Read Gangte JOHAN 19 Bible Online

JOHAN 19 - Gangte bible

JOHAN 19

¹Ziephet chun, Pilate in Isu chuh a pui a, a zêp ta a.

²Sepaihte chun linglukhuk a phêk u a, a luchang ah a khuk sak u a; puon sandup le a silh sak u a,

³tichun, a kawmah a hung u a, “Chibai, Judate leng!” ti’n a bêng u a.

⁴Pilate chuh a pawt kit a, mipite kawm achun, “Entiem u, bangmah a gitlohna ka mu puoi tih na hetna dingun, na kawm u a ka hun puih dawk ahi!” a ti a.

⁵Khutichun, Isu chuh linglukhuk leh puon sandup chuh silh kawmin a hung pawt a. Pilate chun a kawm u ah, “Entiem u, Mihiempa hi!” a ti a.

⁶Chun, Thiempu liente leh mimante chun amah a muh phet un, a kiko u a, “Kross ah khêndên ah, kross ah khêndên ah!” a tiu a. Pilate in a kawm u ah, “Nangun pui unla, kross ah khêndên un, kei vangin bangmah a gitlohna ka mu puoi,” a ti a.

⁷Judate chun a kawmah, “Ka dân uh lampi khat a um, zie dân guola chuh, Pathien Chapa a a kisiem ziekin a thih ding ahi,” a tiu a.

⁸Pilate in zie thu chuh a zak phetin a lau zaw diek a,

⁹In sung ah a lut kit a, Isu kawmah, “Khawia kipata hung na him?” ti’n a dawng a. Himahleh, Isu’n a dâwng puoi.

¹⁰Chun, Pilate in a kawmah, “Nangin kei nei ho lo vang vei maw! Hun thahdawk thei ka hi a, kross a hun khêndên thei le ka hi tih na he puo maw?” a ti a.

¹¹Isu’n a, dâwng a, “Pathien apat a thuneihna piek na hih loh chun, ka chungah hih theih himhim nei puo’n la, zieziekchun, na khuta ei piepa khan gitloh a puo zaw diek hi,” a ti a.

¹²Zie a kipat chun, Isu a pawt sak theih dân ding lampi a hawl ta a. Himahleh, Judate chuh a kiko u a, “Zie pa hi na thahdawk chun, Kaisar guolpa hi puo’n la! Kuole, lenga kisiem ta chuh Kaisar do ahiu hi!” a tiu a.

¹³Pilate in zie thu haw chuh a zak phetin, Isu a puidawk a, a min suong kilem, (Hebrai pau in Gabbatha a tiu a) zie mun achun, vaihawmna chutphah ah a chu a.

¹⁴Zie ni chuh Chiehkân Kut kiginni ahi a, nisa a sun vang vang ta a. Pilate chun Judate kawmah, “Entiem u, na leng u hi!” a ti a.

¹⁵Amau haw chuh a kiko u a, “Sumangthai ah, sumangthai ah; kross ah khêndên ah!” a tiu a. Pilate in a kawm u ah, “Na leng u hi kross a ka khetdên ding maw?” a ti a. Thiempu Liente’n, “Kaisar tih loh leng dang ka nei puou,” ti’n a dâwng u a.

¹⁶Ziephet chun, Pilate chun, Isu chuh kross a khetdên dingin a kawm u ah a pie dawk ta a. Tichun, Isu chuh a pui tau a.

¹⁷Amah chun a kross chuh kiput in, “Luguh mun,” a tih uh, (Hebrai pau a Golgotha) kiti mun tieng chun a chieh ta a.

¹⁸Taka chun, kross ah a khêndên u a, mi dang nih tawh, a sik tuok ah khat gel in, a lai ah Isu.

¹⁹Pilate in lehkha a zik a, kross chunga chun a tâk a, “NAZARETH ISU JUDATE LENG,” ti a zik ahi.

²⁰Zie lehkha chuh Judate, a bang tamtakin a sim u a, Isu kross a a khetdên na mun u chuh khawpi apat a gamla lo cha a hih ziekin. Zie lehkha chuh Hebrai pau, Latin pau leh Grik pau te a kizik ahi.

²¹Thiempu liente chun Pilate kawmah, “‘Judate Leng,’ ti’n zik kih; ‘Judate Leng ka hi a tii,’ ti’n zik zawh,” a tiu a.

