Read Gangte JOHAN 6 Bible Online

JOHAN 6 - Gangte bible

JOHAN 6

¹Zie thil haw nung chun Isu chuh Galili dîl, Tiberia dîl le kiti sek, gâl lehlam achun a chieh a.

²Damlote chunga thilmak a hih haw a muh ziek u chun mipi nasatak in a zui u a.

³Isu chuh tângah a chieh to a, tak achun a sinsakte tawh a chuu a.

⁴Chun, Chiehkân Kut, Judate guolvakna chuh a nai ta a.

⁵Tichun, Isu a khawdak a, mipi tamtak, a kawm lam hun zuonte chuh a mu a, Philip kawmah, “Ziehaw nek ding hi chângthâk hawia kichaw ding ahi ta?” a ti a.

⁶(Zie thu chuh amah zedapna dinga a gen ahi; a hih ding chuh a ma’n a hezing ngâl a.)

⁷Chun, Philip chun a kawmah, “Mitin in, tawmcha chieta a chan dingun le, makhai zanih man, chângthâk kiting puo’n a,” a ti a, a dâwng a.

⁸Chun, sinsakte laka khat, Simon Peter suohpih, Andrew chun a kawmah,

⁹“Buhman-chângthâk pêk nga leh, nga nih nei, pasal chapang khat tak ahin a um hi; himahlele, mi, zie zat zozai laka hin zie chuh bang kham a hi die?” a ti a.

¹⁰Isu’n, “Mipite chuh chut sak un,” a ti a. (Zie tak achun hampa tamtak a um a.) Khutichun, mi chengcheng chuh a chuu a; pating chiet le, sangnga vel ahiu hi.

¹¹Tichun, Isu’n chângthâk chuh a la a, a vangsaka, kipahthu a gen a, sinsakte kawm achun pie, sinsakte chun mipi tuola chute kawma chun a hawmzak tau a. Khutibang mah chun ngahaw chule a hih a, a deih khawp set chiet un a hawm tau a.

¹²Chun, a nek vah suok kêi phet u chun, a sinsakte kawmah, “Bangmah mang lo dingin, a val haw chuh luok un,” a ti a.

¹³Khutichun, a luok u a, buhman-chângthâk pêk nga nete nekval nenhaw chuh, palbawm sawm le nih a luok dim u a.

¹⁴Isu’n zie thilmak a hih chuh a muh phet un, mipite chun, “Zie pa hi, thiemgau, khawvel a hung ding pa khah a na hi na hi!” a tiu a.

¹⁵Ziephet chun, lenga siem dinga mat hâm guo’n hung ding ahiu hi tih Isu’n a he a; tângah amah chauh in a chieh chuom kit ta a.

¹⁶Chun, ni a hung tâk phetin, Isu sinsakte chuh dila chun a va chieh suk u a,

¹⁷Kuong ah a chuu a, dîl chuh a kân u a, Kapernaum khuo lam ah a chieh kit tau a. Khuo a thim ta a, Isu chu la a kawmuh a tung nai puoh a.

¹⁸Zie lai chun, huihpi nasatak in a hung nung ta a, tui chuh a hung kinawk sang tel tel ta a.

¹⁹Chun, chîng sawmnih leh chîng nga ahim, chîng sawmthum ahim a kitawl u chun, Isu chuh dîl chunga kenga chieh a, kuong hun naih in a muu a, a lau tau a.

²⁰Ziephet chun, Isu’n a kawm u ah, “Kei ka hi a puo! lau kiu in,” a ti a.

²¹Khutichun, kuong a chut sak chuh a nuom tau a; tichun, kintakin kuong chun a zawt uh lui pang chuh a tung pai zieng tau hi.

²²Chun, a zing chun, dîl gâl langkhat a mipi umte chun kuong khat chauh tak achun a um hi tih a heu a. Isu chuh a sinsakte kawmah kuong achun a chu puoi tih leh, a sinsakte chuh amau haw mai in a chieh ui tih a he tau a.

²³Himahleh, LALPA’n kipahthu gena, mipite’n chângthâk a nekna kieng uh lui pang achun, Teberius apat in kuong dang a hungtung ngâl a.

²⁴Khutichun, mipite chun, taka chun Isu a um ta puoh a, a sinsakte le a um diek ta puou ui tih a muh phet u chun, amau haw le kuonghaw achun a chuu a; Isu hawl dingin Kapernaum khuo ah a chieh tau a.

