Read Gangte JOHAN 8 Bible Online

JOHAN 8 - Gangte bible

JOHAN 8

²A zingkal kit matak chun, Pathien Ho-In ah a chieh kit a. Mipi chengcheng chuh a kawmah a hung u a, chun, a chu a, amau haw chuh a sinsak ta a.

³Tichun, dân thuzikte leh Pharisaite’n numei khat, a zawlsaih peta a mat uh a hun pui u a; a lai tak ah a din sak u a,

⁴Isu kawmah, “Sinsakpa, zie numei hi, a zawlsaih peta a mat uh ahi.

⁵Dan lehkhabu ah Mosi’n, zie tawbang mi hi suong a sehlup thu ei pie a; nangin bangti’n na ngai a?” ti’n a dawng u a.

⁶Zie thu chuh amah mat theihna dingin a gen uh ahi, a hêkna ding a muh theihna dingun. Khutichun, Isu a khun a, a khutzung in leituol a zik a.

⁷Zie taka chuh dinsa a a dawt ngek ngek ziekun, amah chuh a kipan a, a kawm u ah, “Na lak u a gitloh nei lo chengin amah chuh suongin sep masa heh,” a ti a.

⁸Tichun, a khun kit a, a khutzung in leituol a zik kit a.

⁹Amau haw chun a thugen chuh a het un, a sielepha hetnau in thiemloh chansak in, a upapen in a pan a, a tâwp tiengin, khat cha cha’n a kigelhdawk zel u a; tichun, Isu leh numei a laia a dinsak u kha tawh nusieh tau hi.

¹⁰Tichun, Isu a kipan a, a kawmah, “Numei, hawi ah a um tau hi? Kuomah mawh hun chansak ding a um ta puou maw?” a ti a.

¹¹Amah chun a kawmah, “LALPA, kuoma’n ei chan sak puou hi,” a ti a. Ziephet chun, Isu’n, “Ken le mawh ka hun chan sak puoi; chieh inla, tunung leh, hih gilo kit ta kih,” a ti a.

¹²Chun, Isu’n Pharisaite kawmah thu a gen kit a, “Kei khawvel salh vak chuh ka hii; kuole, ei zui chuh thim lak ah leng puo’n tin, hinna vak nei zaw’na,” a ti a.

¹³Khutichun, Pharisaite’n a kawmah, “Nangmah thu hetsak na hii, na thu hetsak a dik puoi,” a tiu a.

¹⁴Isu’n a kawm u ah, “Keimah thu hetsak hi leng le, ka thu hetsak a dik ahi; ken ka hung kipatna leh, ka chiehna ding chin le ka hêi. Nang haw vangin, ka hung kipatna leh, khawia chieh ding ka hih na he ngâl puou a.

¹⁵Nang haw’n mihiem dân guol takin na awimawh sek ui, kei vangin kuomah ka awimawh puoi.

¹⁶Himahleh, a na awimawh hita leng chuh, ka awihmawhna thu chuh dik ina, kei mai ka hi puoh a; Pa, ei sawl pa chun ei umpih ziekin.

¹⁷Na Dan Lehkhabu ale. ‘Mi nih thu a dik hi,’ tih zik a hi ngâl a.

¹⁸Kei hi ka thu hetpihtu ka hi a. Pa, ei sawlpa chun le ka thu ei hetpih kit hi,” a ti a.

¹⁹Amau chun a kawmah, “Na pa hawitak a um a?” ti’n a dawng u a. Isu’n a dâwng a, “Nang un kei nei he puou a, ka Pa le na he diek puou; Kei nei het u chun, ka Pa le he’n lau,” a ti a.

²⁰Isu’n zie thu haw chuh, Pathien Ho-In a, tuoklawm khiekna thingkuong kawihna pindan a a sinsak laia a gen ahi. A hun a tun nai loh ziekin, kuoma’n a man puoh ngâl u a.

