Read Gangte JOHAN 9 Bible Online

JOHAN 9 - Gangte bible

JOHAN 9

¹Chun, Isu’n a chieh kawmin, a pien tûng apat mitdûk khat a mu a.

²A sinsakte’n a kawmah, “Rabbi, mitdûksa a a pien hi, kuo’n thil a hih gilo a ahim, zie pa hin ahim, a nu leh a pa’n?” ti’n a dawng u a.

³Isu’n a dâwng a, “Zie pa hin la a hih gilo puo’n, a nu leh a pa’n la a hih gilo diek puou hi; Pathien thilhih-theihna’n amah chunga a sep ngêi kilatna ding a hi zawi.

⁴Sun a hih pet in ei sawlpa na I sep ding ahi; zan hi ding ei tai, zie tieng chuleh kuoma’n na sem thei ta puo’n au.

⁵Van nuoia ka um sung hin, vannuoi salhvak pa ka hi,” a ti a.

⁶Isu’n zie thu a gen zawh chun, tuol ah chil a siet a, chil chun tung a siem a, tung chuh a mit ah a nuh a, chun a kawmah,

⁷“Siloam Dil ah va sil ah,” a ti a. (Siloam chuh “Sawl” tihna ahi.) Tichun, a va chieh a, a sil a, mit vakin a hungkit ta a.

⁸Ziephet chun, a vengte leh, masanga a khutdawh mu sekte chun, “Zie pa hih chutsa a khutdawh sek khah hilo ahim?” a tiu a.

⁹Khenkhat chun, “Amah kha ahi,” a tiu a. Himahleh, a dangin, “A hi puoi, a kibatpih a hi zawi,” a tiu a. Amah chun, “Amah kha ka hii,” a ti a.

¹⁰Chun, amau haw chun a kawmah, “Na mit bangtia hung vak ahi leh?” a tiu a.

¹¹Amah chun, “Isu a tih u khan tung a siem a, ka mit ah a nuh a, ‘Siloam Dil ah va chieh inla, va sil ah,’ ei ti a, khutichun, ka va chieh a, ka sil a, mit vakna ka muh ahi ta hi,” a ti a, a dâwng a.

¹²Amau chun a kawmah, “Amah chuh hawitak a um ahi?” a tiu a. Amah chun “Ka he puoi,” a ti a.

¹³Amau chun masanga a mit ana dûk pa chuh Pharisaite kawmah a pui u a,

¹⁴Isu’n tung a siem a, mitdûk a sukdam ni chuh chawlhni ahi a.

¹⁵Tichun, Pharisaite’n a mit a hung vak dân chuh a dawng kit u a. Amah chun a kawm u ah, “Ka mit ah tung a nuh a, ka sil a, ti a chuh ka hun muh theih mai ahi,” a ti a.

¹⁶Chun, Pharisaite abang in, “Zie pa hi Pathien kawma pawt hi puo’n a a ziek chuh, Chawlhni a nit puoi,” a tiu a. Khenkhatte’n vang chuh, “Migilo in bangti’n a, zie tawbang thilmak hi a hih theih ding?” a tiu a. Khutichun, a laku ah kibungkhenna a hung um ta a.

¹⁷Khutichun, Pharisaite’n mitdûkpa chuh a vel dawt kit u a, “Na mit a hih vak khah nangin bangti’n na ngai hi?” a tiu a. Amah chun, “Thiemgau ahi,” a ti a.

¹⁸Himahlele, Judate’n mitdûk nu leh pa chuh a sap macheng u chun, mitdûksa leh, tu a hun mu thei ei tai tih thu chuh a gingcha nuom puou hi.

¹⁹Tichun, a nu leh a pa kawmah, “Zie pa hi, na chapau, mitdûksa a pieng na tihpau kha hilo ahim? Bangtia, tu a hun mu thei ahi ta leh?” ti’n a dawng u a.

²⁰A nu leh pa chun, “Ziehi ka chapau ahi tih ka heu hi, chuleh, mitdûksa a pieng hi tih le ka heu hi.

