Read Gangte NASEPTE 24 Bible Online

NASEPTE 24 - Gangte bible

NASEPTE 24

¹Tichun, ni nga nung in, Thiempu Lienpen Ananias chuh, upate khenkhat tawh, dân thiem khat, a min Tertullas a tih uh chu tawh Kaisari khuo achun a chieh u a. Felix maa chun a ding u a, Paul chuh a hêk tau a.

²Chun, Paul chuh a sam lut u a, chun, Tertullas chun a hêkna thu chuh hiti hin a gen pan ta a: “Felix zahum, nangmah ziekin hun sawttak thamuong takin ka um u a; ka gam uh phatna dingin thil pawimawh siemthak tampi hihin a um ta a.

³Muntin leh hun tinin zie chuh ka lawp mah mah u a, na chungah ka kipâk tak zet uh ahi.

⁴Himahleh, na hun sau tak hun lâksak ka nuom puoh a, na nunnemna’n thu kam khat vang chuh nei ngaihthak sak dingin ka hun ngên hi.

⁵Zie pa hi, mi muhdahum tak, van nuoia Judate chengcheng châwkbuoi pa leh, Nazarene mite pawl a lamkai pên khat a hih ka heu hi.

⁶Chun, Pathien Ho-In le sukbuok a guo a, ziezieka chuh ka mat uh ahi.

⁷Keihaw dana thutan sak ka guo a, himahleh, sepaih lawiupa lienpen Lusias chuh ka kawm u ah a hung a, pawngbawl in ka khut uh apat a kaidawk a.

⁸A hêkte chuh na kawma hung dingin thu pie’n la, Nangmah mawng in suohsalh leh chin, ka hêkna thu chengcheng u hi, amah kawm apat he thei inla,” a ti a.

⁹Chun, Judate chun le, “Zie chuh thudik ahi,” ti’n a panpih tau hi.

¹⁰Chun, gam paw pa chun thugen dinga Paul chuh khuta a zap phetin, Paul chun, “Zie chite chunga hin kum tamtak vaihawm in na um tai tih ka he a, chun, ka thiemna thu na masanga gen dinga ka um ziek hin, ka kipâk hi.

¹¹Jerusalem khuo a Pathien ho dinga ka va chieh nung, ni sawm leh ni nih khel hi nai puo’n a tih hezing in.

¹²Pathien Ho-In ale, kikhawpna In ale, khawpi sung ale, kuomah ka niel leh, mipi ka tîlguk Judate hin ei mu hiel puou hi.

¹³Tuhin le ei heknau thu hih, na zak in, abul bangmah sutdawk thei diek puo’n au.

¹⁴Himahleh, ziehi vang na kawmah phuong ing ka: ‘Gindan diklo’ a tih uh zui in, kei uh ei suonte Pathien ka ho sek. Chuleh, Mosi Dan leh Thiemgaute Lehkhabu a kizik chengcheng chuh ka gingcha a.

¹⁵Chun, Pathien achun, zie mite hin kinepna a neih bang mah uh ken le ka nei a, zie chuh, mi pha leh mi phalote thihna apat thawhkitna um gel gel ding ahi tih hi.

¹⁶Khutichun, Pathien masang leh mihiemte masangah, sie leh pha hetna thieng taka um ka guo mawng mawng sek ahi.

¹⁷“Chun, kum bang ahim ti sung, Jerusalem apat ka um mang nung in, taka ka chipihte kawma chuh thilpiek ding laa, kithawihna lân dingin ka chieh ta a.

¹⁸Zie chuh ka lat laia, kithiensakna ka bawl zawh nung chuh ahi, Pathien Ho-In a ei muh nau chuh. Ka kieng ah mipi a um puoh a, bangmah buoina le a um puoi,

¹⁹Himahlele, zie tak achun, Asia gam apat Juda mi kuote ahim, a um u a, ziete chun ka chunga bang ahim khat, hêkna ding ei neih u chun, taka hin na maa hung in, ei hêk ding ahi tau hi.

²⁰Ahihloh leh, ziete haw ngêi hin, vaihawmte maa ka din lai khan, ka sukkhelh banga a muh uh, gen u hen.

²¹Zie thu kam khat ziek hi a hihloh ngâl leh: a masang u a ka din lai in, ‘Mithi thawhkitna thu ginchak ziekin, tuni hin na mau ah suohsalh a um ka hi hi,’ ka tih khah,” a ti a a dâwng a.

²²Chun, Felix chun, zie thu chuh a hetchet deuh ziekin, “Sepaih lawiupa lienpen Lusias chuh a hung tun suk tieng leh, na thuu chuh tan ing ka,” ti’n, a kawih tadih a.

²³Chun, Paul chuh huntieng a zalen sak deuh a, a guolte’n a thil mamawhte a piek uh khap sak lo a, chin sak dingin, Paul vengte lawiupa chuh thu a pie a.

²⁴Chun, ni bang zat ahim nung chun, Felix chuh, a zi Drusilla, Juda numei chu tawh a hungkit u a. Paul chuh a sap sak u a, Krista Isu taksanna thu a gen chuh a ngaithau a.

²⁵Chun, Paul in, diktatna thu haw, kidêkna thu haw, Vaihawmna Ni hung tung ding thute guntaka a gen lai in, Felix chun lauh-um a sa ten a, “Chieh kit tadih tie, hun lemchâng ka neih tieng leh hun sam kit na’ng ka,” a ti a.

²⁶Paul in dangka a piek a kinep thim kawm ziekin, a sam mun deuh a, a hopih sek ahi.

²⁷Himahleh, kum nih a kivel nung in, Porkias Festas chun Felix chuh a theng dawk ta a; chun, Felix chun, Judate laka min phat a nawp ziekin, Paul chuh kansa’n a nusieh ta a.