Read Gangte NASEPTE 27 Bible Online

NASEPTE 27 - Gangte bible

NASEPTE 27

¹Chun, Itali gama kuong a ka chiehna dinguh thu a sukpuk phet un, Paul leh suongkul lut dang chuh, “Augustas sepaih pawl,” kiti a lawiupa, a min Julias khut ah a pie dawk tau a.

²Tichun, Adramuttinium khuo kuong, Asia gam tuisuohgiet panga khuo umte tawh dinga chun ka chuu a, ka kitawl tau a. Makedonia gam mi, Aristarkas, Thessalonika khuo a um chuh ka kawm u ah a um a.

³Chun, a zing chun, Sidon khuo ka tawh u a. Julias chuh Paul a ding chun a pha mah mah a, a thil mamawhte a piek theihna ding u a, a guolte kawma a va chieh chuh a phalsak a.

⁴Zie tak apan chun ka chieh zel u a, huih in a hilo lama ei nam ziekin, Kupra tuikuol, huih thipna lam ah ka kitawl tau a.

⁵Chun, Kilikia gam leh Pamphulia gam lam naih tuipi ka khelh nung un, Lukia gama Mura khuo ka tung u a.

⁶Zie tak achun, sepaih za lawiupa chun Aleksandria khuo kuong, Itali gam tawh ding chuh a mu a, zie tak a chun ei chut sak a.

⁷Tichun, ni sawttak, awl awlin ka kitawl u a, a tawp in, haksa takin, Knidos khawpi ka tung tau a. Huih in ei nan tâk ziekin, Salmone zul ah, Kret tuikuol huih thipna lam ah ka kitawl u a,

⁸Haksa takin lui pang ka zut u a; “Kaihmun Nuom” a tih uh mun chuh ka tung tau a, zie chuh, Lusea khawpi apat gamla lo cha ahi.

⁹Zie tak achun ni sawttak ka mangbei tau a, kuong a zin a lauh-um zing naklai ziekin, zie hun hin An ngawlh ni chuh a kipel ta a. Khutichun, Paul in amau haw chuh a hilh a, a kawm u ah,

¹⁰“Pute haw, kuong a tu a chieh hi, sietna leh manthaina nasatak hung tung ding ahi tih ka he a, a thuomphuo haw leh kuong mai hi ti ka hi puoh a, hinna mansak le ti ka hi,” a ti a.

¹¹Himahlele, sepaih zalawiupa chun, Paul thugen sang chun, kuong lam lawiupa leh kuong neipa thu chun a nung zaw a.

¹²Chun, phalbi dona dinga kaihmun chuh a lemchâng loh ziekin, a tam zawn, tak apana chuh tuipi a chiehdawk a, Phoinikia khuo tun hâm hâm a, taka phalbi do chuh a guotpih zawu a. Phoinikia chuh Kret tuikuol a kaihmun khat ahi a, mâl sak leh sim sak dawh ahi.

¹³Chun, sim huih chuh awl awla a hung nun phet chun, mite chun a deih dân uh a hithei tai ti’n, thik-det chuh a khâi dawk u a, Kret tuikuol pang naih thei chin chun a tawl u a.

¹⁴Himahlele, chawmlo kalin, thingtâng lam apat in huihgum a hung nung suk a, zie huih chuh, “Eurakuilo” a ti sek ui.

¹⁵Tichun, kuong chuh a hun mût kha a, huih lam a nawh zawh loh phetin, ka thah tau a, ei tawk, ei tawk zieng ta a.

¹⁶Klauda tuikuol neucha, simlam a chun huih thipna mun khat ka tung tau a. Zie tak achun, haksa tak kawmin kuong neu ka man thei hâm u a.

¹⁷A kaih dawk nung un, kuong henna khau haw chun kuong chuh a khit u a, a hen tau a. Libia lui pang pîlnel thuok laka taih lut a lauh ziekun, kuong puonzak chuh a hihniem deuh u a, huih a kipuih sak tau a.

¹⁸Chun, tui akinawk nasat ziekin, kuong a thuomphuo haw chuh tui lak ah a paih tha pan tau a,

¹⁹Chun, a ni thum ni chun keimau khut ngêi in, kuong matchâk khenkhat chuh ka paih dawk kit tau a.

²⁰Tichun, ni tamtak sung chuh nisa ahim, aksi ahim le ka mu ta puou a, huih chulah hât takin a nung zing mai ta a. A tâwp chun, hin kinepna himhim ka nei ta puou hi.

²¹Chun, mihaw chuh an ne lo a sawttak a um nung un, Paul a laku ah a ding a, “Pute haw, ka thu kha ngai leu chin Kret tuikuol apat kha kitawl ta lo hi leu hing zie sietna leh manthaina haw hi tuok lo ding I hiu a!