²¹Himahlele, bangtia tu a hi hun mu thei ahi tam tih ka he puou a, a mit hihvak pa le ka he diek puou hi. Amah dawng un, amah le pating ahi a puo, amah chungchâng chuh ama’n kigen heh!” ti’n a dâwng u a.

²²Judate a lauh ziekun a nu leh a pa’n zie thu haw chuh a gen uh ahi; ziehaw chun, “Kuo’n le, Amah chuh Krista a hii, ti a gingcha ta chuh, kikhawpna In apat nawhdawk ngêi ngêi ding ahi,” ti’n a kithuguol suok kêi ta ngâl u a.

²³Zieziek tak chun ahi, a nu leh a pa’n, “Amah dawng un, pating a puo!” a tih u chuh.

²⁴Khutichun, mitdûkpa chuh a vel sap kit u a, a kawmah, “Pathien pakchah! keihaw’n vang zie pa kha migilo a hi tih ka heu hi!” a tiu a.

²⁵Amah chun, “Migilo a hih leh hih loh ka he puoi, thil khat ka hêi! tuma khan mitdûk ka hi a, tuhin ka mu thei tai,” a ti a.

²⁶Amau chun, “Na chungah bangti’n a hih a? Na mit bangti’n a hih vak a?” a tiu a.

²⁷Amah chun a kawm u ah, “Dan khan ka hun hilh ta kha la, na he nuom puou a. Bang dinga he kit nuom ta? Nang haw le a sinsakte hih nuom na hi tau maw?” ti’n a dâwng a.

²⁸Amau chun hansie buokkhum tawh thuoh in, “Nang hi amah sinsak na hi a, keihaw vang Mosi sinsakte ka hiu a puo.

²⁹Pathien in Mosi a hopih hi tih ka heu a; zie pa hi hâwi apat a hung pawt a hih het le ka he dang u!” a tiu a.

³⁰Zie pa chun a kawm u ah, “Zie tak chuh ahi, a mâkna chuh, hâwi apat a hung pawt a hih na het loh u a, ka mit a hih vak ngâl hi!

³¹Pathien in migilo thu a ngaitha sek puoi tih ka heu; himahlele, kuon le, Pathien a limbawl a, a deih bang thilte a hih chun, amah chuh a ngaitha sek hi.

³²Khawvel kisiem tûng apat, kuoma’n mitdûksa a pieng a hih vak kit hi tih, a kihe kha puoi.

³³Zie pa hile, Pathien kawma pawt a hih loh chun, bangmah hih thei puo’n a,” ti’n a dâwng a.

³⁴Chun, amau chun a kawmah, “Nang na pum changsana gitloh a pieng na hi a puo, nangin nei hun hilh vangvei hih!” ti’n a dawng u a. Khutichun, kikhawpna In apat chun a nawhdawk tau hi.

³⁵Chun, a nawhdawk ui tih Isu’n a na het phetin, amah chuh a hawl dawk a, a kawmah, “Pathien Chapa na gingcha?” ti’n a dawng a.

³⁶Amah chun, “Hepu, amah chuh kuo ahi? Ka ginchak theihna dingin ei hilh in,” a ti a.

³⁷Isu’n a kawmah, “Amah chuh na mu ta a puo, tu a hun hopih pa hi a hi a puo!” a ti a.

³⁸Ziephet chun, amah chun, “LALPA, ka gingchai!” ti’n Isu masanga chun a khupdin ta a.

³⁹Isu’n “Zie vannuoi leisiet a hin, vaihawm dinga hung suk ka hi, mitdûkte chuh a mit uh a hung vakna ding leh, mit vakte chuh a mit uh a hung dûkna dingin,” a ti a.

⁴⁰Zie taka Pharisai khenkhat umte chun, zie a thugen chuh a zau a, a kawmah, “Keihaw hile, mitdûk ka hiu hi leh?” ti’n a dawng u a.

⁴¹Isu’n a kawm u ah, “Mitdûk na hih u chun, gitloh nei puo’n lau, himahlele, tun ka mu thei ui na ti ngâl u a, zieziekchun, na gitloh uh a um zing a hii,” a ti a.