²¹Chun, Isu’n a kawm u ah a gen kit a, “Chieh mang ding ka hi; ei hawl un na tin, himahleh, na gitlohnau nei zingin thi’n lau. Ka chiehna ding ah hung thei puo’n lau,” a ti a.

²²Chun, Judate chun, “Ka chiehna ding ah hung thei puo’n lau, a tih hi amah kithat ding a hi die?” a tiu a.

²³Isu’n a dâwng a, “Nang haw zie khawvel a mi hi na hiu a, Kei vang chunglam apat a hung ka hi. Nanguh zie khawvel a pawt na hiu a, Kei vang, zie khawvel a pawt hi kei puoi.

²⁴Zieziekchun ahi, na gitloh uh nei zingin thi’n lau ka hun tih khah. ‘Amah chuh Kei ka hi’ tih na ginchak loh u chun, na gitloh uh nei zingin thi tei un lau,” a ti a.

²⁵Amau chun a kawmah, “Kuo hile ba na hi a ahim?” a tiu a. Isu’n a kawm u ah, “Atûng apat na kawm u a ka gen sek khah.

²⁶Nang haw chungchâng thu ahin gen ding thil tamtak leh, hun thiemmawhna ding tamtak ka nei hi. Bang hitaleh, ei sawl pa chuh mi diktat ahi; a kawm apat thu ka zâk tâk, khawvel mite kawmah ka gen sek hi,” a ti a.

²⁷Himahlele, Isu’n a kawm u ah Pa thu a gen hi tih a he puou hi.

²⁸Khutichun, Isu mah in a kawm u ah, “Nang un Mihiem Chapa hi na khaih kâng nung u leh, amah chuh ka hii, tih leh. Ken, keimah thu’n thil bangmah ka hih puoi, Pa’n ei hilh guol zel in zie thu haw hi ka gen zawk sek a hi tih hun he ding na hiu.

²⁹Ei sawlpa chuh ka kawmah a um a, ei thahtham puoi; a thil kipahlam tak ka hih zing sek ziekin,” a ti a.

³⁰Isu’n zie thu a gen zate mi tamtak chun amah a gingcha tau hi.

³¹Khutichun, Isu’n a gingcha Judate kawm achun, “Ka thu sinsakte na zuih tak tak u chun, ka sinsakte hi’n lau;

³²tichun, thutak hun heu in na tin uh, Thutak chun suok hun haihsak ina,” a ti a.

³³Amau haw chun a kawmah “Abraham suonte ka hiu a puo! tu tiengin kuomah suok in ka um ngei puou hi, ‘Suok hun haihsak un au’ bangti tih a na tih ahi?” a tiu a.

³⁴Isu’n a kawm u ah, “Tihtakzet, tihtakzet a ka hilh na hiu hi, kuole, thil hihgilo ta gitloh suok ahi.

³⁵Suok chuh kumlekhuo’n In ah a um zing puoi, chapa vang chuh kumkhuo’n a um zing sek hi.

³⁶Zieziekchun, Chapa’n ahun suohchak sak chun, suokcha tak tak un lau.

³⁷Abraham suonte na hiu hi tih ka hun hêi. Himahleh, thah nei guo tei tei ui, ka thu sinsakte na pawm loh ziekun.

³⁸Ken, ka Pa kawma thil ka muh te chuh ka gen sek a, nangun. le na pau kawma thil na zak u chuh na hih sek ui,” a ti a.

³⁹Amau chun. “Ka pau chuh Abraham ahi,” ti’n a dâwng u a. Isu’n a dâwng a, “Abraham chate na hih tak tak u chun, Abraham thil hihte chuh na hih puoh ding u!

⁴⁰Pathien kawm apat a thudik ka zak chengcheng ka hun hilh a, himahleh, thah nei guo ngâl u a. Abraham in tawbang hin thil a hih ngei dang e!