²⁵Tichun, mipite chun Isu dîl gâl langkhat a a muh phet u chun, a kawmah, “Sinsakpa, bang tika lam hi hung tung?” a tiu a.

²⁶Isu’n a dâwng a, “Tihtakzet a ka hilh na hiu hi, thilmak haw hi na muh ziek u a ei hawl na hi puou a, chângthâk pek na nek vah ziek u a ei hawl na hi zawu ui.

²⁷An khadang a mang mai ding delh in phe phe kiu in, himahleh kumkhuo a hin chana um ding an, Mihiem Chapa’n a hun piek ding chuh delh in phe zawu un: Pa Pathien chun amah chuh a melchik ta ngâl a,” a ti a.

²⁸Amau chun a kawmah, “Pathien na ka sep theihna dingun banga ka hih dinguh?” a tiu a.

²⁹Isu’n a kawm u ah, “Pathien nasep chuh ziehi ahi: a mi sawl hi gingchau in,” a ti a.

³⁰Amau chun a kawmah, “Ka muh u a, ka ginchak theihna dingun, bang thilmak a na hih ding?

³¹Ka puteu, ka pateu in thaleka khan manna a ne sek ui; ‘Van apat chun a kawm u ah chângthâk nek ding a piei’ tih Pathien lehkha thu’n a gen guol khan,” a tiu a.

³²Isu’n a kawm u ah, “Tihtakzet a, tihtakzet a ka hilh na hiu, van apana chângthâk na muh u kha Mosi hun piek ei puoi, ka Pa chun chuh, van apat in chângthâk tak a hun piek na hiu hi.

³³Pathien chângthâk piek chuh, van apana hung suk, vannuoi leisiet kawma hinna piepa hi ahi,” a ti a.

³⁴Chun, amau chun a kawmah, “LALPA, zie chângthâk chuh kei uh ei pie zingin,” a tiu a.

³⁵Isu’n a kawm u ah, “Kei hi hinna chângthâk chuh ka hi, kuole, ka kawma hung chuh a gil kiel puo’n a, kuole, ei gingcha chuh, bangtik inle a dangchâk puo’n a.

³⁶Himahlele, nang haw’n nei muh un le, nei gingcha puou hi tih ka hun hilh ta kha.

³⁷Pa’n ei piek chengcheng chuh ka kawmah hung vek un au; kuole, ka kawma hung chuh nawhdawk hiel puo’ng ka.

³⁸Kei deih bang hih dinga van apat a hung suk ka hi puoh a, ei sawl pa deih bang hih dinga hung suk ka hi zawi.

³⁹Ei sawl pa deih bang chuh, Ama’n ei piek chengcheng khat chale mansak lo a, ni tâwp ni a a bawn u a hinna changa kaih thawh vek chuh ahi.

⁴⁰Chun, ziehi ka Pa deih bang ahi: kuole, Cha mu a gingcha ta’n kumsawt hinna nei a, chun, ken ni tawp ni leh hinna a ka kaih thawh ding chuh,” a ti a.

⁴¹Chun, “Van apat a chângthâk hung suk chuh ka hi,” a tih ziekin, Judate chuh a chungah a phunchiek u a.

⁴²“Zie pa hi Joseph chapa Isu hilo ahim? A nu leh a pa le I heu hi, van apana hung suk ka hi, bangti tih a a tih a hi die leh?” a tiu a.

⁴³Ziephet chun, Isu’n a kawm u ah, “Phunchiek chiek kiu,

⁴⁴Pa, ei sawl pa’n a hîp loh chun, kuomah ka kawmah hung thei puo’n au; chun, ken ni tâwp ni chuleh a hung chuh kaitho ing ka.

⁴⁵Thiemgaute’n, ‘Mi tin chuh, Pathien sinsak in um vek un au,’ ti’n a zikuh ahi. Kuole, Pa thu he a, sin ta chuh, ka kawmah a hung sek ui.

⁴⁶Mi kuoma’n Pa a mu ngei puou hi, Pathien kawm apat a hung pa ngâllo chun, amah chauh chuh Pa mu ahi.

⁴⁷Tihtakzet a ka hilh na hiu, kuole, a gingcha chun, kumsawt a hinna a nei hi.

