Read Gangte NASEPTE 18 Bible Online

NASEPTE 18 - Gangte bible

NASEPTE 18

¹Zie thil haw nung chun, Paul chuh Athen khuo apat chuh a pawt a, Korinth khuo ah a chieh ta a.

²Zie tak achun, Juda mi khat, a min Akuila kiti a mu a, zie pa chuh Ponto gama pieng ahi a, Klaudias in Juda chengcheng Rome khuo apat pawtdawk ding thu a piek ziekin, a zi Prisilla tawh Itali gam apat hung tung pan phet ahiu. Paul chuh ziete kawm achun a chieh a,

³Chun, a kawm u achun a tung a, a nasep bang uh sem a hih ziekin amau chuh tawh a sem sek a, a nek muhnau chuh puon-In siem ahi.

⁴Chun, Chawlhni cheng leh kikhawpna In achun guntak in thu a gen sek a, Judate leh Grikte chuh thuzawh a guo hâm sek a.

⁵Himahlele, Silas leh Timothe chuh Makedonia gam apat a hung suk phet un, Paul chuh thugen mai in a um ta a, “Isu chuh Krista ahi” tih Judate kawmah a hilhchien sek a.

⁶Himahlele, a dodal u a, a gensiet phet un, Paul in a puon a thing a, a kawm u ah, “Na thihna mawh u chuh nangmau in kipuok un; kei vang ka thieng hi; tu a kipat Jentel te kawmah chieh ta’ng ka,” a ti a.

⁷Tichun, tak apat chuh a pawt a, mi khat, a min Titas Justas kiti In achun a lut a, zie pa chun Pathien a ho sek a; a In chule zie kikhawpna In chu tawh kizawm ahi.

⁸Chun, Krispas, kikhawpna In lawiupa chun, a inkawte chengcheng tawh LALPA a gingcha tau a, Korinth khuo a mi tamtak inle a zau a, a gingcha tau a, baptistma a chang tau ui.

⁹Chun, zan khat chuh, LALPA’n Paul kawm achun vaulam in, “Lau ki’n la, thip lo in thu gen zel ah,

¹⁰kei na kawmah ka um a puo, nang hun suna dingin kuoma’n na chungah khut tha puo’n au; zie khuo ahin mi tamtak ka nei ngâl a,” a ti a.

¹¹Khutichun, Paul chuh tak achun a laku ah Pathien thu sinsak in, kum khat leh tha gup a um ta a.

¹²Chun, Gallio chuh Akaia gama hausa thasanga a um lai in, Judate chuh kipunkhawm in Paul chuh a man u a, vaihawmna chutphah ma ah a pui u a.

¹³“Zie pa poh hin, Danlo guola Pathien ho dingin mi a thêm pai sek hi,” a tiu a.

¹⁴Chun, Paul in a dâwn ding phetin, Gallio chun Judate kawmah, “Judate haw, ziehaw hi thil diklo thu ahim, thilhih gitloh thu ahim bêk hile chuh, thawnlo in nanguh hun limsak ding ka hi.

¹⁵Himahleh, thu haw, min haw leh na dân chungthuu mai a hih chun, nangmau haw’n kivaihawm zawu un; ken vang zie tawbang thu haw chuh ngaihtuoh ka nuom puoi,” a ti a.

¹⁶Tichun, vaihawmna chutphah apat chun amau haw chuh a nawhmang ta a.

¹⁷Chun, Grik mi chengcheng chun kikhawpna In lawiupa Sosthena chuh a man u a, vaihawmna in mai achun a zêp u a, Gallio chun zie a thilhih teu chuh bangmân a ngai puoi.

¹⁸Chun, zie nung chun, Paul chuh Korinth khuo achun ni sawttak a châm a, zie zawh chun, suohpihte chuh kampha’n a tha a, tak apat chuh Prisilla leh Akuila tawh Suria gam lam ah kuong in a chieh tau a. Paul chun thutiem a neih ziekin, Kenkria khuo apat a kitawl mau chun, a sama met a.

¹⁹Chun, Ephesi khuo chuh a tung u a, tak achun Prisilla leh Akuila chuh a nusieh ta a. Amah chuh kikhawpna In ah a lut a, Judate kawmah guntak in thu a gen tadih a.

²⁰Chun, amau chun sawt deuh châm dingin a ngên u a, himahleh lem a sa puoh a.

²¹Himahleh, Jerusalem a guolvakna um ding ahin tel tei guo ka hi, Pathien in a phal chun, na kawm u ah hungkit ing ka, ti’n kampha’n a tha a, Ephesi khuo apat chuh kuong in a kitawl ta a.

²²Chun, Kaisari khuo a tun phet chun, Jerusalem khuo ah a va chieh a, sapchuomte chuh a va chibai a; zie zawh chun, Antiokei khuo ah a chieh ta a.

²³Chun, taka chuh sawt deuh a um nung in, a chieh kit a, sinsak lawi chengcheng chuh sudet in, Galati gam leh Phrugia gam chuh a fang suok vek a.

²⁴Zielai chun, Juda mi khat, a min Apollos kiti, Aleksandria khuo a pieng chuh, Ephesi khuo achun a va chieh a. Amah chuh thugen thiem tak leh, Pathien Lehkha thu he mah mah khat ahi.

²⁵Zie pa chuh LALPA Lampi thu sinsaksa ahi ta a, lungthima phachuomngai tak a hih ziekin, Isu chanchin chuh diktaka gen in, a sinsak sek a. Himahleh, Johan baptistma thu mai chuh a he a.

²⁶Kikhawpna In ah hangsan takin thu a gen pan ta a. Khutichun, Prisilla leh Akuila chun a thugen a zak un, a In u ah a pui u a, a kawmah Pathien Lampi thu kichien zaw diek in a hilhchien tau a.

²⁷Chun, Apollos chun Akaia gama chieh kaih a guot phetin, suohpihte chun a panpih u a; Akaia gama sapchuomte’n amah a na lawpna dingun, ngetna lehkha a zik sak u a. Chun, a va tun chun, Pathien lungsietna zieka gingchate ding chun panpihtu nasatak a hi ta a.

²⁸Vantâng zak in Judate chuh nasatak in a niel dawng sek a, Pathien Lehkha Thu mang in, Isu khah Krista chuh ahi, tih a hetsak sek a.