Read Gangte NASEPTE 7 Bible Online

NASEPTE 7 - Gangte bible

NASEPTE 7

¹Chun, Thiempu Lienpen chun Stephan kawmah, “Zie thu haw hi a dik em?” ti’n a dawng a.

²Chun, Stephan chun a dâwng a, “Suohpihte haw, upate haw, ngaitiem u! Ei suonpau Abraham, Haran khuo a a um maa, Mesopotamia gama a um lai khan, Lopina Pathien chuh a kawmah a hung kilak a,

³a kawmah, ‘Na khuo leh na chite lak apat pawt inla, gam ka hun etsakna ding lam ah chieh ah,’ a ti a.

⁴Tichun, amah chuh Kaldai haw gam apat a chiehdawk a, Haran khuo ah a va um ta a. Chun, a pa a thih nung in, tak apat chuh, tu a na umnau khuo lama hin Pathien in a pemlut sak ta a.

⁵Himahleh, taka hin vang chuh, bangmah mun luoh ding a kêngpêk ngakna kham le a pie puoh a; himahleh, amah leh, a nunga a suonte chana go dingin piek a tiem a, cha a na neih ma him inle.

⁶Chun, Pathien in zie tawbang hin a gen a: ‘A suonte chuh mi gam ah kum zali chengun tin uh, mi’n suok in mang un tin uh, sugimthei un au,’ ti’n.

⁷Chuleh, Pathien mah in, ‘Suok a nei dingte nam chuh ken hun ngaihtuoh ing ka ting, chun, zie zawh chuleh hung pawt un tin uh, zie mun ahin kei dingin sem un au,’ le a ti a.

⁸Chun, Pathien in a kawmah zektan thugawlh le a pie a. Khutichun, Abraham in Isak a hing a, a ni giet ni chun a zek a tan sak a; Isak chun Jakob a hing a, Jakob chun chi sep zakte sawm le nih te khah a hing ta a.

⁹“Chun, chisep zakte khan Joseph a mitthîp u a, Aigupta gam lam ah a suok in zuok tau a, himahleh, Pathien a kawmah a um a,

¹⁰a dahum thawkna chengah a hukdawk zel a. Aigupta gam leng Pharaoh le a lungsiet sak a, miching tak ahi tih le a hetsak a, tichun, amah chun, Aigupta gam leh a In a mi chengcheng chungah lawiupa’n a siem ta a.

¹¹Tichun, Aigupta leh Kanaan gam chengcheng achun kiel a hung um a, gimtheihna nasatak a hung tung ta a. Ei uh ei suonteu chun nek ding himhim a mu zo ta puou hi.

¹²Himahleh, Jakob chun, Aigupta gam ah nek ding a um hi tih a zak phet chun, ei-uh ei suonte chuh a sawl dawk a; zie chuh a chieh masak na pên uh ahi.

¹³Chun, a nihvei chieh nau achun, Joseph chuh a suohpihte kawma chun a kihetsak a; tichun, Joseph suohpihte chuh Pharaoh a hetsak tau hi.

¹⁴Chun, Joseph chun, a pa Jakob leh a suohpihte cheng chuh a sap sak a; amau haw chuh sawmsagih leh nga ahiu hi.

¹⁵Tichun, Jakob chuh Aigupta gam ah a va chieh a; tak achun amah leh ei suonteu chuh a thi tau hi.

¹⁶Chun, a luong chuh Sekem khuo a zawn tung u a, Abraham in Sekem khuo a Hamor chate laka thân, dangka suma a châwk akhan a vui tau hi.

¹⁷“Chun, Pathien in Abraham kawma thu a tiem khah, a tun hun a hung naih phetin, mipite chuh Aigupta gam achun a hung pung u a, a hung tam deuh deuh tau a.

¹⁸Joseph helo, leng dang a hung um tieng khan

¹⁹Zie pa chun I chiteu chuh lepbawl in, ei uh ei suonteu chuh a bawlsie a, a chasen hawu khat chale hing lo dingin a paih dawk sak sek a.

