Read Gangte NASEPTE 25 Bible Online

NASEPTE 25 - Gangte bible

NASEPTE 25

¹Chun, Festas chun gamsung a vaihawm ni thum nung chun, Kaisari khuo apat in, Jerusalem ah a va chieh a.

²Chun, Thiempu liente leh Juda lamkaite chun a kawmah, Paul chungchâng thu chuh a sie lam in a na lâwt u a. Festas kawm achun,

³Jerusalem khuo a hun sawl sak dingin lungsietna a na ngên u a; lampi a na chan gûka thah a guot ziekun.

⁴Himahleh, Festas chun, “Paul chuh Kaisari khuo a a chin zing uh ahi a, kei le chawmkhat hal leh chieh ding ka hi.

⁵Zieziekchun, zie pa chun gitlohna a neih chun, na lak u a lawiupa chengin ei zui suk u henla, hêk u he’n,” a ti a, a dâwng a.

⁶Chun. a lak uh achun Festas chuh ni giet ahim, ni sawm ahim a um beh a, chun, Kaisari khuo ah a chieh suk ta a. Chun, a zing chun, vaihawmna chutphah ah a chu a, Paul chuh hun puih dingin thu a pie a.

⁷Chun, Paul a hung tun phet chun, Jerusalem khuo apat a Juda hung sukte chuh a vel ah a ding u a, a hihna a sut dawk theih loh hiel uh, thukhawk tamtakin a hêk pan tau a.

⁸Paul chun a thiemna thu a gen a: “Judate Dan chungah ahim, Pathien Ho-In chung thu ah ahim, Kaisar chungah ahim, bangmah ka sukhiel puoi,” a ti a.

⁹Himahlele, Festas chun, Judate laka minphat a nuom a, Paul kawm achun, “Jerusalem khuo a va chieh a, taka chuh ka maa zie thu haw hi va tan na nuom hi?” a ti a, a dâwng a.

¹⁰Paul chun la, “Kaisar vaihawmna chutphah maa ka thu nei tansakna ding ahin ka ding hi; Judate chungah bangmah ka sukhiel puoi, nangin le zie chuh na hechien mah mah ngâl a.

¹¹Migilo ka hih a, thihna kham hiel, thil bawl ka hih chun, thih le ka niel puoi; himahlele, ziete haw ei hêkna thu hi, thudik bangmah a um loh chun, kuoma’n a khut u ah ei pie lut thei puo’n au. Kaisar kawmah tun ing ka,” a ti a.

¹²Festas chun, a vaihawmpihte a hotuok zawhin, “Kaisar kawmah tut na guo viela, Kaisar masang ah ding ngêi inla,” ti’n a dâwng a.

¹³Chun, ni bang zat ahim nung chun, Leng Agrippa leh Berniki chuh Kaisari khuo a hung tung u a, Festas a chibai u a.

¹⁴Chun, ni tamtak, taka chuh a nichuon nung un, Festas chun Paul chungchâng thu chuh Leng kawm achun a gen a: “Felix khan, suongkul tang mi khat a nusieh a;

¹⁵Jerusalem khuo a ka um lai khan, Thiempu liente leh Juda upate’n a chungchâng thu ei hilh u a, mawh chansak dingin ei ngên u a.

¹⁶Chun, ken a kawm u ah, ‘A hêk pau leh a hekte a kimaichangtuoh uh a, a hêkna thuu a a thiemna thuu a gen gel na ding u a, hun lemchâng piek a hih masang u a, mi himhim thahdawk hi, Rome mite hihdan ei puoi,’ ti’n ka dâwng a.

¹⁷Chun, tak hih a hung tun un, sawt hal lo in, a zing chun, vaihawmna chutphah ah ka chu a, zie pa chuh va puih dingin thu ka pie a.

¹⁸Tichun, a hekte chuh a ding u a, himahleh, ka ginchak guolin a chungah gitlohna thukhawk bangmah a gen ngâl puou a.

¹⁹A bawn u a a heknau chuh a hih leh, a sakhuo danteu leh, mi khat Isu, a thisa chanchin, zie chuh Paul in, ‘A hing kit hi,’ a tihna thu ahi.

²⁰Chun, ken zie thu haw chuh ngaihtuoh ngaihna himhim ka he puoh a, Jerusalem khuo a chieh a, taka chuh zie thu haw hi tan sak a nawp leh nawp loh ka dawng a.

²¹Himahleh, Paul chun, lalpen tan dinga sit a ngên zaw ta a; zieziekchun, Kaisar kawma ka sawl theih masang sieh, chin dingin thu ka pie tai,” a ti a.

²²Chun, Agrippa chun Festas kawma chun, “Ken le, zie pa thugen chuh ngaihthak ka na nawp zing him ahi,” a ti a. Chun, amah chun, “Zing leh, a thugen ngaitha ding na hi chu,” a ti a.

²³Khutichun, a zing chun Agrippa leh Berniki chuh lopi takin a hung u a, sepaih lawiupa liente tawh, khawpi a lamkai lien deuh deuhte chu tawh thugenna In achun a lut u a. Festas chun thu a pie a, tichun, Paul chuh a hun puilut tau a.

²⁴Ziephet chun, Festas chun, “Leng Agrippa leh, taka I lak u a um chengcheng te haw, zie pa, na muh uh hi ahi, a chungchâng thu a Judate chengcheng, taka um haw leh Jerusalem khuo a umte’n, hing ta lo ding ahi ti a ei kiko khumnau khah.

²⁵Himahlele, thihna kham hielin bangmah a hih puoi tih ka mudawk a; chun, amah mah in, lalpen kawma tut a guot ziekin sawl ka guot ahi.

²⁶Himahleh, thuchien tak, bangmah, leng kawma zik ding ka he ngâl puoh a. Zieziekchun, na mau ah ka hun puidawk ahi, Leng Agrippa, nang maa hun puichuom deuh ka hi, a thu phataka dawtchet a hih nunga, bang ahim khat bêk, zik ding ka neih theihna dingin.

²⁷Suongkul lut, lalpen kawma sawl a, a chunga a hêkna thuu hettuoksak loh chuh, ngawlhuoi hin ka he ngâl a,” a ti a.