Read Gangte JOHAN 21 Bible Online

JOHAN 21 - Gangte bible

JOHAN 21

¹Zie nung chun Isu, Tiberia Dil ah, a Sinsakte kawmah a kilak kit a.

²Zie tak achun, Simon Peter te, Thoma Didumas a tih teu, (Galili gama Kana khuo a um) Nathanael te, Zebedai chapa nih te leh Isu sinsakte dang nih tawh a um u a.

³Simon Peter chun a kawm u ah, “Nga mana chieh ding ka hi,” a ti a. Sinsak dangte chun a kawmah, “Kei u le na kawmah hung ung kau,” a tiu a. Tichun, a chiehdawk u a, kuong ah a chuu a, himahleh, zie zan chun bangmah a man puou hi.

⁴Chun, thingzang vakin Isu chuh sehpho ah a ding a, himahlele, sinsakte chun Isu ahi tih a he puou hi.

⁵Chun, Isu’n a kawm u ah, “Naute haw, bangmah man lo na hiu hi?” a ti a. Amau chun a kawmah, “Bangmah cha ka man puou!” a tiu a.

⁶Amah chun a kawm u ah, “Kuong sik changlam panga khan lên sep leu chin, nga man un lau,” a ti a. Tichun a sep u a, nga a mat tam ziekun a luoi dawk zo ta puou hi.

⁷Ziephet chun, sinsak Isu’n a hehpih khan Peter kawmah, “LALPA a hi khu!” a ti a. Khutichun, Simon Peter in LALPA ahii tih a het phetin, a puonâk a cheng a, (sangawn a um ahi ngâl a), dîl ah a chawm tha ta a.

⁸Sinsak dangte chun vang, kuong neu a len a nga puma kai kawmin a hun zuon u a, (sehpho apat a gamla ngâl puou a, tawng zanih ahim phet ahi.)

⁹Chun, sehpho a kaih dawk phet un, tak achun meihawl a mei kitik, a chunga nga leh chângthâk pêk kiha chuh a muu a.

¹⁰Isu’n a kawm u ah, “Tu’n na nga mat u khah, khenkhat hun chawi un,” a ti a.

¹¹Khutichun, Simon Peter a va chieh a, lên chuh nga lien tak taka dim in sehpho ah a kaidawk a, za leh sawmnga le thum ahi; khuti zozai chuh um mahleh, lên chuh a ek sam puoi.

¹²Chun, Isu’n a kawm u ah, “Hung un la, zing an neu in,” a ti a. Sinsakte laka khat cha’n le, “Kuo na hi?” ti’n a dawng ngam puou hi, LALPA a hi tih a het ziekun.

¹³Khutichun, Isu chuh a hung a, chângthâk pêk chuh a la a, a kawm u ah a pie a, ngahaw chule khutibang mah chun a pie a.

¹⁴Zie chuh, Isu mithi lak apat a thawh kit nunga, a sinsakte kawma a kilak a thum vei na ahi.

¹⁵Chun, zing an a nek zawh un, Isu’n Simon Peter kawmah, “Simon, Johan chapa, ziehaw sang hin nangin kei nei hehpih em?” a ti a. Amah chun a kawmah, “Hi, LALPA ka hun hehpih hi tih na hêi,” a ti a. Isu’n a kawmah, “Ka belamno te vak ah,” a ti a.

¹⁶Chun, a nih veina ah. a kawmah, “Simon, Johan chapa, nangin kei nei hehpih em?” a ti kit a. Amah chun a kawmah, “Hi, LALPA, ka hun hehpih hi tih na hêi,” a ti a. Isu’n a kawmah, “Ka belamte enkawl ah,” a ti a.

¹⁷Chun, a thumveina chun Isu’n, “Simon, Johan chapa, nangin kei nei hehpih em?” ti’n a dawng kit a. Isu’n a thumveina a “Nangin kei nei hehpih em?” a kawma a tih ziek chun Peter chuh a lungkham a, a kawmah, “LALPA, bangakai na he a, ka hun hehpih hi tih na hêi!” a ti a. Isu’n a kawmah, “Ka belamte enkawl ah.

¹⁸Tihtakzet, tihtakzet a ka hilh na hii, na chapan lai khan na tai ah na kigak a, na utna chengah na chieh sek a; himahlele, na upat tieng leh, na khuthaw zak in na tin, mi dangin hun gâk sak intin, na ut lohna lam ah hun kai un au,” a ti a.

¹⁹(Zie thu haw chuh Peter a thih a, Pathien a suklopi dân ding genna’n a tii.) Chun, zie chuh a gen zawhin, “Nei zui ah!” a ti a.

²⁰Chun, Peter chuh a kihei a, Isu’n a sinsak a hehpih, nitâk an nek laia Isu âng zawna hung daphei pa, “A matsak ding pa chuh kuo pên ahim?” tipa khan a hun zuih a mu a.

²¹Peter in amah chuh a muh phetin Isu kawmah, “LALPA, zie pa hin bang a hih die?” a ti a.

²²Isu’n a dâwng a, “Ka hung masang sieh hing zing heh ti leng le, zie chuh nangin banga na mat ding ahi? Nangin nei zui ah!” a ti a.

²³Khutichun, zie sinsak chuh, Isu nungzuite lak achun thi lo dingin a kithang ta a. Himahleh, Isu’n thi puo’n a tin a kawm u ah a gen puoh a; “Ka hung masang sieh hing zing heh ti leng le, zie chuh banga na mat ding ahim?” tii zaw ngâl a.

²⁴Zie sinsakpa chuh, zie thu haw hetsakpa leh zikpa hi ahi; a thu hetsak hi a dik hi tih I heu ui.

²⁵Chun, ziehaw lo hile, Isu thilhih tamtak a um nalai a, ziehaw chuh zik kim vek ding hi leh, lehkhabu zik ding cheng chuh, khawvel hin le dawl dingin ka gingcha puoi.