²²Pilate in, “Ka zik khah ka zik zo tai,” ti’n a dâwng a.

²³Chun, sepaihte’n Isu a khetdên zawh u chun, a silhlechen haw chuh a lau a, phel li a suoh u a, sepaihte’n phel khat chietin a chang u a. A puonâk le a lau a; zie chuh khuih loh puonâk a hi a, a ngâwng apat a puma gat vek ahi.

²⁴Tichun, sepaihte chun, “Bawtthek puoi tiu, a chang ding pên hetna dingin phunsân zawi tiu,” a kitiu a. (Zie chuh, Pathien Lehkha thu: “Ka silhlechen haw a kihawm u a, Ka puonâk dingin phun a san u a,” tih thu a tunkimna dingin um ahi.) Zie thil haw chuh sepaihte chun a hih u a.

²⁵Isu kross kieng achun, a nu leh a suohpihnu, Mari, Klopas zi leh Mari Magdalin te a ding u a.

²⁶Isu’n a nu leh, sinsak a hehpih kha a kienga ding a mu a, a nu kawmah, “Numei, entie, na chapa khah!” a ti a.

²⁷Chun, sinsak kawm achun, “Entie, na nu khah!” a ti a. Tichun, zie a kipat chun, sinsakpa chun amah In a cheng dingin a pui ta a.

²⁸Zie nung chun, Isu’n bangakai tu’n a kim tai tih a he a, chun, Pathien Lehkha Thu khah a tunkimna’n, “Ka dang a châk hi,” a ti a.

²⁹Zie tak achun bel khat uain thuk a dim a um a, zie chun spanj khat chuh uain lak achun a dieh u a; husop tieng ah a tâk u a, a mûk a vak nuh u a.

³⁰Chun, Isu’n uain thuk a na dâwn zawh chun, “Zawh ahi tai,” a ti a. Chun a lu a khun a, a thagau a thah ta a.

³¹Chun, Kiginni a hih ziekin, luong chuh Chawlhni a kross lêk a a um den lohna dingin, Judate’n Pilate kawmah a kênghaw sukbawt a, luong chuh kross lêk apat a latha dingin a ngên u a. Chawlhni hung tung ding chuh ni pawimawh diek a hih ziekin.

³²Tichun, sepaihte chuh a chieh u a, Isu tawh khetdên a um khatna pa leh a dang khat chuh a kenghawu a subawng u a,

³³Himahleh, Isu kawm a tun phet un, a thisa ahi tai tih a heu a, a kênghaw chuh a sukbawt sak puou hi.

³⁴Himahlele, sepaihte laka khat chun, a tiengcha chun Isu nak lak a sun a, tichun, thisan leh tui a pawt pai zieng a.

³⁵Zie thil mu pa chun a gen tai; nangun le na ginchak theihna dingun. A thugen chuh a dik a, chuleh, thudik a gen hi tih le a kihei.

³⁶Pathien Lehkha Thu a: “A guh khat chale sukbawt hi puo’n a,” tih tunna dingin zie thil haw chuh hung um ahi.

³⁷Chun, Pathien Lehkha Thu dang khat: “A sutpau chuh hun en un au,” tih le a um hi.

³⁸Zie thil haw nung chun, Joseph, Arimathai khuo a um chun, Isu luong chuh la dingin Pilate kawmah a ngên a. (Joseph chuh Isu nungzuite laka tel ahi a, himahleh, Judate a lauh zieka, a gûka na um ahi.) Pilate in a phalsak a, tichun, a chieh a, Isu luong chuh a la ta a.

³⁹Chun, Nikodem, a tunga zan a Isu kawma hung pa chun, thil gimlim, murra leh aloe kihel, buk sawmnga vel chawiin Joseph kawmah a hung a.

⁴⁰Isu luong chuh a lau a, Judate kivuih dân guolin, thil gimlimhaw chu tawh, patngatpuon in a tuom u a.

⁴¹Chun, Isu kross a a khetdênna mun u achun huon khat a um a, huon achun, kuomah na kisiel khâk loh na thân thak khat a um a.

⁴²Judate Kiginni a hih tawh, thân chuh a kawm chaua um mah a hih ziekin, tak achun Isu luong chuh a siel tau hi.