Read Gangte NASEPTE 11 Bible Online

NASEPTE 11 - Gangte bible

NASEPTE 11

¹Chun, Judea gama Sawlchakte leh, suohpih umte chun, Jentel te’n le Pathien thu a zawp tau ui tih a za tau a.

²Tichun, Peter chuh Jerusalem a tun toh phetin, zektan lawi in a kawmah,

³“Zek tan lohte In ah na lut a, a kawm u ah an na ne viel a!” ti’n a na phun khum u a.

⁴Himahleh, Peter chun abul apat in kizawm zieh zieh in a kawm u ah a hilhchien a;

⁵“Joppa khuo a paucham a ka um lai in, vaulam thilmuh ka nei a, zie achun bangkhat bawm, puon lientak bang, a ning li a kikhit a, van apat a hung kitultha ka mu a, ka kawm cha ah a hung um ta a.

⁶Chun, zie chuh ka en zinga, chun, ka ngaihtuoh a; chun, leia um, ganhing keng li neite, gamsate, ganhingte leh chung leng vachate ka mu a.

⁷Chun, aw khatin, ‘Peter, tho ah, that inla, neh,’ ei ti’n le ka za a.

⁸Himahleh, ken, ‘LALPA, hilo e, a thienglo leh a buok himhim, bangmah ka kam ah a lut ngei puoi,’ ka ti a.

⁹Himahleh, van apat a aw chun, a nih veina ah, ‘Pathien in a hih thienthosa chuh nangin thienglo ti ki’n,’ ti’n ei dâwng a.

¹⁰Khutibang ngen chun thum vei a hung um a; chun, thil chengcheng chuh, van lama khaih toh in a um kit ta a.

¹¹Chun, ngaitiem u, Kaisari khuo apat in mi thum a hun sawl u a, ka umna In mai achun a na ding zing tau a.

¹²Tichun, Thagau in, kuomah khenchuom lo a amau haw zui dingin ei sawl a. Chun, zie suohpih gupte hin le ei hun zui u a, zie pa In achun ka lut u a;

¹³Amah chun ka kawm u ah, a In a vânsâwlchâk ding a muh dân leh, vânsâwlchâk chun a kawma, ‘Joppa khuo ah mi sawl inla, Simon Peter a tih pau chuh hun puih sak ah.

¹⁴Amah chun thu hun hilh intin, zie thu chun nang leh na inkuonpihte chuh hukdam in um unlau,’ tih le ei hilh u a.

¹⁵Chun, thu ka gen tûng lai in, Thagau Thiengtho, ka chung u a a hungtun tûnglai guol mah khan, a chungu ah a hungtung ta a.

¹⁶Chuleh, LALPA thu gen: ‘Johan in tui in mi a baptist sek kha; himahleh, nang haw vang chuh, Thagau Thiengtho in Baptistma hung chang unlau,’ a tih haw khah ka hezing a.

¹⁷Khutichun, LALPA Isu Krista I ginchak phat u a, Pathien in thilthawnpiek ei uh ei piek guol khah, a kawm u a a piek nung in, kei hi, Pathien niel ding guol ka hi a ahim?” a ti a.

¹⁸Chun, zie thu haw chuh a zak phât un, thamuong takin a um tau a, “Khuti a hih le chuh, Pathien in Jentel te le hinna dinga lunghei a phalsak ahi ta chu,” ti’n Pathien a pakcha tau a.

¹⁹Chun, Stephan chungchanga sukgimtheihna hung um zieka tai zakte khah, Phoinikia gam, Kupra tuikuol leh Antiokei khuo haw chuh tung in a chieh u a, Judate kawm tihloh achun, kuomah dang kawmah thu a gen puou hi.

²⁰Himahlele, a lak u a khenkhatte chuh Kupra tuikuol leh Kurini khuo a mi ahiu a, ziete chun Antiokei khuo a tun un, Grikte le a hopih u a, LALPA Isu Chanchin Pha chuh a gen zel u a.

²¹Tichun, LALPA khut in amau haw chuh a panpih a, mi tamtakin a gingchau a, LALPA lam a nga tau hi.

²²Khutichun, a chanchin u chuh, Jerusalem khuo a Sapchuomte bil achun a hung lut ta a: tichun, Antiokei khuo achun Barnabas chuh a sawl tau a.

²³Amah chuh a va tun phet chun, Pathien in a mite a lungsiet zie chuh a mu a, a kipâk mah mah a, LALPA a dinga ginum tak leh, tupna det taka um zing dingin, a bawn u chun a tîlkhoh ta a.

²⁴Barnabas chuh mi phatak ahi a, Thagau Thiengtho leh taksanna a dim ahi. Tichun, mi tamtakin LALPA kawmah a tel behlap lawh tau hi.

²⁵Chun, Barnabas chuh Saul hawl dingin Tarsas khuo ah a chieh a;

²⁶Chun, a muh phet chun, Antiokei khuo ah a hun pui ta a, tichun, kum khat zet chuh Sapchuomte kikhawpna achun a tel sek u a, mi tamtak le a sinsak sek u a. Sinsakte chuh, “Kristien,” a kitih masak pên u chuh Antiokei khuo ahi.

²⁷Chun, zielai chun, thiemgau kuote ahim, Jerusalem khuo apat in, Antiokei khuo achun a chieh u a.

²⁸Chun, a lak uh a mi khat, a min Agabas chuh a dinga, khawvel pumpi ah kiel nasatak tung ding ahi tih, Thagau hilh in a hetsak a; (zie kiel chuh, Klaudias lal lai in ana tung ta a.)

²⁹Tichun, sinsakte lawi chun, a hihtheih kham chiet un, Judai gama suohpih umte kawm achun kikhawmtuohna ding thâk a guou a.

³⁰Zie chuh a hih ta ngêi u a, Barnabas leh Saul khut achun, upate kawmah a thâk tau hi.