²⁰Zie lai chun Mosi a hung pieng a, a mel a hawih mah mah mai a; a pa In ah tha thum a vak u a,

²¹chun, In apat a paih dawk phet un, Pharaoh chanu’n a kilak a, amah cha dingin a kivâk ta a.

²²Tichun, Mosi chuh, Aigupta gama mite chitna chengcheng a sinsak tau a, a thu leh a thilhih ah a lopi mah mah ta a.

²³“Chun, amah chuh kum sawmli a hihin, a suohpih, Israel suonte chuh va vehthak a guo a.

²⁴Chun, a lak u a mi khat, Aigupta mi khatin a sukgimtheih lai a mu a, a panpih a, sukgimtheih thuokpa phu chuh a laa, Aigupta mi chuh a that ta a.

²⁵(Mosi chun, amah khut in Pathien in amau haw a hukbit hi tih a suohpihte’n a he ding u aw, tih a ngaihtuoh a, himahlele, a he puoh ngâl u a.)

²⁶Chun, a zingin, amau laka mi nih, a kisuol pêt un a kawmuh a hung tung a, ‘Pute haw, suohpih khat na hiu hilo maw, bangati a diklo taka kibawl?’ ti’n châm a guo a.

²⁷Himahlele, a inveng chunga thil diklo bawl zawpa chun Mosi a sawn dawk a, ‘Ka chung u a, lawiupa leh, vaihawm dinga kuo a hun siem?’

²⁸‘Thangni a Aigupta mi na thah guol a kha thah nei guot ahi maw?’ a ti a.

²⁹Zie thu ziek chun Mosi a tai mang a, Midian gam ah a va thâm zing ta a, tak achun chapa nih a nei den ta a.

³⁰“Chun, kum sawmli a hung kivel phetin, Sinai tâng gamthip a nawnglak ah, mei kuong lak ah vânsâwlchâk khat a kawmah a hung kilak a.

³¹Mosi’n a muh chun, a thil muh chuh mak a sa mah mah a; chun, en dinga a va naih lai in LALPA aw’n,

³²‘Kei, nang hun suonte Pathien, ka hi hi, Abraham Pathien, Isak Pathien, Jakob Pathien chuh,’ a na ti a. Tichun, Mosi chuh a kilîng a, a en ngam ta puoh a.

³³Chun, LALPA chun a kawmah, ‘Na kêngpêk a na kengtawbek khah sut ah; na dinna mun chuh lei thiengtho ahi.

³⁴Aigupta gama ka mite chuh, a dahum thuok zieu ka mu zing a puo, a mau git u le ka za zing a, amau hukbit dinga hung suk ka hi tai. Khaile; Aigupta gam ah hun sawl ing ka,’ a ti a.

³⁵“Chun, Mosi, ‘lawiupa leh vaihawmpa a kuo a hun siem?’ ti a a hawt u chuh, nawnglaka vânsâwlchâk a kawma kilak khan a huh a, Pathien in amah mawng chuh, lawiupa leh hukbitpa hi kawm dingin a sawl ahi.

³⁶Amah chun, Aigupta gam ale, Tuisuohgiet San ale, Thalek haw achun, kum sawmli sungin, thilmak leh melchiknate a muh sak zet a, amau haw a pui dawk ta a.

³⁷Zie Mosi chuh ahi, Israel suonte kawma, ‘Pathien in keimah ei siem guolin, na suohpihteu laka mi ngêi, thiemgau hun siem sak ina,’ ti pa khah.

³⁸Amah chuh ahi, gamthip a mi kikhawmkhawmte laka, Sinai tânga hopihpa vânsâwlchâk kawm leh, ei uh ei suonte kawma um khah; amah chuh, ei piek sawn dinga thuhing haw lapa chuh ahi.

³⁹“Himahleh, ei uh ei suonteu chun a thu a zawp nuom puou a, a hawu a,

⁴⁰Aron kawmah, ‘Ka mapui dingun pathien haw nei siem sak ah; Mosi, Aigupta gam apat a ei puidawkpa hila a chanchin ka he ta ngâl puou a,’ ti’n a lungthim hawu chuh Aigupta lam ah a kîkkit ta a.

