Read Gangte NASEPTE 5 Bible Online

NASEPTE 5 - Gangte bible

NASEPTE 5

¹Himahlele, mi khat amin Ananias kiti, a zi Saphiras tawh a um u a; Ananias chun a lo a zuok a.

²A zi lemsakpih in, a man a bang a îm ta a, a dang cheng chuh chawi in sawlchakte keng bul achun a kawih ta a.

³Himahlele, Peter in, “Ananias. Thagau Thiengtho thêm ding leh, lei man abang îm dingin, bangati a Setan in na lunggil a sukdim a?

⁴Na zawk ma cheng khan nanga hi zing lo maw? Na khawt nung in le, aman chuh nang thu thu hilo ahim? Bang zieka zie tawbang thilhih ding hi ngaihtuoh na hi? Mihiem thêm na hi puoh a, Pathien thêm na hi zawi!” a ti a.

⁵Chun, Ananias chun zie thu haw chuh a zak phetin, a puk a, a thi ta a; a za taphawt chun a lau mah mah tau a.

⁶Tichun, tangval haw chuh a kipan u a, a tuom u a, a zawn dawk u a, a vui tau a.

⁷Chun, dâkkâl thum vel nung chun, a zi chuh, thil umdante chuh he lo in, a hung lut a.

⁸Peter in a kawmah, “Nei hilh ah, lo chuh zie zat mai hin maw na khawt uh?” a ti a. Amah chun, “Hi, zie zat mai hin a hii!” a ti a.

⁹Ziephet chun, Peter in a kawmah, “Bangati a LALPA Thagau zedapna a kithuguol na hiu hi? Ngaitie! na pasal vuite kengpekhaw chuh kawtkhak bul ah a hung um tai, nang le hun zawn dawk un au!” a ti a.

¹⁰Ziephet chun, thakhat in a keng bul achun a puk zieng ta a, a thi ta a. Tichun, tangval haw chuh a hung lut u a, amah chuh a thisa’n a hung mu tau a, a zawn dawk u a, a pasal kieng achun a vui tau hi.

¹¹Chun, sapchuom haw lawi chengcheng leh, zie thu za taphawt chun a lau mah mah tau hi.

¹²Chun, Pathien in, mipite lak achun thilmak leh melchikna tamtak, sawlchakte khut in a hih sek a. Gingtute cheng chuh, Solomon bithaliep a chun a kikhawm sek u a.

¹³Mi dang vang chuh, kuomah a laku ah a va tel ngam puou hi, himahlele, mi’n amau haw chuh a pakcha sek ui.

¹⁴Tichun, a lak uh achun LALPA gingcha numei leh pasal, behlap in a um zel tau hi.

¹⁵Khutichun, sawlchakte thilhih ziek chun, damlote le khawlai dung poh ah a puodawk u a, zâlkhun leh puonphah chunghaw a chun a kuol sak u a, Peter chieh viel in a lim bêka a lieh theih na’n, a tiu a.

¹⁶Chun, Jerusalem kimvela khawpite apat in mipite chuh, damlote, thitha buok matte hun pui in a hung khawm u a. ziehaw chule a hung dam zel tau hi.

¹⁷Chun, Thiempu Lienpen leh, a guolte, zie khuo sunga Sadukaite chengcheng chun, sawlchakte chuh a mitthîp mah mah tau a;

¹⁸Khutichun, sawlchakte chuh a man u a, vantâng suongkul a chun a khum tau a.

¹⁹Himahleh, zie zan chun, LALPA vânsâwlchâk in suongkul kawtkhakhaw chuh a hun hawng a, sawlchakte chuh a puidawk a, a kawm u ah,

²⁰“Chieh unla, Pathien Ho-In ah va ding unla; mite kawmah zie hinna thak thu chengcheng hi va gen un,” a ti a.

²¹Khutichun, sawlchakte chun zie thu chuh a zawp u a, tichun, khawvak ding kuon in Pathien Ho-In a chun a va lut u a, a sinsak tau a. Ziephet chun, Thiempu Liente leh a guolteu chun, Israel lawiupate cheng leh vaihawm pawl chengcheng chuh a sam khawm u a; sawlchakte chuh a masang u a hun pui dingin suongkul a chun mi a sawl tau a.

