Read Gangte JOHAN 3 Bible Online

JOHAN 3 - Gangte bible

JOHAN 3

¹Chun, Pharisaite laka mi khat, a min Nikodem, Judate lawiupa khat a um a.

²Zie pa chuh zan in Isu kawmah a chieh a, a kawmah, “Rabbi, Pathien kawm apat a sinsakpa dinga hung na hi, tih ka heu a; Pathien a chung u a a um loh chun, zie thilmak na hih bang hi kuoma’n hih thei puo’n au,” a ti a.

³Isu’n a dâwng a, a kawmah, “Tihtakzet, tihtakzet a ka hilh na hiu hi, mi kuole a pienthak loh chun, Pathien gam mu thei puo’n au,” a ti a.

⁴Nikodem in a kawmah, “Mi, a têk nung in bangti’n a a pien theih ding? A nu gil a nih vei lut in a pieng thei dinga ahim?” a ti a.

⁵Isu’n a dâwng a, “Tihtakzet, tihtakzet in ka hilh na hii, mi kuole, tui leh Thagau a a pien loh chun Pathien gam lut thei puo’n au.

⁶Phehlevo a pieng ta, phehlevo a hi a, Thagau a pieng ta, thagau ahi.

⁷Na pienthak ding ka hun tih hi maksa kih.

⁸Huih, khawiale, a nawp nawp in a nung sek, a git na zai, himahlele, khawi apat a hung ahi, khawia chieh ding ahi tih na he ngâl puo’n; kuole, thagau a pieng ta, tawbang chun a um ui,” a ti a.

⁹Nikodem in a dâwng a, “Zie thil haw chuh bangti’n a a um theih ding?” a ti a.

¹⁰Isu’n a kawmah, “Israel te laka sinsakpa na hi ngâl a, ziehaw chuh na he puo maw?

¹¹Tihtakzet, tihtakzet a ka hilh na hii, kei un ka het u chuh ka gen sek ui, ka muh u chuh ka hetsak sek ui, himahlele, ka thu hetsak u chuh na awi sek puou hi.

¹²Zie khawvel a thilte hi ka hun hilh a bawn gingcha lo, van a thil hun hilh leng bangti’n a na ginchak hawn dinguh?

¹³Van apana hung suk Mihiem Chapa ngâllo kuomah van ah a kal ngei puou hi,” a ti a.

¹⁴Chun, Mosi’n thaleka dâkgûl a khaih kâng guol khan, Mihiem Chapa hile khaihkang a um ding ahi:

¹⁵Kuole, a gingcha ta chuh mangthai lo a, amah vanga kumkhuo hinna a neihna dingun.

¹⁶Pathien in khawvel a hehpih mah mah ziekin, a Chapa changkhat neih sun a pie a, kuole, amah gingcha taphawt chuh mangthai puou un tin; himahleh, kumkhuo hinna nei zawn au.

¹⁷Pathien in khawvel mawhchansak dingin a Chapa khawvel ah a hun sawl puoh a, amah zieka hukdama a um theihna dingun a sawl a hi zawi.

¹⁸Kuole, amah gingcha chuh mawh changin um puo’n au, himahleh, a gingcha lo chuh, tu akipat zieng hin le mawhchang in a um ui; Pathien Chapa changkhat a ginchak loh ziekun.

¹⁹Ziehi mawhna chuh a hii: Vak van nuoi ah a hung a, himahlele, mite’n vak sangin thim a deih zawu, a thilhih hawu a gitloh ziekin.

²⁰Kuole, thilhih gilo ta’n, vak a haw sek u a, vaka le a hung nuom puou, a thilhih hawu suklat a um ding chuh a ut loh ziek un.

²¹Amahvang chuh, kuole, thil dik hih ta chun, a thilhih teu chuh Pathien thu zawp zieka hih a hih uh kilatna dingin, vak ah a hung sek ui, a ti a.

²²Ziehaw nung chun, Isu chuh a sinsakte tawh Judai gam ah a chieh u a, tak achun a kawm u ah hun chawmkhat a um a, a baptist sek a.

²³Johan in le Ainon ah, Salim khuo kieng ah a baptist sek a, zie taka chuh tui a tam ziekin. Mipite chuh a kawmah a chieh u a, a na baptist sek a.

²⁴(Zie chuh Johan suongkul a khuma a um masang ahi.)

²⁵Johan sinsakte khenkhat leh Juda khat sakhuo dana silngim thu’n a na kiniel u a.

²⁶Khutichun, Johan kawmah a chieh u a, a kawmah, “Rabbi, Jordan gala na kawma um, a thu nei hetsak khan ngaitie, zie pa khan mi a baptist a, mi chengcheng a kawmah a hung ui,” a tiu a.

²⁷Johan in a dâwng a, “Mihiem in bangmah a nei thei puou, Pathien in a piek a hih loh ngâl chun.

²⁸‘Kei Krista chuh ka hi puoi, a masang a ei sawl ka hii,’ ka tih kha, nangmau haw ngêi ei hetpihte na hiu.

²⁹Moneipa chuh a pasal chuh ahi a, himahlele, pasalpa guolpa, din sa a a thu ngaitha pa chuh, pasal aw a het phat leh, a kipâk mah mah sek hi. Zie chuh ahi, keimah kipahna ngêi le, sukbukim a a um dân sek chuh.

³⁰Amah chuh hung pawimawh deuh deuh intin, kei vang chuh hung pawimawh lo deuh deuh ding ka hi.” a ti a.

³¹Chunglama kipata hung pa chuh, mi chengcheng sangin a lien zawi. Leisiet a kipan chuh, leisiet mi ahi a, lei thilte mai a gen sek, himahleh, van apat a hung vang chuh, thil chengcheng sanga chungnung pên ahi.

³²Amah chun, a muh leh a hette chuh a gen sek a, himahleh, kuoma’n a thugen chuh a pawm nuom puou hi.

³³Himahleh, kuole, a thugen pawm ta phawtte chun, “Pathien chuh Diktat ahi” ti’n a sudet sek hi.

³⁴Pathien sawl chun, Pathien thu mah a gen sek. Amau chuh Pathien in tehkhel khelin thagau a pie puoh ngala.

³⁵Pa’n chapa a hehpih a, a khut ah bangakai, a bawncha’n a pie a.

³⁶Kuole, Cha gingcha chun, kumkhuo a hinna a nei a; kuole Cha gingchalo chun hinna nei puou untin, Pathien lungnatna chuh a chungu ah um zing zaw’na, a ti a.