⁴¹Chun, zie lai chun, bâwngno lim a siem u a, a lim chuh gan that in a ho u a, amau haw khut suok chung achun a lawp tau a.

⁴²Khutichun, Pathien in a nungngat a, van a aksihaw a chibai theihna dingun amau haw a haihsan ta a; thiemgau lehkhabu a: ‘Israel chate haw, gamthip a khan kum sawmli sungin sa that leh gan that in kei nei ho um?

⁴³Molok puon-In leh pathien Rephan aksi chu le, Chibai dinga a lim na siem hawu khah, Na zawn zaw sek u a; Zieziekchun, Babulon khaw khel lam ah Nanguh hun puimang ing ka,’ tih zik guol khan.

⁴⁴“A lim a muh banga siem dinga Mosi hilhpa’n a guot guol khan, ei uh ei suonte’n gamthip akhan hetsakna puon-In chuh a nei u a.

⁴⁵Zie mah chuh, ei uh ei suonte suon kit inle a nei sawn zel u a, zie chuh, Pathien in ei uh ei suonteu maa Jentel nam a nawhdawkte haw gam luoh dinga Joshua lawi a a chieh lai u khan a lutpih u a. Zie chun, David hung um tieng khan a um zing ta a.

⁴⁶Zie David chun, Pathien deihsakna a chang a, Jakob Pathien dingin umna siem sak a ngên a.

⁴⁷Himahlele, Solomon in In chuh a sak sak ta zaw ahi.

⁴⁸“Himahleh, Chungnung pên pa Pathien chuh khuta sak In haw ah a um ngêi puoi; thiemgau chun:

⁴⁹‘LALPA’n, Van ka chutphah ahi a Lei ka keng ngakna ahi: In bang tawbang in a nei sak sak dinguh? Ka chawlhna mun le bang ahi?

⁵⁰Keimah khut in zie thil bangakai hi ka siem puoh a ahim?’ a tii, ti a a gen guol khan.

⁵¹“Mi genhak, lunggil leh bil tan lohte haw! kumkhuo’n Thagau Thiengtho chuh na dodal zing u a; nanguh hun suonte hih guol zel khan na hih sek uh ahi.

⁵²Nanguh hun suonte’n, thiemgaute laka kuo a, a bawlsiet loh uh um? Mi Diktat hung ding thu hilhlawkte khah a that u a; zie Mi Diktat chuh matsakte leh thatte chuh nangmau hi na hiu apuo!

⁵³Dan, vânsâwlchâkte piek sawn khah mu zet a, zawp sâmlo te haw!” a ti a.

⁵⁴Zie thu haw chuh a zak phet un, a lung uh a vilh ta a, Stephan chung achun a hau a gawi u a.

⁵⁵Himahleh, amah chuh Thagau Thiengtho a dim a hi a, van lam a en chak kêi a, Pathien lopi zie leh, Pathien chang lama Isu ding a mu a.

⁵⁶“Ngaitiem u, van kihawng ka mu a, Pathien chang lama Mihiem Chapa ding le ka mui.” a ti a.

⁵⁷Ziephet chun, amau haw chuh aw ngeih tak in a kiko u a, a bil uh ahim u a, kiguol takin a bawl diek mai u a,

⁵⁸khuo apat chuh a nawhdawk u a, suongin a sep u a, a hetpihte chun tangval khat, a min Saul a tihpau keng bul achun a puonhawu a kawih u a.

⁵⁹Khutichun, Stephan in, “Lal Isu, ka thagau la ta’n,” ti a LALPA a sap lai in, suongin a sep sausau u a.

⁶⁰Chun, a khupdin a, aw ngeih tak in a kiko a, “LALPA, zie a thilhih gitloh u hi, a chungu ah mawh puok sak ki’n,” a ti a. Chun, zie thu chuh a gen zawhin, a ipmu ta a.