⁴⁸Kei hi hinna chângthâk chuh ka hi.

⁴⁹Na pu leh na pateu in thalek ah manna khah a ne nau a, himahleh a thi sek ui.

⁵⁰Himahlele, van apat a chângthâk hung suk chuh zie tawbang hi ahi, mi’n a nek a, a thih loh nau hi.

⁵¹Kei hi, van apana chângthâk hing hung suk chuh ka hi, kuo’n le zie chângthâk hi a nek chun, kumsawt in hing zing in a, khawvel hinna dinga chângthâk ka piek ding chuh, ka phehlevo hih ahi.” a ti a.

⁵²Khutichun, Judate a kiniel u a, “Zie pa hin, bangtia a pheh nek dinga ei pie ding ahi die?” a kitiu a.

⁵³Ziephet chun, Isu’n a kawm u ah, “Tihtakzet, tihtakzet a ka hilh na hiu hi, Mihiem Chapa phehlevo na nek u a, a thisan na dâwn loh u chun, nangmau in hinna nei hawn lo chuh.

⁵⁴Kuole, ka phehlevo ne a, ka thisan dâwn chun, kumkhuo a hinna a nei tai; chun, ni tâwp ni chuleh amah chuh kaitho ing ka.

⁵⁵Ka phehlevo hi an tak ahi a, ka thisan hi dâwn ding tak ahi ngâl a.

⁵⁶Kuole, ka phehlevo ne a, ka thisan dâwn chun kei ei kipapvaipih zing sek a, ken le amah ka kipapvaipih zing sek hi.

⁵⁷Pa hing chun ei sawl a, Pa vanga hing ka hih guol mah hin. Zieziekchun, kuole, kei ei ne chuh keimah vangin amah le hing ina.

⁵⁸Ziehi van apana chângthâk hung suk chuh ahi, na puteu na pateu in chângthâk a nek u a, a thih sek guol u khah ei puoi; kuole, zie chângthâk ne hi chuh kumkhuo’n hing zing ina,” a ti a.

⁵⁹Zie thu haw hi Isu’n Kapernaum khuo a kikhawpna ina a sinsak laia a gen ahi.

⁶⁰Khutichun, a nungzuite tamtak chun, zie chuh a het phet un, “Zie hi thu sinsakna haksa tak ahi, kuo a ching sawn thei ding?” a tiu a.

⁶¹Kuomah hilh loh in, zie thu a chun a phunchiek ui tih Isu’n a he a, a kawm u ah, “Zie thu hin a hun sulungkim lo ahi maw?

⁶²Mihiem Chapa hi, tuma a a umna ngeia kal to na muh u chun bang na lawh ta ding u leh?

⁶³Hinna pietu chuh Thagau ahi a, mihiem thilhih theihna chuh bangmah a kân puoi. Na kawm u a ka thugen hi Thagau ahi a, chun, hinna le ahi.

⁶⁴Himahlele, na laku ah abang gingcha lo na um nalai ui.” a ti a. (Isu’n a gingchalo leh a matsak ding pa chuh, atûng apat a hezing ngâl a.)

⁶⁵Amah mah chun, “Zieziekchun ahi, na kawm u a, ‘Pa’n a piek a hih loh chun, kuomah ka kawmah hung thei puo’n au,’ ka tih khah,” a ti a.

⁶⁶Ziephet chun, a nungzuite tamtak a chieh mang tau a, amah a kivawppih kit ta puou hi.

⁶⁷Khutichun, Isu’n sawm le nih te kawm achun, “Nang haw le chieh mang na nuom um?” a ti a.

⁶⁸Simon Peter in a kawmah, “LALPA, kuo kawma e ka chieh dinguh? Nangin kumsawt hinna na nei a puo!

⁶⁹Nang, Krista, Pathien hing Chapa chuh na hii tih ka gingcha tau a, het le ka heu hi,” a ti a.

⁷⁰Chun, Isu’n a kawmah, “Nanguh sawm le nih te hi, keimah tel hilo na hiu hi? Na lak u a khat Diabol a hih kit kit tawh!” a ti a.

⁷¹Iskariot Simon chapa Juda, sawm le nih te laka tel pa thu khah a gen ahi, amah chuh a matsak ding ahi ngâl a.