Read Gangte JOHAN 5 Bible Online

JOHAN 5 - Gangte bible

JOHAN 5

¹Zie thil haw nung chun, Judate Kut khat a um a; Isu le Jerusalem khuo ah a va chieh a.

²Jerusalem achun belam kawtkhak kieng ah dîl a um a; zie chuh Hebrai pau in, Bethesda a tiu a; hulliep nga le a nei a.

³Zie tak achun damlo te, mitdûkte, kêngbâite, zengte tamtak a kuol u a.

⁴A châng châng leh LALPA vânsâwlchâkte dîl achun a hungsuk u a, tui chuh a hung chawk sek u a, tui kinawk tienga damlo chawmlut masapen chuh bang natna hilele a dam zel sek hi.

⁵Chun, zie tak achun mi khat, kum sawmthum leh kum giet damlo mi khat a um a.

⁶Isu’n a kuol chuh a mu a, tawbang chun sawttak a um tai tih a he a, a kawmah, “Hihdam na ut hi?” a ti a.

⁷Damlo pa chun a dâwng a, “Hepu, tui a hung kinawk tieng leh dila ei kawih ding mi ka nei puoh a, ka chieh tieng leh, mi dangin ei taihkhelh sek ui,” a ti a.

⁸Isu’n a kawmah, “Tho inla, na puonphah la’n la, keng in chieh ta’n,” a ti a.

⁹Tichun, thakhat in, zie pa chuh a dam ta a, a puonphah a la a, a chieh ta a; zie ni chuh Chawlhni ahi.

¹⁰Khutichun, Judate’n a dam pa kawma chun, “Chawlhni ahi hi, na puonphah lak a thieng puoi,” a tiu a.

¹¹Amah chun a kawm u ah, “Ei hihdam pa ngêi in, ka kawmah, ‘Na puonphah la’n la, keng in chieh ta’n,’ ei tih ahi,” a ti a, a dâwng a.

¹²Chun, amau chun a kawmah, “Na puonphah la’n la, keng in chieh ta’n na kawma tipa chuh kuo ahi?” ti’n a dâwng u a.

¹³Himahlele, a dam pa chun kuo a hih a he puoh a, taka chuh mipi a tam ziekin Isu a chieh mang ta a.

¹⁴Zie nung chun, Isu’n amah chuh Pathien Ho-In ah a mu a, a kawmah, “Ngai ah, na dam ta hi! thilhih gilo kit ta kih, khutilochun, thil phalo zaw diek na chungah hungtung kha’na,” a ti a.

¹⁵Tichun, zie pa chuh a va chieh a, a hihdampa chuh Isu a hi tih Judate chuh a va hilh ta a.

¹⁶Khutichun, Chawlhni a zie sukdamna chuh a hih ziekin, Juda te chun Isu a bawlsie tau a.

¹⁷Himahlele, Isu’n amau haw chuh a hopih a, a kawm u ah, “Ka Pa’n tu tieng inle na a sem sek, ken le ka sem sek,” a ti a.

¹⁸Zie thu a gen ziek chun Judate chun suklup a guo zaw diek tau a; Chawlhni a bawhsiet ziek mai le hilo in, Pathien amah pa a a gen ziek leh, Pathien tuka a kisiem ziekin le ahi.

¹⁹Isu’n amau haw chuh a dâwng a, “Tihtakzet, tihtakzet a ka hilh na hiu hi, Chapa’n amah mai in bangmah a hih thei puoi; Pa thilhih a muh ngâl loh chuh; Pa’n a hih bang bang chuh Chapa’n le a hih sek ahi.

²⁰Pa’n Chapa a hehpih a, a thilhih tâk a kawmah a etsak sek; ziehaw sanga thil lopi zaw hi a kawmah hun etsak ina, mak na sak dingun.

²¹Pa’n mi thite a kai tho a, a hih hin sek guolin, Chapa’n le a ut ta poh a hih hing sek.

²²Pa’n kuomah chungthu a tan sak ngei puoi; thu chengcheng Chapa a tan sak zawk ahi;

²³Tia chuh mi cheng chengin Pa a zah guol u a, Chapa le a zahna dingun. Kuole, Chapa zahlo chuh. Pa, a sawlpa chule zahlo ahi.

