawma hin gen ah. Himahleh, thu pha ka gena le, bang dinga ei bêng na hi?” a ti a.

²⁴Chun, Annas chun, kansa’n Thiempu Lienpen Kaiapha kawm achun a sawl ta a.

²⁵Chun, Simon Peter chuh mei lum awi in a ding zing a. Tichun, mi dang khatin, “Nang le zie mipa sinsakte laka tel hilo na him?” a ti a. Amah chun, “Ka hi puoi,” ti’n a kilep a.

²⁶Chun, Peter in a bil a satthâk sakpa inkawte laka thiempu lien suok khat chun, “Nang hile, huon a khan a kawmah ka hun mu hilo ahim?” a ti a.

²⁷Zie chun, “Peter a kilep kit a,” tichun, âk a khuong ngâl ta a.

²⁸Chun, zingkal matak in Isu chuh Kaiapha In apat chun, gamvaipuo pa In achun a pui u a. Juda lawiupa haw chuh vang leng in achun a lut puou hi, khutilochun, kisubuok un tin uh, Chiehkân Kut an ne theilo ding a hih ziekun.

²⁹Khutichun, Pilate chuh a kawm u ah a va pawt dawka, a kawm u ah, “Zie pa na heknau hi bang thu ahim?” a ti a.

³⁰Amau chun a kawmah, “Zie pa hi thil gilo hih hi kileh, na kawmah hun pui puo’ng kau,” ti’n a dâwng u a.

³¹Ziephet chun, Pilate chun, “Nangun pui unla, na dân guol un a chungthu tan un,” a ti a. Amau chun a kawmah, “Kei u thu’n kuomah thah zieng chuh dân a hi puoi,” a tiu a.

³²(Isu’n a thih dân ding thu a gen banga kha a hung tunna dingin ziehaw huh hung um ahi.)

³³Tichun, Pilate chuh In sung ah a lut kit a, Isu a sama, a kawmah, “Judate leng na him?” ti’n a dawng a.

³⁴Isu’n a dâwng a, “Zie thu chuh nangmah lungthim apat a hung pawt dawka nei dawt ahim, a hihloh leh, ka chanchin mi dangin a hun hilh uh ahim?” ti’n a dawng a.

³⁵Pilate in, “Kei Juda mi hi dingin nei ngaihtuoh em? Nangmah mite ngêi leh, Thiempu Liente’n ka kawma a hun puih uh na hi hi; thil banga na hih?” ti’n a dâwng a.

³⁶Isu’n a kawmah, “Ka lalgam chuh zie khawvel hih a hi puoi; ka lalgam chuh zie khawvel hih a na hi leh, kei ei zuite chun, Juda thuneitu te kawma pieka ka um ding chuh a na do ta’n au. Himahlele, ka lalgam chuh zie khawvel a hih ahi puoi!” ti’n a dâwng a.

³⁷Chun, Pilate in a kawmah, “A leh, leng hilo na hi?” a ti a. Isu’n, “Hi e, leng ka hi a puo! Thutak hetsak hi ka pien lawh leh, khawvel a ka hung lawh ahi. Kuole, thutaka um ta poh in ka thu a pawm sek ui,” a ti a.

³⁸Pilate in a kawmah, “Thutak chuh bang ahi?” a ti a. Zie thu chuh a gen zawh phetin Pilate chuh Judate kawma chun a va pawt kit a, a kawm u ah, “Mawhchansakna ding bangmah a gitlohna ka mu puoi.

³⁹Himahleh, dân khat na neih uh a um hi, Chiehkân Kut hun sunga suongkultâng khat ka hun thahdawk sak sek na hiu hi. Zieziekchun, Judate leng hi hun pawt sak leng na nuom um?” a ti a.

⁴⁰Amau haw chun kiko kawmin a dâwng u a, “Zie pa hi chuh hi kiheh! Barabbas khah hi zaw hen,” a tiu a. (Barabbas chuh suommang gucha ahi.)