Read Gangte JOHAN 7 Bible Online

JOHAN 7 - Gangte bible

JOHAN 7

¹Zie thil haw nung chun, Isu’n Galili gam a tawh viel a; Judate’n amah thah a guot ziekun Judai gam chuh a tawh nuom ta puoh a.

²Chun, Judate Bawkcha Kut chuh a nai ta a.

³khutichun, Isu suohpihte’n a kawmah, “Zie tak mun hi taihsan inla, Judai gam ah va chieh ah, na nungzuite’n le na thilhih hi a muh theihna dingun.

⁴Kuoma’n, amah minthan nuom ngâl in, a thilhih teu a îm sek puou hi. Zie thil hawpi hi na hih ta ngâl a, zieziekchun, khawvel pumpi’n hun he suok kêi u he’n!” a tiu a.

⁵(A suohpihte nasan chun le amah a gingcha ngâl puou a.)

⁶Isu’n a kawm u ah, “Ka hun a tung nai puoi, nang haw hun vang chuh a tung zing ahi.

⁷Khawvel in nanguh a hun haw thei puou hi, kei vang chuh ei haw sek ui, a thilhih hawu a gilo ahi tih ka hilhchet sek ziekin.

⁸Nanguh Kut na achun va chieh un, kei vang chuh tuchung Kut a hin chieh lo ding ka hi, ka hun a tun nai loh ziekin,” a ti a.

⁹Zie thu chuh a kawm u a gen in, Galili gam achun a um zing zaw ta a.

¹⁰A suohpihte Kut na a dinga a va chieh nung u chun, Isu chule Kut na achun a va chieh a, himahlele, tângphuong taka chieh lo in, a gûkin a chieh a.

¹¹Judate’n amah chuh Kut na achun a hawl u a, “Khawitak ah a um hi?” a tiu a.

¹²Amah chungchâng thu achun, mipite chuh a kiho gu sausau u a, a bangin, “Mi pha ahi,” a tiu a, abang in, “Naisai lo e! mi a pui mang zaw sek ahi,” a tiu a.

¹³Himahlele, Judate a lauh ziekun kuoma’n a chungchâng thu tâng-phuong takin a gen ngam puou hi.

¹⁴Chun, Kut vanglai takin, Isu chuh Pathien Ho-In ah a va chieh a, a sinsak a.

¹⁵Judate chun, “Zie pa hin zil khalo a, bangtia zie bangpi a hi thiem ahi die?” ti’n, mak a sa ten u a.

¹⁶Isu’n amau haw chuh a dâwng a, “Ka thu sinsak hi keia a hi puoh a, ei sawlpa a ahi zawi.

¹⁷Kuole, Pathien deih bang hih nuom ta chun, ka thu sinsak hi Pathien apat ahim, keimah thu a gen ka him, tih he’nau.

¹⁸Kuole, amah phuok kawm thugen chuh, amah lopina ding kihawl ahiu hi. Himahlele, a sawl pa lopina ding hawlte vang chuh mi diktak ahi a; amah achun diklohna him a um puoi.

¹⁹Mosi’n Dan chuh. na kawm u ah a hun pie hilo maw? Himahlele, na lak uh a kuoma’n Dan chuh na hawh ngâl puou a. Nangun, bangati a ei thah guo?” a ti a.

²⁰Mipite chun, “Thitha vawp na hi hi! kuo a nang hun thah guo?” a tiu a.

²¹Isu’n a dâwng a, “Thilmak khat ka hih kha, nang haw cheng chengin mak na sau a.

²²Mosi’n, na chateu zektan ding thu a hun piek kha (Mosi pat hilo in, nang haw hun suonte’n a na pat uh himahleh), Chawlhni’n pasal naupang zek na tan sek uh ahi.

²³Mosi dân bawhsiet lohna dinga, Chawlhni a pasal naupang zek na tan sak ngâl u chun, bang zieka Chawlhni a mi ka sukdam zieka, ka chunga lungna na hiu hi?

²⁴Pawlam latdan mai in thutanna siem kiu inla, diktat takin hih zawu un,” a ti a.

²⁵Khutichun, Jerusalem khuo a mi khenkhat in, “Zie pa hi thah a guotpau chuh hilo ahim?

²⁶En tiem u! tângphuong takin thu a gen a, a kawmah bangmah a gen diek puou hi. Amah hi Krista a hii, tih thuneitu te’n a he tak tak ta ding u aw?

²⁷Krista chuh a hung tieng leh, kuoma’n a hung kipatna he lo ding hi a. Himahlele, I bawn un zie mi hung kipatna hi I he vek ngâl u a,” a tiu a.