²⁴“Tihtakzet, tihtakzet a ka hilh na hiu hi, kuole, ka thu he a, ei sawlpa gingcha chun, kumkhuo tuonga hinna a nei hi. Thiemmawh changin a um puoh a, himahleh, thihna apat a pawt a, hinna ah a lut zaw tai.

²⁵Tihtakzet a ka hilh na hiu hi, a hun tung ding ei tai; tuhin le a tung ei tai, zie tieng chu leh, mithi te’n Pathien Chapa aw zau untin, a za tapoh hing un au.

²⁶Pa ngêi chuh hinna bulpi a hih mah bangin, Chapa le amah chuom a hinna bulpi nei in a siem:

²⁷Mihiem Chapa a hih ziekin, a kawmah vaihawm theihna thuneihna a piei.

²⁸Ziehaw hi maksa kiu, a hun tung ding ei tai; zie tieng chu leh, thana um cheng chengin a aw zau untin,

²⁹Thân apat in hung pawt vek un au: thilpha hihte chuh hinna changin tho kit un tin; thil gilo hihte vang chuh mawhchang in tho kit un au.

³⁰“Keimah chauh in bangmah ka hih thei puoi; bil a ka zak bang zelin vai ka hawm sek, ka vaihawm chuh diktak ahi, keimah thu thu’n hih ka guo puoh a, ei sawl pa thu thu a hih ka guot zawk sek ziekin.

³¹“Keimah chanchin hetsak ta leng, ka thu hetsak dik puo’n a.

³²Himahleh, ka chanchin hetsakpa chuh mi chuom ahi; amah chun ka chanchin a hetsak chuh a dik hi tih ka hêi.

³³Nang haw’n Johan kawmah mi na sawl u a, amah chun thutak a na gen khum kha.

³⁴Mihiem thu hetsak vang chuh ka pawm puoi, himahlele, na bit theihna dingun ziehaw chuh ka gen zawk ahi.

³⁵Zie Johan chuh thaumei kuong leh vak tak tawbang ahi a, a vaka um takdih na nuom sek u kha.

³⁶Himahlele, hetsakna ka neih hi, Johan hetsakna sang khan a lopi zawi: Pa’n thilhih zawh dinga ei piek, ka thilhihte ngêi hin, Pa’n ei sawl a hi tih, ka chanchin a hetpih ahi.

³⁷Pa, ei sawlpa ngêi chun le, ka chanchin a hetsak tai. Nang haw’n bangmah tikin a aw na za kha puou a, a mel le na mu kha puou hi.

³⁸A sawlpa hi na ginchak loh ziekun, a thugen le na lungthim u ah na vawp zing puou hi.

³⁹Pathien Lehkha thu na sim gunchuh sek ui. A sung ah kumkhuo hinna um ina tih na ginchak ziekun. Zie lehkha thu haw chuh ka chanchin hetsak pên chuh a hi ngâl a.

⁴⁰Himahleh, hinna nei dingin ka kawmah na hung nuom puoh ngâl u a.

⁴¹“Mihiem pahchakna hawl kei puoi.

⁴²Himahleh, nang haw hi bang tawbang mi na hih uh ka hun hêi, Pathien hehpihna na lungthim u ah na nei puou hi.

⁴³Ka pa thu a hung ka hi a, himahleh, nang haw’n nei lawp puou hi; mi dang amah thu’n hung leh, amah chuh na lawp unlau.

⁴⁴Nang haw, kilimbawl tuoh lawpte haw! Pathien tak a pawt, limbawlna chuh na hawl ngâl puou a; bangti’n nei gingcha thei ding u?

⁴⁵Ken, Pa kawma ka hun hêk ding kigingcha kiu, a chunga kinepna na kawih pên uh Mosi khan nang haw hun hêk ding ahi zaw ngâl a.

⁴⁶Mosi na ginchak tak zet u chun, keile ei gingcha ding na hiu a; amah chun keimah chanchin a zik ahi ngâl a.

⁴⁷Himahlele, a thu zikte na ginchak loh ngâl u chun, bangti’n ka thu gente na gingcha thei ding u?” a ti a.