²²Himahlele, mimante chuh suongkul a a va chieh phet un, suongkul achun sawlchakte chuh a mu ta puou a, tichun, a chieh kit u a, vaihawmte kawm achun a va gen tau a,

²³“Suongkul ka va tun u chun, suongkul chuh bit taka kikhak in, a ngakte le kawtkhak bula dingin ka muu a; himahleh, a sung ka va lut phet un, a sunga chun kuomah ka mu ta puou hi!” a tiu a.

²⁴Tichun, Thiempu Liente leh, Pathien Ho-In lawiupate chun zie thu haw chuh a zak un, sawlchakte chunga thil tung chuh mak a sa mah mah tau a.

²⁵Zie lai chun mi khat a hung a, a kawm u ah, “Ngaitiem u, suongkul a mi na khumteu khan Pathien Ho-In ah mi a sinsak ui!” ti’n a hung hilh a.

²⁶Tichun, lawiupa chuh mimante chu tawh a va chieh u a, sawlchakte chuh a hun puikit tau a. Mipite’n suong a a seh dinguh a lauh ziekun, a chungu ah khauh tak in bangmah a hih ngam puou hi.

²⁷Sawlchakte chuh In sung ah a puilut u a, vaihawmte masang achun a din sak u a; tichun, Thiempu Lienpen chun a kawm u ah,

²⁸“Zie min a hi sinsak talo dinga thu ka hun piek uh hilo maw? himahleh, na thilhih u hi en un! Na thu sinsak un, Jerusalem na sudim vek tau a, zie pa thisan mawh hi ka chung u a na but guot uh ahi?” ti’n a suohsalh ta a.

²⁹Himahlele, Peter leh sawlchak dangte chun, “Mihiem thu sangin Pathien thu ka zawp zawk dinguh ahi.

³⁰Nang un Isu kross a khên den a, na thahpau khah, ei suonteu Pathien in a kaihthawh kit ahi tai.

³¹Amah mawng khah, Pathien in Lal leh Hukdampa hi dingin a changlam ah a limbawl ta a; Israel te gitloh lunghei sak ding leh ngaidam dingin,

³²Zie thu haw hetpihte chuh ka hiu a keihaw leh Thagau Thiengtho, Pathien in a thu zawp ta chengte kawma a piek ngêi chu tawh,” a tiu a.

³³Chun, vaihawmte chun zie thu haw chuh a zak phet un, a lung uh a khei mah mah a, thah mai a ut tau hi.

³⁴Himahlele, vaihawmte lak achun, a min Gamaliel, Pharisai Dan sinsakpa, mi cheng chengin a zah mah mah uh khat chuh a ding a, sawlchakte chuh pawtdawk sak phawt dingin thu a pie a;

³⁵Chun, vaihawmte kawm achun, “Nanguh Israel mite haw, ziete chunga na thilhih guot u hi chingthei un.

³⁶Tuma khan le, Theodas chuh, ‘Milien ka hi’ ti’n a hung um a, zie pa chuh mi zali velin a hun kithuohpih u a. Himahlele, amah chuh thah in a um a, a nungzuite chuh a bawn un a kithehdalh vek tau a, a thilhih hawu chuh bangmah a hi ta puoi.

³⁷Chun, amah nung chun, min zik lai khan, Galili gama mi Juda khah a hung um kit a; mipi huntieng a nei kit a, himahleh, amah chule thah in a um a, a nungzuite cheng chule a kithehdalh vek tau hi.

³⁸Zieziekchun, tuhin le na kawm u a ka gen ahi, ziete hi bangmah lawh kiu inla, hiti hin umsak hiet hiet un. A thil guonggalh hawu leh a thilhih teu hi, mihiem hih dawk mai a hih chun, mangthai kit pai un au,

³⁹Amahvang chuh, Pathien apat a hih a hih chun, amau haw sumangthai thei puo’n lau. Pathien do a na hi zaw kha’n lau!” a ti a. Vaihawm pawl chun Gamaliel thuhilhna chuh a zawp tau a.

⁴⁰Tichun, sawlchakte chuh a sam lut u a, a zêp u a, tichun, Isu min a thu gen kit lo hiel dingin thu a pieu a, a thahdawk tau a.

⁴¹Sawlchakte chuh, vaihawmte kawm apat a a pawtdawk phet u chun, Isu min zieka zahchâkna thuok taka guota a um ziek u chun a kipâk mah mah u a.

⁴²Chun, ni chengin, Pathien Ho-In leh, mipite Inhaw achun, Isu chuh Krista ahi, tih sinsak leh hilh a hai diek puou hi.