²²Himahlele, tuhin le, lungmuong taka um dingin ka hun tîl na hiu hi; na lak u a kuomah, hinna mansak um ding nei puou hi, kuong hi vang chuh mang ding ahi.

²³Amah a ka hi a, a na ka sep sek Pathien vânsâwlchâk khat chuh tuzan khan ka kieng ah a hung ding a,

²⁴Ka kawmah, ‘Paul, lau kih, Kaisar masanga ding ding na hi; chun, ngai ah, kuong a na hun kitawnpih chengcheng te hile, Pathien in a hun piek ahi,’ ei tih ahi.

²⁵Zieziekchun pute haw, lungmuong takin um un, Pathien ka gingchai, ei hilh bang banga um ding ahi.

²⁶Himahlele, tuikuol bang ahim ah ei tawk dawk ding ahi,” a ti a.

²⁷A zan sawm leh lina ahi ta a, Andria tuipi chunga huih in ei tawh viel lai chun, zan khang ding velin, kuongpute chun, khawitak thingtâng ahim tung ding hi’n a kiheu a.

²⁸Khutichun, tui thuk lam a teh u a, lam sawmnih in a heu a, chun, chawmkhat hal in a teh kit u a, lam sawm leh lam nga’n a heu a.

²⁹Tichun, kuong mei lam ah thik det li a khieu a, khutilochun, suong sie lak ah ei tawk lut kha’na tih a lau u a, tichun, khawvakna dingin a paucham tau a.

³⁰Chun, kuongpute chun, kuong a pata chuh taihmang guo’n, thikdet khie ding guola kibawl in, kuong lu lama chun kuongpalai chuh tui laka chun a khaithau a.

³¹Himahleh, Paul chun, sepaih zalawiupa leh sepaihte kawma chun, “Kuong pute chuh kuong a a um zing loh u chun bit thei puo’n lau,” a ti a.

³²Ziephet chun, sepaihte chun kuongpalai henna khau haw chuh a âttan u a, a thah tau a.

³³Chun, khawvak ding kuon in, Paul in mi cheng cheng chuh, an ne ding in sawl a, “Tuni hi ni sawm leh ni li ahi tai, zie hun sung cheng chun bangmah ne lo in na ngak tau a.

³⁴Zieziekchun, an ne dinga ka hun sawl na hiu, na hung hât theihna dingun. Na lak u a kuoma’n na samzang khat chau le mansak lo ding na hiu hi,” a ti a.

³⁵Chun, zie thu chuh a gen zawhin, chângthâk a la a, mi chengcheng masanga chun Pathien kawmah kipahthu a gen a, a phelsuoh a, tichun, a ne pan tau a.

³⁶Tichun, muong takin a um u a, an chuh a ne chiet tau a.

³⁷Kuong a um chengcheng chuh ka bawn un mi zanih leh sawmsagih leh gup ka hiu hi.

³⁸Chun, mi chengcheng in a nek vah phet u chun, buh haw chuh tuipi achun a paih thau a, kuong chuh a hihzang deuh tau hi.

³⁹Chun, khuo a hung vak phatin le, a gamkaih chuh khawitak ahim tih kuong tawlte chun a he diek puou a; himahleh, bang kaihmun ahim sehpho hi a muu a, a hih theih leh, zie tak a chun kuong tawl dawk a guo tau a.

⁴⁰Chun, thikdet henna haw chuh a âttan u a, tuipi a chun a kiek lut sak u a, zie zui mah chun, kalhheina kânna khau haw chuh a phel u a, kuong mai lam puonzak chuh huih dawh lam in a dawmsang u a, sehpho lam ka zuon tau a.

⁴¹Himahleh, tuizangkhauh nih kisuktuohna mun ah ka na lut khau a, kuong chuh lui pang pîlnel lak a sutsak u a, lei ah a tum ta a; kuong lu lam chuh a det ta a, a tawi thei ta puoh a, a mei lam chuh tui kinawk a nasat bêk ziek chun a puokkek pan ta a.

⁴²Ziephet chun, sepaihte chun, suongkultâng haw chuh thah a vaisawm tau a, khutilochun, tuizap kai bang um untin, tai mang kha’n au, tih a lau u a.

⁴³Himahlele, sepaih zalawiupa chun Paul hukbit a nuom a, a thil guot u chuh a khap a: tuizap thiem cheng tuipi a chuh chawm tha a, sehpho a na kai masa ding leh, midang chuh abang thingpek chung poh leh, kuong a matchâk dang chung poh a kai dingin thu a pie zaw ta a.

⁴⁴Khutibang chun, ka bawn un bit takin lui pang chuh ka kai dawk vek tau hi.