⁴¹Nang haw vangin, na pau thilhihte chuh na hih sek uh ahi,” a ti a. Chun, amau chun a kawmah, “Zawlcha a pieng ka hi puou a, Pa khat mai ka nei ui, Pathien ngêi chuh,” a tiu a.

⁴²Isu’n a kawm u ah, “Pathien na pau a hih chun, nangun ei hehpih ta’n lau; Pathien kawma pawt leh, a kawm apat hung ka hi ngâl a. Keimah thu a hung ka hi puoh a, ama’n ei sawl zawk ka hi.

⁴³Bangti dana ka thugente hethiem lo? Ka thugente na ngaihthak nawp loh ziekuh ahi.

⁴⁴Nang u chuh na pau Diabol chate na hiu a, na pau deih guol zuih na nuom uh ahi. A tunga kipatin tuolthat a hi a, thudik lam ah a pang ngei puoi, thudik amah a a um loh ziekin. Lepchieh thu a gen tieng leh, amah ngeina mawng hih a hi a, amah chuh lepchieh a hi a, lepchieh pa le ahi.

⁴⁵Thudik ka gen ziekin, nang haw’n nei gingcha lo uh ahi.

⁴⁶Na lak u a kuoa, gitlohna lama mawh ei chan sak thei ding um? Thutak ka gen nasan a le, bang zieka ei gingcha lo na hiu hi?

⁴⁷Pathien kawma pawt chun, Pathien thu a ngaitha sek hi. Zieziek taka chuh na ngaihnawp loh uh ahi, Pathien kawma pawt na hih loh ziekun,” a ti a.

⁴⁸Judate chun a kawmah, “Samari mi, thitha vawp na hi, ka hun tih u khah, ka gen dik zet uh hi na lo maw?” a tiu a, a dâwng u a.

⁴⁹Isu’n. “Thitha vawp ka hi puoi, ka Pa ka limbawl ahi zawi, nang haw’n nei limbawl loh zawk uh ahi.

⁵⁰Keimah kilimbawlna ding hawl ka hi puoh a, a hawl leh a ngaihtuoh chuh mi khat a um hi.

⁵¹Thudik tak ka hun hilh na hiu hi, kuo’nle, ka thu a zawp chun, thih ni mel mu puo’n a,” a ti a.

⁵²Chun, amau chun a kawmah, “Thitha vawp na hi tih tu’n ka he tau hi! Abraham a thi ta a, thiemgaute le a thi tau a, himahleh, nangin, kuo’nle, ka thu a zawp chun thihna mel mu puo’n au na ti nalai a.

⁵³Ei suonpau Abraham chuh a thi ta a; Abraham sangin ka lopi zawi ti na hi maw? Thiemgaute le a thi tau a, kuo a kisiem na hi?” a tiu a.

⁵⁴Isu’n a dâwng a, “Keimah kilimbawl hi leng, zie limbawlna chuh bangmah hi puo’n a. Ka Pathien uh, na tih uh, ka Pa ngêi chuh ei limbawl pa ahi.

⁵⁵Nangun amah na he kha puou a, himahleh, ken ka hêi. Amah chuh ka he kha puoi, ti leng, nang haw guol mah a lepchieh hi ding ka hi. Himahleh, amah chuh ka he a, a thu le ka zawp ahi.

⁵⁶Na puu Abraham kha, ka ni hung mu ding a hih ziekin a lawp mah mah a, a mu ta ngêi a, a kipâk ahi.” a ti a.

⁵⁷Amau chun a kawmah, “Nang, kum sawmnga bêk le hilo in, Abraham na mu ngei a ahim?” a tiu a.

⁵⁸Isu’n a kawm u ah, “Tihtakzet, tihtakzet a ka hilh na hiu, Abraham pien ma’n le ka um hi,” a ti a.

⁵⁹Ziephet chun, a sehna dingin suong a luok u a, himahleh, Isu a kisel a, Pathien Ho-In apat chun a pawt a; a lak u chuh a hawh phei a, a chiehdawk ta a.