²⁸Isu’n, Pathien Ho-In a a sinsak lai in, aw ngeih tak in a kiko a, “Nangun kei nei heu a, ka hung kipatna le na heu hi. Keimah thu a hung ka hi puoi. Bang hitaleh, ei sawl pa hi a dik ahi. Amah chuh na he ngâl puou hi,

²⁹Himahleh, ken ka hêi, amah apat a hung leh, amah ei sawl ka hih ziekin,” a ti a.

³⁰Ziephet chun, amah chuh mat a guo tau a, himahlele, a hun a tun nai loh ziekin, kuoma’n a chungah a khut uh a tha puou hi.

³¹Mipi, abang, tamtak vang chun amah a gingchau a, “Krista chuh a hung tun tieng leh, zie pa hih sanga tam zaw hi thilmak hun hih ding a hi a a hi?” a tiu a.

³²Chun, Pharisaite chun, Isu chung thu a mipite phun gukna thu haw chuh a heu a: tichun, thiempu liente leh Pharisaite chun a man dingin, mivengte a sawl tau a.

³³Chun, Isu’n, “Na kawm u ah chawmkhat um tadih zet ing ka ting, ei sawl pa kawmah chieh ing ka.

³⁴Nangun ei hawl un na tin uh, ei mu ngâl puo’n lau; ka umna a le hung thei puo’n lau,” a ti a.

³⁵Ziephet chun, Judate chuh a kiho u a, “I muh loh dingun zie pa hi hawia chieh ding a hi? Grik khawpite a I miteu chênna a chuh chieh in, Grikte chuh a va sinsak ding a hi die?

³⁶‘Nangun ei hawl un na tin uh, ei mu ngâl puo’n lau, ka umna ale hung thei puo’n lau,’ a ti a, bang tihna a hi die?” a tiu a.

³⁷Chun, Kut kichaihna ding ni lopi pên achun Isu a ding a, aw ngeih tak in a kiko a, “Kuole, a dang a châk chun, ka kawmah hung hen la, dâwn heh.

³⁸Kuole, ei gingcha chuh, Pathien lehkhabu gen guolin, hintui lui haw chuh a lunggil apat hung luong dawk ina,” a ti a.

³⁹Isu’n, zie thu haw chuh, a gingchate’n Thagau a muhna ding thuu a genna ahi. Thagau chuh piek a hi tadih puou, Isu chuh lopina a kaihthawh a a um nai loh ziekin.

⁴⁰Khutichun, mipite laka khenkhatte chun zie thu kigen chuh a het phet un, “Zie pa hi, thiemgau a hi tak zet hi,” a tiu a.

⁴¹A dang chun, “Krista chuh a hii,” a tiu a. Himahleh, khenkhatte chun, “Khawilak ah, Krista chuh Galili gam ah hung pawt ding a hi a ahi? a tiu a.

⁴²Krista chuh, David suonte lak ah, David umna khawpi, Bethlehem ah hung pieng ding ahi, tih ahi ngâl a.” a tiu a.

⁴³Khutichun, Isu ziek chun mipite lak achun kibungkhenna a hung um ta a.

⁴⁴Khenkhatte chun mat a nuom u a, himahlele, kuoma’n a chungah khut a tha puou hi.

⁴⁵Mi mante chuh thiempu liente leh Pharisaite kawma a hungkit phet u chun, thiempu liente.leh Pharisaite chun, “Bang zieka hun pui lo?” ti’n a na dawng u a.

⁴⁶Mi mante chun, “Tawbang himhim khun kuoma’n thu a gen kha puou!” ti’n a dâwng u a.

⁴⁷Chun, Pharisaite chun a kawm u ah, “Nang haw le a hun sukngawl na hi tau maw?

⁴⁸Lawiupate leh Pharisaite laka mi himhim, amah gingcha a um kha tau hi?

⁴⁹Zie mipite hin Mosi dân chuh a he puou a, Pathien hansie nuoia um ahiu a puo!” ti’n a dâwng u a.

⁵⁰Ma a Isu kawma hung Nikodem khah, a laku ah a tel a, amah chun a kawm u ah,

⁵¹“Mi, amah kama thu kiza leh, a thilhih het ma’n, I dân un mi thiemmawh I chansak thei puou hi,” a ti a.

⁵²Amau chun a kawmah, “Nang chule, Galili mi na hi a a hi? Pathien lehkha thu sim in, tichun, Galili gam apat in thiemgau kuomah a pawt ngei puoi tih he ta’n la,” a tiu a, a dâwng u a.

⁵³Tichun, mi chengcheng chuh In lam ah a kikhen zak tau hi.