Read Gangte NASEPTE 3 Bible Online

NASEPTE 3 - Gangte bible

NASEPTE 3

¹Chun, Peter leh Johan chuh, vaimim huon phat vela, paucham hun lai chun, Pathien Ho-In a lut ding chun a va chieh u a.

²Chun, upa kuo ahim a pientûng apat kêngbâi ahun zawn u a, zie pa chuh Ho-In a lutte kawma khutdawh dingin Ho-In kawtkhak hawih a tihnau achun, nichenga a kuol sak sek uh ahi.

³Zie pa chun, Peter leh Johan Pathien Ho-In a lut ding chuh a mu a, khut a na dawh a.

⁴Chun, Peter leh Johan in amah chuh a en u a, Peter chun a kawmah, “Kei uh ei hun entie!” a ti a.

⁵Amah chun, a kawm u apat banga him muh kinem in a vak en a.

⁶Himahleh, Peter chun, “Dangka leh sana bangmah ka nei puoi, himahlele, ka neih sun hun pie’ng ka: Nazareth Isu Krista min in keng in chieh ta’n,” a ti a.

⁷Tichun, a khut changlam a tu a, a kaitho ta a. Khutichun, thakhat in, a kênghaw leh a siekmit guh haw chuh a hung hât ta a;

⁸Chun, amah chuh a tho dawka, a ding a, keng in a chieh pan ngâl ta a. Khutichun, kenga chieh leh chawm chawm in, Pathien pakcha kawm zelin Pathien Ho-In achun a lutkhawm tau hi.

⁹Chun, kenga chieh leh, Pathien a pahchak chuh mi cheng chengin a muu a;

¹⁰Kawtkhak Hawih bula khutdawh a chu sek kha ahi tih a het phet un, a chunga thiltung chuh mak a sa mah mah u a, a buoi ten tau a.

¹¹Chun, zie pa chun, Solomon bithaliep, a tihnau muna Peter leh Johan a tuk zing lai chun, mipite chun mak a sa mah mah tau a, a kawm lam u ah a hung tai khawm tau a.

¹²Chun, Peter in mipite chuh a muh phetin, a kawm u ah, “Nang haw Israel mite haw, ziehaw hi bangati a mak sa? Keimauhaw thilhih theihna leh, Pathien ka ngaihsak ziek u a, zie pa hi ka chieh sak uh hi’n na ngai u ahim?

¹³Abraham te, Isak te, Jakob te Pathien, ei suonteu Pathien chun, a suok Isu hi a limbawl ahi ta hi. Amah chuh na matsak u a, Pilate in thahdawk a guot nasan inle, a masang ngêi ah na deih loh uh ahi kha.

¹⁴Mi thiengtho leh Diktat kha na deih puou a, himahleh, tuolthatpa khah na kawm u a a hun piek dawk na ngên zawu ahi kha.

¹⁵Hinna Siempa chuh na that u a; himahlele, Pathien in amah chuh mithi lak apat a kaitho kit a, zie chuh a hetpihte ka hiu hi.

¹⁶Chun, amah min thilhih-theihna chun, zie kengbaipa hi hatna a pie ahi. Na muh u leh, na hetteu hi, amah min ginna ziekin hih ahi tai; Isu ginchakna ziekin, na bawnchau a mitmuh ah hihdam kei a hi tai.

¹⁷“Himahlele, suohpihte haw, nang haw leh na lawiupateu in Isu chunga na thilhih teu kha, na hetloh ziek u a na hih uh ahi tih ka hêi.

¹⁸Malai pek a kipatin, Pathien in a thiemgaute mang in, Krista’n dahum a thuok ding thu a na genlawk ta a, zie guol hin a hun tun sak ahi tai.

¹⁹Khutichun, na gitloh hawu ngaihdam a hih theihna dingin, lunghei unla, hung kihei kit un, khutichun, LALPA kawm apat halh phat hungtung thei ina.

²⁰Krista Isu, nang u dinga a guotsa khale hun sawl ina.

²¹Amahvang chuh, bangakai siemthak hun a tun masang sieh, amah chuh van a um tadih ding a hii, zie siemthak hun ding chuh Pathien in, malai pek a a thiemgau thiengthote manga a gen sa ahi tai.

²²Mosi ngêi in, ‘LALPA na Pathien un, kei ei sawl guol hin, nang haw lak ngeia mi, thiemgau khat hun sawl sak ina. Amah chun, na kawm u a a thugen cheng chuh ngaihthak sak unlau.

²³Mi kuole, zie thiemgau thu ngailo chuh, Pathien mipite laka pat khenchuom in um intin, sukmangthai in um ina!’ a tih khah.

²⁴Ahi, Samuel um apat thiemgau chengcheng leh a nunga mite tawh, thugen chengcheng khan tulai chanchin hi a na genlawk sek uh ahi.

²⁵Nanguh hi thiemgaute leh thugawlh chate na hiu a puo. Pathien in Abraham kawmah, ‘Na suonte ziekin khawvel a namtin vangsak ing ka,’ ti a a suonteu kawma a tiem khah.

²⁶Khutichun, Pathien in a suok chuh a tel a, na lak u a mi tin, a gitlohnau lampi apat a kinunghei sak chieta, vangsak dingin, na kawm u ah a hun sawl masa ahi,” a ti a.